തിരുവനന്തപുരം: മുതലപ്പൊഴിയില്‍ മന്ത്രിമാര്‍ക്കെതിരായ പ്രതിഷേധത്തില്‍ ലത്തീന്‍ രൂപത വികാരി ജനറല്‍ യൂജിന്‍ പെരേരയ്‌ക്കെതിരെ കേസടുത്ത സര്‍ക്കാര്‍ നടപടി തീരദേശ ജനതയോടുള്ള സര്‍ക്കാരിന്‍റെ വെല്ലുവിളിയാണെന്ന് പ്രതിപക്ഷ നേതാവ് വിഡി സതീശന്‍. മന്ത്രിമാരാണ് ഇന്നലെ അവിടെ ചെന്ന് പ്രകോപനമുണ്ടാക്കിയത്. മുതലപ്പൊഴി മരണപ്പൊഴിയാണെന്നും അതില്‍ നിന്ന് ജനങ്ങളെ രക്ഷിക്കണമെന്നും പ്രതിപക്ഷം നിയമസഭയില്‍ അടിയന്തര പ്രമേയ നോട്ടിസിലൂടെ ആവശ്യപ്പെട്ടിരുന്നെന്നും അദ്ദേഹം ചൂണ്ടിക്കാട്ടി.
അടിയന്തര പ്രമേയ നോട്ടിസില്‍ മറുപടി പറഞ്ഞ മന്ത്രി സജി ചെറിയാന്‍ ഇക്കാര്യത്തില്‍ പെട്ടന്നുതന്നെ നടപടി സ്വീകരിക്കുമെന്ന് ഉറപ്പ് നല്‍കിയിരുന്നു. എന്നാല്‍, മുതലപ്പൊഴിയുടെ കാര്യത്തില്‍ സര്‍ക്കാര്‍ ഇതുവരെ ചെറുവിരലനക്കാന്‍ തയ്യാറാകാത്തത് ദൗര്‍ഭാഗ്യകരമാണ്. മുതലപ്പൊഴിയില്‍ ഇന്നലെ ഒരു മത്സ്യത്തൊഴിലാളി മരണമടയുകയും നാലുപേരെ കാണാതാകുകയും ചെയ്‌തത് അവിടെ തുടര്‍ച്ചയായി നടക്കുന്ന സംഭവങ്ങളുടെ തുടര്‍ച്ചയാണെന്നും വിഡി സതീശന്‍ ചൂണ്ടിക്കാട്ടി.
'മന്ത്രിമാര്‍ പ്രകോപനപരമായി സംസാരിച്ചു': 60ല്‍ അധികം പേര്‍ ഇതിനകം മുതലപ്പൊഴിയില്‍ സര്‍ക്കാര്‍ അനാസ്ഥമൂലം കൊലചെയ്യപ്പെട്ടു. തീരദേശ ജനത മുഖ്യമന്ത്രിമാരോടും ജനപ്രതിനിധികളോടും ഇതിന് മുന്‍പും വൈകാരികമായി പ്രതികരിച്ചിട്ടുണ്ട്. അതിന്‍റെ പേരില്‍ മന്ത്രിമാര്‍തന്നെ പ്രകോപനപരമായി സംസാരിക്കുകയും വികാരി ജനറലിനെതിരെ കലാപാഹ്വാനത്തിന് കേസെടുക്കുകയും ചെയ്‌തത് അങ്ങേയറ്റം പ്രതിഷേധാര്‍ഹമാണ്.
മാത്രമല്ല, വിഴിഞ്ഞം സമരത്തെ ഇതുമായി കൂട്ടിച്ചേര്‍ക്കാന്‍ ശ്രമിച്ചതും അങ്ങേയറ്റം ദൗര്‍ഭാഗ്യകരമാണ്. 140 ദിവസത്തെ വിഴിഞ്ഞം സമരം പരാജയപ്പെട്ടതിലുളള വിരോധം തീര്‍ക്കാനാണ് മന്ത്രിമാരെ തടഞ്ഞതെന്ന പ്രസ്‌താവനയും പ്രതിഷേധാര്‍ഹമാണ്. തീരജനതയുടെ ആവശ്യങ്ങളുന്നയിച്ച് നടത്തിയ സമരം പരാജയപ്പെട്ടെന്ന മന്ത്രിമാരുടെ പ്രഖ്യാപനവും തീരദേശ ജനതയോടുള്ള വെല്ലുവിളിയാണ്.
തീരദേശത്തുള്ള ജനങ്ങളെ ശത്രുക്കളെ പോലെ കാണുന്ന സമീപനമാണ് ഈ സര്‍ക്കാരിനുള്ളത്. വിഴിഞ്ഞം സമരത്തിന്‍റെ പേരില്‍ ആര്‍ച്ച് ബിഷപ്പിനെതിരെ എടുത്ത കേസുപോലും ഇതുവരെ പിന്‍വലിച്ചിട്ടില്ല. മുതലപ്പൊഴി വീണ്ടും മരണപ്പൊഴിയായി മാറ്റിയിരിക്കുന്നത് സര്‍ക്കാരാണ്. ഈ ഉത്തരവാദിത്തത്തില്‍ നിന്ന് സര്‍ക്കാരിന് ഒഴിഞ്ഞുമാറാനാകില്ല. കേസ് പിന്‍വലിക്കണം, മന്ത്രി ശിവന്‍കുട്ടി ലത്തീന്‍ സഭയോടു മാപ്പ് പറണമെന്നും വിഡി സതീശന്‍ പറഞ്ഞു.
'സര്‍ക്കാര്‍ നടപടി അംഗീകരിക്കാനാകില്ല'; രമേശ് ചെന്നിത്തല: മുതലപ്പൊഴി സന്ദര്‍ശിച്ച മന്ത്രിമാര്‍ക്കെതിരെ തീരദേശ ജനത പ്രതിഷേധിച്ചതിന്‍റെ പേരില്‍ ലത്തീന്‍ അതിരൂപത വികാരി ജനറല്‍ ഫാദര്‍ യൂജിന്‍ പെരേരയ്‌ക്കെതിരെ കേസെടുത്ത സര്‍ക്കാര്‍ നടപടി അംഗീകരിക്കാനാകില്ലെന്ന് മുന്‍ പ്രതിപക്ഷ നേതാവ് രമേശ് ചെന്നിത്തല. നടപടി സര്‍ക്കാര്‍ അടിയന്തരമായി പിന്‍വലിക്കണം. മന്ത്രിമാരാണ് അവിടെ പ്രകോപനം ഉണ്ടാക്കിയതെന്നും ചെന്നിത്തല ആരോപിച്ചു.
വിദ്യാഭ്യാസമന്ത്രിക്ക് നിരക്കുന്ന രീതിയിലല്ല അവിടെ ശിവന്‍കുട്ടി പ്രതികരിച്ചത്. അത്തരം പരമാര്‍ശങ്ങള്‍ ഒരു വിദ്യാഭ്യാസ മന്ത്രിക്കും ചേര്‍ന്നതല്ല. തീരദേശ ജനതയ്‌ക്കെതിരെ മന്ത്രി നടത്തിയ പരാമര്‍ശങ്ങള്‍ അംഗീകരിക്കാനാകില്ല. മന്ത്രി പരാമര്‍ശങ്ങള്‍ പിന്‍വലിച്ച് ലത്തീന്‍ സഭയോട് മാപ്പ് പറയണം. മുന്‍പും ജനപ്രതിനിധികളെ തീരദേശ ജനത തടഞ്ഞ സംഭവം ഉണ്ടായിട്ടുണ്ടെന്നും ചെന്നിത്തല പറഞ്ഞു.
