തിരുവനന്തപുരം: പാര്‍ട്ടി അച്ചടക്കം ലംഘിച്ച് മലപ്പുറത്ത് പലസ്‌തീന്‍ ഐക്യദാര്‍ഢ്യ റാലി സംഘടിപ്പിച്ച ആര്യാടന്‍ ഷൗക്കത്തിനെതിരായ അച്ചടക്ക നടപടിയില്‍ തീരുമാനം വൈകും (Disciplinary action against Aryadan Shoukath). എടുപിടീന്ന് തീരുമാനമുണ്ടാകില്ലെന്ന് കെപിസിസി അച്ചടക്ക സമിതി ചെയര്‍മാന്‍ തിരുവഞ്ചൂര്‍ രാധാകൃഷ്‌ണന്‍ മാധ്യമങ്ങളോട് വ്യക്തമാക്കി.
മലപ്പുറം ഡിസിസി പ്രസിഡന്‍റ്‌ വിഎസ് ജോയി ഉള്‍പ്പെടെ 13 ഡിസിസി ഭാരവാഹികള്‍ ആര്യാടന്‍ ഷൗക്കത്തിനെതിരെ പരാതി നല്‍കിയ സാഹചര്യത്തില്‍ എല്ലാവരെയും വിളിച്ചു വരുത്തി കേള്‍ക്കുമെന്നും ഇന്ന് എത്താന്‍ സാധിക്കാത്തവര്‍ക്ക് 13 ന് അവസരം നല്‍കിയെന്നും തിരുവഞ്ചൂര്‍ പറഞ്ഞു. അതേ സമയം ജില്ലയിലെ 20 പ്രമുഖ നേതാക്കള്‍ തനിക്കൊപ്പമുണ്ടെന്ന് ആര്യാടന്‍ ഷൗക്കത്ത് അച്ചടക്ക സമിതിയെ അറിയിച്ചിട്ടുണ്ട്. ലോക്‌സഭാ തെരഞ്ഞെടുപ്പ് അടുത്ത സാഹചര്യത്തിലും റാലി പലസ്‌തീന്‍ ഐക്യദാര്‍ഢ്യത്തിന്‍റെ പേരിലായതിനാലും കടുത്ത അച്ചടക്ക നടപടിയിലേക്കു പോകുന്നത് ജില്ലയില്‍ പാര്‍ട്ടിക്ക് കടുത്ത ക്ഷീണമുണ്ടാക്കുമെന്ന പൊതു വിലയിരുത്തലിലാണ് കെപിസിസി.
ഈ സാഹചര്യത്തില്‍ ഭാവിയില്‍ ഇത്തരം നടപടികള്‍ ആവര്‍ത്തിച്ചാല്‍ കടുത്ത അച്ചടക്ക നടപടിയുണ്ടാകുമെന്ന താക്കീത് നല്‍കി പ്രശ്‌നം അവസാനിപ്പിക്കാനാകും അച്ചടക്ക സമിതിയുടെ തീരുമാനം. കോണ്‍ഗ്രസ് പ്രവര്‍ത്തക സമിതി അംഗം ശശി തരൂരും അച്ചടക്ക നടപടി ആവശ്യമില്ലെന്ന നിലപാടിലുമാണ്. അതേ സമയം പാര്‍ട്ടി വിലക്ക് ലംഘിച്ച് പലസ്‌തീന്‍ ഐക്യദാര്‍ഢ്യ സദസ് സംഘടിപ്പിച്ച ആര്യാടന്‍ ഷൗക്കത്തിന്‍റെ നടപടി കടുത്ത അച്ചടക്ക ലംഘനമാണെന്ന് നിലപാടിലുറച്ചു നില്‍ക്കുകയാണ് മലപ്പുറം ഡിസിസി പ്രസിഡന്‍റ്‌ വിഎസ് ജോയിയും മറ്റ് 16 ഭാരവാഹികളും.
മുന്‍ മന്ത്രിയും വണ്ടൂര്‍ എംഎല്‍എയുമായ എപി അനില്‍കുമാറും ആര്യാടനെതിരെ നടപടി വേണമെന്നാവശ്യപ്പെട്ടിട്ടുണ്ട്. എന്നാല്‍ പരിപാടി പാര്‍ട്ടി അച്ചടക്കത്തിനെതിരല്ലെന്നും പാര്‍ട്ടി ലക്ഷ്യങ്ങളോടെയല്ല പരിപാടിയെന്നും ആര്യാടന്‍ ഫൗണ്ടേഷന് രാഷ്ട്രീയമില്ലെന്നുമാണ് ഷൗക്കത്തിനൊപ്പമുള്ളവരുടെ നിലപാട്. അച്ചടക്ക നടപടിയിലേക്ക് പാര്‍ട്ടി നീങ്ങിയാല്‍ രാജിവച്ച് ഷൗക്കത്തിനൊപ്പം നിലയുറപ്പിക്കാനാണ് 20 നേതാക്കളുടെ തീരുമാനം. ഇത് പാര്‍ട്ടിക്ക് വലിയ തിരിച്ചടിയാകുമെന്നാണ് വിലയിരുത്തല്‍. 11ന് സിപിഎം കോഴിക്കോട്ട് സംഘടിപ്പിച്ചിട്ടുള്ള പലസ്‌തീന്‍ ഐക്യദാര്‍ഢ്യ സമ്മേളനം വരെ വിഷയം നീട്ടിക്കൊണ്ടു പോകാനുള്ള ശ്രമങ്ങളും അണിയറയില്‍ ശക്തമാണ്.
പാർട്ടി വിലക്ക് ലംഘിച്ച് പലസ്‌തീന്‍ ഐക്യദാർഢ്യ സമ്മേളനം നടത്തിയ വിഷയത്തില്‍ അടുത്തിടെ കെപിസിസി അച്ചടക്ക സമിതിക്കുമുന്നില്‍ ആര്യാടൻ ഷൗക്കത്ത് ഹാജരായിരുന്നു. താൻ അച്ചടക്കമുള്ള പാർട്ടി പ്രവർത്തകനാണെന്നും സമിതിയോട് പറയുന്ന കാര്യങ്ങൾ മാധ്യമങ്ങളോട് പറയേണ്ടതില്ലെന്നും ഹാജരാകുന്നതിന് മുൻപ് മാധ്യമങ്ങളോട് പ്രതികരിച്ചിരുന്നു. ആര്യാടൻ ഷൗക്കത്തിനെതിരായ പരാതി ചർച്ച ചെയ്യലായിരുന്നു കെപിസിസി യോഗത്തിന്‍റെ പ്രധാന അജണ്ട. ഷൗക്കത്തിനെതിരെ കടുത്ത നടപടി വേണമെന്നാണ് ആവശ്യം ഉയര്‍ന്നിരുന്നത്. വിഷയത്തിൽ ഷൗക്കത്തിന്‍റെ ഭാഗം കൂടി കേട്ട ശേഷം തീരുമാനം എടുക്കുമെന്നാണ് അച്ചടക്ക സമിതി അധ്യക്ഷൻ തിരുവഞ്ചൂർ രാധാകൃഷ്‌ണൻ പ്രതികരിച്ചിരുന്നത്.
ALSO READ: 'താൻ അച്ചടക്കമുള്ള പാർട്ടി പ്രവർത്തകന്‍' ; കെപിസിസി സമിതിക്കുമുന്നില്‍ ഹാജരായി ആര്യാടൻ ഷൗക്കത്ത്
