കളിയിക്കാവിള: കളിയിക്കാവിള കൊലപാതകത്തിൽ നേരിട്ട് പങ്കുവഹിച്ച മുഖ്യപ്രതികളായ അബ്ദുൾ ഷമീമിനെയും തൗഫീഖിനെയും ഇന്ന് കുഴിത്തുറ കോടതിയിൽ ഹാജരാക്കും . ഉച്ചയ്ക്ക് 12 മണിയോടെ പ്രതികളെ കോടതിയിൽ എത്തിക്കും. പാളയം കോട്ട സെൻട്രൽ ജയിലിലുള്ള പ്രതികളെ കനത്ത സുരക്ഷയിലായിരിക്കും കുഴിത്തുറയിൽ എത്തിക്കുക.
കഴിഞ്ഞ വ്യാഴാഴ്ച കുഴിത്തുറ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതികളെ 14 ദിവസത്തേക്ക് റിമാൻഡ് ചെയ്തിരുന്നു. പ്രതികളെ കസ്റ്റഡിയിൽ വിട്ടു കിട്ടാൻ പൊലീസ് അപേക്ഷ നൽകിയെങ്കിലും കസ്റ്റഡിയിൽ നൽകിയിരുന്നില്ല. തുടർന്ന് ഇരുപതാം തീയതി പ്രതികളെ കോടതിയിൽ ഹാജരാക്കാൻ നിർദ്ദേശിക്കുകയായിരുന്നു. ഇതിന്‍റെ അടിസ്ഥാനത്തിലാണ് പ്രതികളെ ഇന്ന് കോടതിയിൽ ഹാജരാകുന്നത്. കോടതിയിൽ ഹാജരാക്കുന്ന പ്രതികളെ പൊലീസ് കസ്റ്റഡിയിൽ വിടുമെന്നാണ് സൂചന.
അതേസമയം, വ്യാഴാഴ്ച കോടതിയിൽ എത്തിച്ചപ്പോൾ പ്രതികൾക്ക് വേണ്ടി തിരുനെൽവേലിയിൽ നിന്നും എത്തിയ അഭിഭാഷകരായ അബ്ദുൾ നിസം, അദ്മൽ ഹസാലി, ഇബ്രഹീം ബാദ്ഷാ എന്നിവരുമായി കുഴിത്തുറ കോടതിയിലെ അഭിഭാഷകർ വാക്കേറ്റവും കയ്യാങ്കളിയും നടത്തിയിരുന്നു. ഇതിൻറെ അടിസ്ഥാനത്തിൽ പൊലീസ് കൂടുതൽ സുരക്ഷ ഉറപ്പു വരുത്തിയിട്ടുണ്ട്.
