തിരുവനന്തപുരം : ജന്മനാടും മണ്ഡലവുമായ പുതുപ്പള്ളിയിൽ സ്വന്തമായി ഒരു വീട് എന്ന സ്വപ്‌നം പൂർത്തിയാക്കാതെ ഉമ്മൻ ചാണ്ടി വിടവാങ്ങി. പുതുപ്പള്ളിയിലെ പുതിയ വീടിന്‍റെ പണി പാതിവഴിയിലായിരിക്കുമ്പോഴാണ് രോഗത്തെ തുടർന്ന് ഉമ്മൻ ചാണ്ടി ബെംഗളൂരുവിലേയ്‌ക്ക് ചികിത്സയ്‌ക്കായി പോയത്. തറവാടുവീടായ കരോട്ട് വള്ളക്കാലിലായിരുന്നു ഉമ്മന്‍ചാണ്ടിയും കുടുംബവും ഇത്രയുംകാലം കഴിഞ്ഞിരുന്നത്. പുതുപ്പള്ളി പഞ്ചായത്തിന് സമീപത്ത് 2021 ലാണ് പുതിയ വീടിന്‍റെ പണി തുടങ്ങിയത്.
തന്‍റെ നാടിനോട് അദ്ദേഹത്തിനുള്ള സ്‌നേഹം എത്രത്തോളം ഉണ്ട് എന്നറിയാൻ തിരുവനന്തപുരത്തെ അദ്ദേഹത്തിന്‍റെ വീട്ടുപേര് തന്നെ ധാരാളമാണ്. മണ്ഡലത്തിന്‍റെ പേരായ 'പുതുപ്പള്ളി' എന്നാണ് അദ്ദേഹം വീടിന് പേരിട്ടത്. പുതുപ്പള്ളിയിൽ സ്വന്തമായി ഒരു വീട് വേണമെന്നായിരുന്നു അദ്ദേഹത്തിന്‍റെ ഏറ്റവും വലിയ ആഗ്രഹം.
ഇതിനായി കഴിഞ്ഞ 2021 ൽ കുടുംബവിഹിതത്തിൽ നിന്ന് ലഭിച്ച സ്ഥലത്ത് അദ്ദേഹം വീട് പണി ആരംഭിച്ചു. എന്നാൽ പിന്നീട് വില്ലനായി എത്തിയ അനാരോഗ്യം കാരണം വീടിന്‍റെ പണി മന്ദഗതിയിലായി. വീട് പണിയുമായി ബന്ധപ്പെട്ട് തറകെട്ടി, ബീം വാർത്തതിനുപിന്നാലെ അദ്ദേഹത്തിന്‍റെ രോഗം മൂർച്ഛിച്ചു. ഇതോടെ ചികിത്സയ്‌ക്കായി അദ്ദേഹം ബാംഗ്ലൂരിലേക്ക് പോയതോടെ താത്‌കാലികമായി വീട് പണി നിർത്തി. തന്‍റെ സ്വപ്‌നമായ പുതുപ്പള്ളിയിലെ പുതിയ വീടിന്‍റെ പണിപൂർത്തിയാക്കും മുൻപാണ് മുൻ മുഖ്യമന്ത്രി ഉമ്മൻചാണ്ടി വിട പറഞ്ഞത്. തങ്ങളുടെ പ്രിയപ്പെട്ട ഉമ്മൻചാണ്ടി സാറിന്‍റെ ഏറ്റവും വലിയ ആഗ്രഹം പാതിവഴിക്ക് ഉപേക്ഷിക്കേണ്ടി വന്നത് പുതുപ്പള്ളി നിവാസികൾക്ക് വിങ്ങലായി.
കേരളത്തിന്‍റെ പ്രിയ രാഷ്‌ട്രീയ നേതാവും മുൻ മുഖ്യമന്ത്രിയുമായ ഉമ്മൻ ചാണ്ടി ഇന്ന് പുലർച്ചെയാണ് അന്തരിച്ചത്. ക്യാന്‍സര്‍ രോഗത്തെ തുടർന്ന് ബെംഗളൂരുവിൽ ചികിത്സയിൽ കഴിയവെ ഇന്നലെ ആരോഗ്യനില വഷളാവുകയും ഇന്ന് മരണപ്പെടുകയുമായിരുന്നു. കേരള രാഷ്‌ട്രീയത്തിലെ പകരം വയ്‌ക്കാനാകാത്ത ജനനായകന് രാഷ്‌ട്രീയ - സാംസ്‌കാരിക മേഖലകളിലെ നിരവധി പ്രമുഖർ ഇതിനകം അന്ത്യോപചാരം അർപ്പിച്ചു. പുതുപ്പള്ളിയിൽ നിന്ന് 53 വർഷം തുടർച്ചയായി വിജയിച്ച കോൺഗ്രസ് നേതാവാണ് അദ്ദേഹം. രണ്ട് തവണ കേരള മുഖ്യമന്ത്രിയായി.
ജനസമ്പർക്ക പരിപാടിയിലൂടെ ജനഹൃദയങ്ങളിലേയ്‌ക്ക് ഇറങ്ങി ചെന്ന നേതാവിന്‍റെ വിയോഗം വിങ്ങലോടെയാണ് കേരളജനത സ്വീകരിച്ചത്. നിലവിൽ ഉച്ചയോടെ ബെംഗളൂരുവിൽ നിന്ന് തിരുവനന്തപുരത്തെത്തിച്ച ഉമ്മൻ ചാണ്ടിയുടെ മൃതദേഹം ജഗതിയിലെ പുതുപ്പള്ളി ഹൗസിലേക്ക് കൊണ്ടുപോയി. സംസ്‌കാരം ജൂലൈ 20ന് പുതുപ്പള്ളി സെന്‍റ് ജോർജ് വലിയ പള്ളിയിൽ നടക്കും.
