മാവിൻമൂട് എങ്ങനെ സ്റ്റാച്യു ജംഗ്ഷൻ ആയി

സെക്രട്ടേറിയറ്റ് സ്ഥിതിചെയ്യുന്നതിനാൽ തലസ്ഥാന നഗരത്തിലെ ഏറ്റവും തിരക്കുപിടിച്ച സ്ഥലങ്ങളിൽ ഒന്നാണ് സ്റ്റാച്യു. ഇവിടെ സ്ഥിതിചെയ്യുന്ന മാധവ റാവുവിന്‍റെയും വേലുത്തമ്പിയുടെയും പ്രതിമകൾ മൗനമായി സംസാരിക്കുന്നത് തിരുവിതാംകൂറിന്‍റെ വികാസചരിത്രമാണ്. നൂറ്റാണ്ടാേളം പഴക്കമുള്ള ഓർമ്മകൾ.

തിരുവനന്തപുരം സെക്രട്ടേറിയറ്റ് സഥിതി ചെയ്യുന്നത് സ്റ്റാച്യുവിലാണ്. തിരുവിതാംകൂർ ദിവാനായിരുന്ന ടി മാധവ റാവുവിന്‍റെ പ്രതിമയാണ് ഈ പേരിനു പിന്നിൽ. നാടിനെ മാറ്റിമറിച്ച പ്രഗത്ഭനായ ദിവാന്‍റെ പ്രതിമ സ്ഥാപിക്കപ്പെട്ടതോടെ പഴയ മാവിൻമൂട് എന്ന മൂന്നുമുക്ക്, സ്റ്റാച്യു ജംഗ്ഷൻ ആയി മാറുകയായിരുന്നു.

ഇവിടയുള്ള മാധവ റാവുവിന്‍റെയും വേലുത്തമ്പിയുടെയും പ്രതിമകൾ തിരുവനന്തപുരത്തിന്‍റെ തന്നെ മുഖമുദ്രയാണ്. 1893 മേയ് 30ന് കേരളവർമ വലിയകോയിത്തമ്പുരാൻ അനാച്ഛാദനം ചെയ്ത ടി മാധവറാവു പ്രതിമയാണ് നഗരത്തിലെ ആദ്യ പ്രതിമ. അങ്ങനെ പ്രതിമ നിൽക്കുന്ന സ്ഥലം എന്ന നിലയ്ക്ക് ഇവിടം സ്റ്റാച്യു ജംഗ്ഷൻ ആയി.

സെക്രട്ടേറിയറ്റ് വളപ്പിനുള്ളിലാണ് വേലുത്തമ്പിയുടെ പ്രതിമ. ഇതിന്‍റെ തൊട്ടുമുന്നിലാണ് മിക്കപ്പോഴും സമരങ്ങൾ അരങ്ങേറുക. പ്രതിഷേധക്കാർ സമരപ്പന്തൽ ഉണ്ടാക്കാൻ ഇവിടം കെട്ടിയടച്ചാൽ വേലുത്തമ്പിയെ പിന്നെ പുറത്തു കാണാനാവില്ല.