തിരുവനന്തപുരം: 64-ാമത് സംസ്ഥാന സ്‌കൂൾ കായിക മേളയ്ക്ക് കൊടിയിറങ്ങുമ്പോൾ ചാമ്പ്യൻപട്ടം നിലനിർത്തി പാലക്കാട് ജില്ല. 32 സ്വർണവും 21 വെള്ളിയും 18 വെങ്കലവുമടക്കം 269 പോയിന്‍റുകളുമായാണ് പാലക്കാട് ഒന്നാം സ്ഥാനത്ത് എത്തിയത്. 13 സ്വർണവും 17 വെള്ളിയും 14 വെങ്കലവുമടക്കം 149 പോയിന്‍റുകളുമായി മലപ്പുറം ജില്ലയാണ് രണ്ടാം സ്ഥാനത്ത്.
എട്ട് സ്വർണവും 16 വെള്ളിയും 16 വെങ്കലവുമായി 112 പോയിന്‍റുകളോടെ കോഴിക്കോട് ജില്ല മൂന്നാം സ്ഥാനത്ത് എത്തി. മലപ്പുറം ഐഡിയൽ ഇഎച്ച്എസ്എസ് കടക്കാശ്ശേരിയാണ് ഒന്നാം സ്ഥാനത്ത് എത്തിയ സ്‌കൂള്‍. ഏഴ് സ്വർണവും ഒമ്പത് വെള്ളിയും നാല് വെങ്കലവുമടക്കം 66 പോയിന്‍റാണ് ഐഡിയല്‍ നേടിയത്.
പാലക്കാട് ജില്ലയിലെ കെഎച്ച്എസ് കുമരംപുത്തൂരാണ് ഏഴ് സ്വർണവും ആറ് വെള്ളിയും ഒരു വെങ്കലവുമായി രണ്ടാം സ്ഥാനത്ത്. കോഴിക്കോട് ജില്ലയിലെ സെന്‍റ് ജോസഫ്‌സ് എച്ച് എസ് പുല്ലൂരാംമ്പാറ മൂന്ന് സ്വർണവും ആറ് വെള്ളിയും ഒമ്പത് വെങ്കലവുമായി മൂന്നാം സ്ഥാനത്താണ്.
കഴിഞ്ഞ കായികോത്സവത്തിൽ രണ്ടാം സ്ഥാനത്തായിരുന്ന എറണാകുളം ഇത്തവണ അഞ്ചാമതാണ്. സ്‌കൂൾ തലത്തിൽ ഒന്നാം സ്ഥാനത്തായിരുന്ന മാർ ബേസിൽ ഇത്തവണ അഞ്ചാം സ്ഥാനത്തേക്ക് പിന്തള്ളപ്പെട്ടു.
