തിരുവനന്തപുരം: തൃക്കാക്കരയിലേത് കെ റെയിലെനിതിരായ ജനവിധിയായി കണക്കാക്കേണ്ടെന്ന് മന്ത്രി പി രാജീവ്. എല്‍.ഡി.എഫിന് കടുപ്പമേറിയ മണ്ഡലമാണ് തൃക്കാക്കര. എന്നാല്‍ ഇത്തവണ വോട്ട് വര്‍ധിപ്പിക്കാന്‍ കഴിഞ്ഞിട്ടുണ്ടെന്നും അദ്ദേഹം പറഞ്ഞു.
പ്രചാരണത്തിലും സ്ഥാനാര്‍ഥി നിര്‍ണയത്തിലും ഒരു വീഴ്‌ചയും ഉണ്ടായിട്ടില്ല. ജോ ജോസഫ് സഭയുടെ സ്ഥാനാര്‍ഥിയെന്ന് പ്രചരിപ്പിച്ചത് മാധ്യമങ്ങളാണ്. പരാജയത്തിന്‍റെ കാരണം പാര്‍ട്ടി സൂക്ഷ്‌മമായി വിലയിരുത്തും. എതിരായ വോട്ടുകള്‍ ഏകോപിച്ചാണ് യു.ഡി.എഫ് വിജയം നേടിയത്.
ALSO READ | പിടിയുടെ പ്രിയതമ, തൃക്കാക്കരയുടെ പ്രിയങ്കരി
ബി.ജെ.പി വോട്ടുകള്‍ മൂന്ന് ശതമാനം കുറഞ്ഞിട്ടുണ്ട്. ജനവിധി അംഗീകരിച്ച് മുന്നോട്ട് പോകും. ഒരു തെരഞ്ഞെടുപ്പ് കൊണ്ട് എല്ലാം അവസാനിക്കുന്നതായി കരുതുന്നില്ല. എറണാകുളം ജില്ലയില്‍ ഇടതുമുന്നണിക്ക് മുന്നേറ്റമുണ്ടാകാത്തത് എന്തുകൊണ്ടാണെന്ന് പരിശോധിക്കുമെന്നും പി രാജീവ് പ്രതികരിച്ചു.
