തിരുവനന്തപുരം: ശബരിമല തീര്‍ഥാടനത്തിന് മുന്നോടിയായി സ്‌പെഷ്യല്‍ സര്‍വീസിന് സജ്ജമായി കെഎസ്‌ആര്‍ടിസിയുടെ 340 ബസുകള്‍. സൂപ്പര്‍ ഡീലക്‌സ്, സൂപ്പര്‍ ഫാസ്റ്റ്, ഫാസ്റ്റ് പാസഞ്ചര്‍ ബസുകളാണ് സ്‌പെഷ്യല്‍ സര്‍വീസിനായി ക്രമീകരിച്ചിരിക്കുന്നത്.
നിലയ്‌ക്കല്‍ മുതല്‍ പമ്പ വരെയുള്ള ചെയിന്‍ സര്‍വീസിനായി 100 ബസുകള്‍ ക്രമീകരിച്ചിട്ടുണ്ട്. ഇതില്‍ 20 എസി ലോഫ്ലോര്‍ ബസുകളും 80 നോണ്‍ എസി ബസുകളുമാണ്. സംസ്ഥാനത്തെ വിവിധ റെയില്‍വെ സ്റ്റേഷനുകളില്‍ നിന്നും പ്രധാന ഡിപ്പോകളില്‍ നിന്നും കെഎസ്‌ആര്‍ടിസി സര്‍വീസുകളുണ്ടാകും. 40 പേരില്‍ കൂടുതല്‍ ആവശ്യപ്പെട്ടാല്‍ പ്രത്യേക ബോണ്ട് സര്‍വീസുകള്‍ നടത്തുമെന്നും കെഎസ്‌ആര്‍ടിസി എംഡി ബിജു പ്രഭാകര്‍ അറിയിച്ചു.
കൂടാതെ തീര്‍ഥാടകരുടെ എണ്ണത്തിനുസരിച്ച് അധിക സര്‍വീസുകള്‍ നടത്താന്‍ യൂണിറ്റ് ഓഫീസര്‍മാരെ ചുമതലപ്പെടുത്തിയിട്ടുണ്ട്. ആദ്യ പമ്പ സര്വീസ് നവംബര്‍ 12 ന് ആരംഭിക്കും. 36 മെക്കാനിക്കല്‍ ജീവനക്കാരുള്‍പ്പെടെ 90 ജീവനക്കാരെയാണ് പമ്പ ഡിപ്പോയിലേക്ക് നിയമിച്ചിട്ടുള്ളത്.
പമ്പയിലെ സ്‌പെഷ്യല്‍ ഓഫീസറായി തിരുവനന്തപുരം സ്റ്റാഫ് ട്രെയിനിങ് കോളജ് പ്രിന്‍സിപ്പില്‍ ഇന്‍ ചാര്‍ജ് ഡി.ഷിനുകുമാറിനേയും അസിസ്റ്റന്‍റ് സ്‌പെഷ്യല്‍ ഓഫീസറായി കോട്ടയം ഡിടിഒ രമേശിനേയും നിയമിച്ചു. പ്രളയവും കൊവിഡും മൂലം കഴിഞ്ഞ രണ്ട്‌ വര്‍ഷത്തിലേറെയായി കെഎസ്ആര്‍ടിസിക്ക് വരുമാനത്തില്‍ വലിയ കുറവുണ്ടായിരുന്നു.
യാത്ര നിരക്ക് സംബന്ധിച്ച് അന്തിമ തീരുമാനം എടുത്തിട്ടില്ലെങ്കിലും മുന്‍വര്‍ഷങ്ങളിലെ അതേ നിരക്ക് തുടരാനാണ് സാധ്യത. നവംബര്‍ 15നാണ് ശബരിമല നട തുറക്കുന്നത്.
