തിരുവനന്തപുരം: സംസ്ഥാനത്തെ ആദ്യ സര്‍ക്കാര്‍ എസ്.എം.എ ചികിത്സ ക്ലിനിക് തിരുവനന്തപുരം എസ്.എ.ടി ആശുപത്രിയില്‍. സ്‌പൈനല്‍ മസ്‌കുലാര്‍ അട്രോഫി എന്ന അപൂര്‍വ രോഗം ബാധിച്ച് തളര്‍ച്ചയും ശ്വാസകോശ സംബന്ധമായ പ്രശ്‌നങ്ങളുമായി കഷ്‌ടപ്പെടുന്ന കുട്ടികളുടെ ചികിത്സക്കായാണ് പുതിയ ക്ലിനിക്ക് ആരംഭിക്കുന്നത്. പീഡിയാട്രിക് ന്യൂറോളജി വിഭാഗത്തിന്‍റെ നേതൃത്വത്തിലായിരിക്കും ക്ലിനിക്ക് ആരംഭിക്കുക.
സ്‌പൈനല്‍ മസ്‌കുലാര്‍ അട്രോഫി ബാധിച്ച കുട്ടികള്‍ക്കായി സര്‍ക്കാര്‍ മേഖലയില്‍ ചികിത്സ സംവിധാനം ഒരുക്കണമെന്ന ആരോഗ്യമന്ത്രി വീണ ജോര്‍ജിന്‍റെ നിര്‍ദേശമാണ് എസ്.എ.ടി ആശുപത്രിയില്‍ നടപ്പിലാവുന്നത്. ഇത്തരം രോഗമുള്ള കുട്ടികളുടെ ചികിത്സക്കൊപ്പം കുട്ടികളുടെയും മാതാപിതാക്കളുടെയും ജനിതക പരിശോധനയിലൂടെയും കൗണ്‍സിലിങ്ങിലൂടെയും തുടര്‍ന്ന് ജനിക്കാന്‍ പോകുന്ന കുട്ടിയ്ക്ക് ഈ രോഗം വരുന്നില്ലെന്ന് ഉറപ്പു വരുത്തുകയും ക്ലിനിക്ക് ലക്ഷ്യമിടുന്നു.
ക്ലിനിക്കില്‍ പീഡിയാട്രിക് ന്യൂറോളജി, പീഡിയാട്രിക്‌സ്, ജെനറ്റിക്‌സ്, റെസ്‌പിറേറ്ററി മെഡിസിന്‍, ഫിസിക്കല്‍ & റീഹാബിലിറ്റേറ്റീവ് മെഡിസിന്‍ തുടങ്ങിയ വിഭാഗങ്ങളിലെ വിദഗ്‌ധരുടെ സേവനവും ലഭ്യമായിരിക്കും. ക്ലിനിക്കിന്‍റെ ഉദ്ഘാടനം തിങ്കളാഴ്‌ച ആരോഗ്യ മന്ത്രി വീണ ജോര്‍ജ് ഉദ്ഘാടനം ചെയ്യും.
