തിരുവനന്തപുരം: സർക്കാരിന്‍റെ നൂറുദിന കര്‍മ പരിപാടിക്ക് തുടക്കമായി. ജൂണ്‍ 11 മുതല്‍ സെപ്തംബര്‍ 19 വരെയുള്ള 100 ദിവസങ്ങളിൽ നടപ്പാക്കുന്ന പ്രധാന പരിപാടികൾ മുഖ്യമന്ത്രി പിണറായി വിജയൻ പ്രഖ്യാപിച്ചു. 2464.92 കോടി രൂപയുടെ പരിപാടികളാണ് കര്‍മ പദ്ധതിയിൽ ഉള്‍പ്പെട്ടിട്ടുള്ളത്.
കൊവിഡ് രണ്ടാം തരംഗത്തിന്‍റെ പ്രതിസന്ധി ഘട്ടത്തിൽ സാമ്പത്തിക വളര്‍ച്ച കൂടുതല്‍ വേഗത്തിലാക്കാനും ഗുണമേന്മയുള്ള തൊഴിലവസരങ്ങള്‍ സൃഷ്ടിക്കാനുമുള്ള നയങ്ങള്‍ക്കും പരിപാടികള്‍ക്കുമാണ് പ്രാധാന്യം നല്‍കുന്നത്. സാമ്പത്തിക, സാമൂഹിക അസമത്വങ്ങള്‍ ഇല്ലായ്മ ചെയ്യല്‍, പ്രകൃതി സൗഹൃദ വികസന പരിപ്രേക്ഷ്യം നടപ്പില്‍ വരുത്തല്‍, ആരോഗ്യകരമായ നാഗരിക ജീവിതത്തിന് അനുയോജ്യമാംവിധം ആധുനിക ഖരമാലിന്യസംസ്കരണ രീതി അവലംബിക്കല്‍ എന്നിവയ്ക്ക് അതീവ ശ്രദ്ധ നല്‍കും.
തൊഴില്‍ ഉറപ്പാക്കാൻ പദ്ധതി
20 ലക്ഷം അഭ്യസ്തവിദ്യര്‍ക്ക് തൊഴിലവസരങ്ങള്‍ പ്രദാനം ചെയ്യുന്ന സുപ്രധാന പദ്ധതിയുടെ രൂപരേഖ കെ.ഡിസ്കിന്‍റെ ആഭിമുഖ്യത്തില്‍ പൂര്‍ത്തിയാക്കും. തദ്ദേശസ്വയംഭരണ സ്ഥാപനങ്ങളുടെ തലത്തില്‍ ആയിരത്തില്‍ അഞ്ച് പേര്‍ക്ക് തൊഴിലവസരങ്ങള്‍ സൃഷ്ടിക്കാനുള്ള പദ്ധതിയുടെ കരട് തദ്ദേശ സ്വയംഭരണ സ്ഥാപനങ്ങള്‍ തയ്യാറാക്കും. വിവിധ വകുപ്പുകളുടെ കീഴില്‍ പ്രത്യക്ഷമായും പരോക്ഷമായും ഉദ്ദേശം 77,350 തൊഴിലവസരങ്ങളാണ് നൂറുദിവസത്തിനുള്ളില്‍ സൃഷ്ടിക്കുന്നത്.
മറ്റ് പദ്ധതികള്‍
945 കോടി രൂപയുടെ റോഡ് പദ്ധതികളും പ്രഖ്യാപിച്ചു. 12000 പട്ടയങ്ങൾ വിതരണം ചെയ്യും. തീരദേശ ഷിപ്പിംഗ് സർവീസ് വിപുലീകരിക്കും. സുഭിക്ഷ കേരളം പദ്ധതിയുടെ ഭാഗമായി 250 പഞ്ചായത്തുകളിൽ മത്സ്യകൃഷി ആരംഭിക്കും.
കൊച്ചിയിൽ ഇന്‍റഗ്രേറ്റഡ് സ്റ്റാർട്ടപ്പ് തുടങ്ങാനും പദ്ധതിയുണ്ട്. കൊച്ചി-പാലക്കാട് റെയിൽ പൈപ്പ് ലൈൻ ഉദ്ഘാടനം ചെയ്യും. നിയമനങ്ങൾ പിഎസ്‌സിക്ക് വിടുന്ന സ്ഥാപനങ്ങൾക്ക് സ്പെഷ്യൽ റൂൾ നിർമ്മിക്കും. യുവ സംരംഭകർക്കായി 25 സഹകരണ സംഘങ്ങൾ ആരംഭിക്കും.
പ്രവാസികൾക്ക് 100 കോടിയുടെ വായ്പാ സഹായം നൽകും. കൊവിഡിന്‍റെ സാമ്പത്തിക പ്രത്യാഘാതങ്ങൾ അനുഭവിക്കുന്ന ദുർബല വിഭാഗങ്ങക്ക് 200 കോടിയുടെ സാമ്പത്തിക സഹായം നൽകും. പദ്ധതികൾ നടപ്പാക്കുന്നതിന്‍റെ പുരോഗതി കൃത്യമായി അറിയിക്കുമെന്നും മുഖ്യമന്ത്രി വ്യക്തമാക്കി.
