തിരുവനന്തപുരം: മുസ്‌ലിം വിരുദ്ധ പ്രസംഗത്തിന്‍റെ പേരില്‍ പൊലീസ് കസ്റ്റഡിയിലെടുത്ത പി.സി ജോർജിനെതിരെ ചുമത്തിയിരിക്കുന്നത് ജാമ്യമില്ല വകുപ്പുകള്‍. ഐപിസി 153(എ) വകുപ്പ് പ്രകാരമാണ് കേസെടുത്തിരിക്കുന്നത്. മതവികാരം വ്രണപ്പെടുത്തുന്നത് തടയുന്നതിനെതിരാണ് ഈ വകുപ്പ്.
വാക്കുകള്‍, ചിഹ്നങ്ങള്‍, ചിത്രങ്ങള്‍, അത്തരം സൂചനകള്‍ എന്നിവയിലൂടെ സമൂഹത്തിലെ വിവിധ ജാതി-മത-ഭാഷ വിഭാഗങ്ങള്‍ക്കിടയില്‍ പൊരുത്തക്കേട് സൃഷ്‌ടിക്കുക, സാമൂഹിക ഐക്യവും സമാധാനവും നശിപ്പിക്കുക, ഒരു പ്രത്യേക മതവിഭാഗത്തിലെ സായുധ സംഘത്തെ മനഃപൂര്‍വം സംഘര്‍ഷം സൃഷ്‌ടിക്കാനായി ഒരുക്കി നിര്‍ത്തുക - മേല്‍പ്പറഞ്ഞ മൂന്ന് കാര്യങ്ങളും ഐപിസി 153(എ) പ്രകാരം കുറ്റകരമാണ്.
വകുപ്പ് പ്രകാരം കുറ്റക്കാരനെന്ന് കണ്ടെത്തിയ വ്യക്തിയെ മൂന്ന് വര്‍ഷം വരെ ശിക്ഷിക്കാം. ഒരു മതകേന്ദ്രത്തില്‍ വച്ചാണ് മേല്‍പറഞ്ഞ മൂന്ന് കാര്യങ്ങളിലേതെങ്കിലുമൊന്ന് നടക്കുന്നതെങ്കില്‍ ജയില്‍ ശിക്ഷ അഞ്ച് വര്‍ഷം വരെയാകാം. ഇത് കൂടാതെ 295(എ) വകുപ്പ് കൂടി ജോര്‍ജിനെതിരെ ചുമത്തും.
READ MORE: മത വിദ്വേഷ പ്രസംഗം: പി.സി ജോർജ് പൊലീസ് കസ്റ്റഡിയില്‍
ഏതെങ്കിലും മതചിഹ്നത്തെയോ, വിശുദ്ധമായി കാണുന്ന മതകാര്യങ്ങളെയോ, മനഃപൂര്‍വം അവഹേളിക്കുകയോ, നശിപ്പിക്കുകയോ, കളങ്കം വരുത്തുകയോ ചെയ്യുന്നത് സെക്ഷന്‍ 295 പ്രകാരം കുറ്റകരമാണ്. കുറ്റം ചെയ്യുന്ന വ്യക്തിക്ക് രണ്ട് വര്‍ഷം വരെ തടവ് ശിക്ഷയോ, പിഴയോ, തടവും പിഴയും ഒന്നിച്ചോ ലഭിക്കും. വാക്കുകള്‍, പ്രവൃത്തികള്‍ എന്നിവകൊണ്ട് ഒരു മതത്തെയോ, മതവികാരത്തെയോ വൃണപ്പെടുത്തുന്നത് സെക്ഷന്‍ 295(എ) പ്രകാരം കുറ്റകരമാണ്.
അത്തരം വ്യക്തികള്‍ക്ക് മൂന്ന് വര്‍ഷം വരെ തടവ് ശിക്ഷയോ, പിഴയോ, തടവും പിഴയും ഒന്നിച്ചോ ലഭിക്കാവുന്ന കുറ്റമാണ്. 153(എ), 295 എന്നീ രണ്ട് വകുപ്പുകളും ജാമ്യമില്ലാ വകുപ്പുകളാണ്. എ.ആര്‍.ക്യാംപില്‍ എത്തിച്ച പി.സി ജോർജിനെ പൊലീസ് പ്രാഥമികമായി ചോദ്യം ചെയ്യും. തുടര്‍ന്ന് കോടിയില്‍ ഹാജരാക്കും. ഇന്ന് കോടതി അവധിയായതിനാല്‍ ഓണ്‍ലൈനായി കോടതിയില്‍ ഹാജരാക്കാനാണ് സാധ്യത.
