തിരുവനന്തപുരം : കെ റെയിൽ (k Rail) വിഷയത്തിൽ വീണ്ടും ചർച്ച നടത്താൻ റെയിൽവേ ബോർഡ് (Central Railway Board). അർധ അതിവേഗ റെയിൽവേ പദ്ധതിയായ കെ റെയിൽ പദ്ധതിയുമായി ബന്ധപ്പെട്ട കാര്യങ്ങൾ കേരള റെയിൽവേ ഡെവലെപ്‌മെന്‍റുമായി (Kerala Rail Development Corporation Limited ) ദക്ഷിണ റെയിൽവേ (Southern Railway ) അടിയന്തരമായി ചർച്ച നടത്തണമെന്ന് ബോർഡ് ആവശ്യപ്പെട്ടു. വിഷയത്തിൽ നവംബർ ഒന്നിന് റെയിൽവേ ബോർഡ് ദക്ഷിണ റെയിൽവേയ്‌ക്ക് കത്തയച്ചിരുന്നു.
64,000 കോടി രൂപയുടെ പദ്ധതിയിൽ ഉടന്‍ തന്നെ ചർച്ച നടത്തി അഭിപ്രായം അറിയിക്കാനും റെയിൽവേ ബോർഡ് ആവശ്യപ്പെട്ടിട്ടുണ്ട്. കെ റെയിൽ വിഷയം ചർച്ച ചെയ്യാൻ ആവശ്യപ്പെട്ട് റെയിൽവേ ബോർഡ് ദക്ഷിണ റെയിൽവേയ്‌ക്ക് അയക്കുന്ന ഒരു മാസത്തിനിടയിലെ രണ്ടാമത്തെ കത്താണിത്. കഴിഞ്ഞ മാസം ഒക്‌ടോബർ 10നാണ് റെയിൽവേ ബോർഡ് കെ റെയിലുമായി ബന്ധപ്പെട്ട് ആദ്യത്തെ കത്തയച്ചത്.
അതിൽ ഒക്‌ടോബർ 21 ന് ദക്ഷിണ റെയിൽവേ മറുപടി അയച്ചിരുന്നു. തിരുവനന്തപുരം മുതൽ കാസർകോട് വരെയുള്ള അർധ അതിവേഗ റെയിൽ പദ്ധതി (സിൽവർ ലൈൻ) നടപ്പിലാക്കുന്നതിൽ കേരള സർക്കാർ നേരിടുന്ന ആശങ്കകളാണ് കത്തിൽ പ്രധാനമായും സൂചിപ്പിച്ചതെന്നാണ് വിവരം. ഭൂമി ഏറ്റെടുക്കൽ, നിലവിലെ റെയിൽവേ സംവിധാനത്തിന് മുകളിലൂടെയുള്ള കെ റെയിൽ അലൈൻമെന്‍റ് എന്നിവ ആശങ്കകളായി ദക്ഷിണ റെയിൽവേ അറിയിച്ചിട്ടുണ്ട്.
എന്നാൽ, വിഷയത്തിൽ വീണ്ടും കേരള റെയിൽവേ ഡെവലെപ്‌മെന്‍റുമായി ചർച്ച നടത്താനും കെ റെയിൽ പദ്ധതിയെ ഗൗരവത്തോടെ സമീപിക്കാനുമാണ് കേന്ദ്ര റെയിൽവേ ബോർഡിന്‍റെ നിർദേശം. 2020 ജൂൺ 24 നാണ് കേരള സർക്കാർ കെ റെയിലുമായി ബന്ധപ്പെട്ട വിശദമായ പ്രൊജക്‌റ്റ് റിപ്പോർട്ട് (Detailed Project Report ) റെയിൽവേ ബോർഡിന് സമർപ്പിച്ചത്. എന്നാൽ, 63,940.67 കോടി രൂപയുടെ പദ്ധതിച്ചെലവ് സംബന്ധിച്ച് റെയിൽവേ ബോർഡ് ആശങ്ക പങ്കിട്ടിരുന്നു.
Also Read : അതിവേഗ റെയിൽ : 'ഇ ശ്രീധരന്‍റെ നിർദേശത്തിൽ എല്ലാ വശവും പരിശോധിക്കണം' ; തിടുക്കം വേണ്ടെന്ന് സിപിഎം
പദ്ധതിച്ചെലവിലെ ആശങ്ക : 1.26 ലക്ഷം കോടി രൂപ എങ്കിലും മുഴുവൻ പദ്ധതി ചെലവായി വിലയിരുത്തണമെന്നായിരുന്നു നിതി അയോഗിന്‍റെ കണക്കുകൂട്ടൽ. ഇതിൽ ബോർഡ് വിശദീകരണം ആവശ്യപ്പെട്ടിരുന്നു. കെ റെയിൽ പദ്ധതിക്കായുള്ള ഭൂമി ഏറ്റെടുക്കലുമായി ബന്ധപ്പെട്ട് പ്രതിപക്ഷത്തിന്‍റേതുൾപ്പടെ വലിയ പ്രതിഷേധത്തിനായിരുന്നു കേരളം സാക്ഷ്യം വഹിച്ചത്.
