തിരുവനന്തപുരം: മുതലപ്പൊഴിയിൽ നാളെ(ഓഗസ്റ്റ്‌ 1) രാവിലെ ലോങ് ബൂം ക്രെയിൻ എത്തിച്ച് പാറകൾ മാറ്റാൻ അദാനി ഗ്രൂപ്പ്‌ ഉറപ്പ് നൽകിയതായി മന്ത്രി സജി ചെറിയാൻ. എക്‌സ്‌കവേട്ടേഴ്‌സ് എത്തിച്ച് മണൽ മാറ്റും. ഡ്രെഡ്‌ജർ എത്തിക്കാൻ കാലാവസ്ഥയുടെ പ്രശ്‌നങ്ങൾ നേരിടുന്നുവെന്ന് അദാനി ഗ്രൂപ്പിന്‍റെ പ്രതിനിധികൾ നേരത്തെ അറിയിച്ചിരുന്നു. എന്നാൽ കാലാവസ്ഥ അനുകൂലമാകുന്നത് പരിഗണിച്ച് രണ്ട് മൂന്ന് ദിവസത്തിനുള്ളിൽ അടിയന്തരമായി ഡ്രെഡ്‌ജർ സ്ഥലത്ത് എത്തിച്ച് ഡ്രെഡ്‌ജിങ് പണികൾ ആരംഭിക്കുമെന്ന് മന്ത്രി സജി ചെറിയാൻ അറിയിച്ചു.
ഡ്രെഡ്‌ജർ എത്തിച്ചാൽ യുദ്ധകാലാടിസ്ഥാനത്തിൽ മണൽ നീക്കം ആരംഭിക്കും. ഹാർബറിങ് വിഭാഗത്തിന്‍റെ പൂർണമായ സാന്നിധ്യം ഇതിനായി മുതലപ്പൊഴിയിൽ വരും ദിവസങ്ങളിൽ ഉണ്ടാകും. മുതലപ്പൊഴിയിൽ അപകട സാഹചര്യത്തിൽ അടിയന്തര സേവനത്തിനായി 24 മണിക്കൂറും 8 മണിക്കൂർ ഷിഫ്റ്റിൽ 10 പേരെ വീതം നിയോഗിക്കും.
മത്സ്യത്തൊഴിലാളി വിഭാഗത്തിൽ നിന്ന് തന്നെ മുങ്ങൽ വിദഗ്‌ധരായ 30 പേരെ ഇതിനായി നിയോഗിക്കും. 6 ഹൈമാസ് ലൈറ്റ് അടിയന്തരമായി മുതലപൊഴിയിൽ സ്ഥാപിക്കും. അപകടമുണ്ടായാൽ റെസ്‌ക്യു പ്രവർത്തനങ്ങൾക്കായി 3 ബോട്ടിന്‍റെയും ആംബുലൻസിന്‍റെയും സേവനം 24 മണിക്കൂർ ലഭ്യമാക്കും.
പൊഴിയിലേക്ക് പോകുന്ന റോഡ് അടിയന്തരമായി പണികൾ പൂർത്തിയാക്കുമെന്ന് അറിയിച്ച മന്ത്രി ഇത് പൂർത്തിയാക്കിയില്ലെങ്കിൽ ശക്തമായ നടപടി സ്വീകരിക്കുമെന്ന് സർക്കാർ അദാനി ഗ്രൂപ്പ്‌ പ്രതിനിധികളെ അറിയിച്ചതായും വ്യക്തമാക്കി. മത്സ്യത്തൊഴിലാളി പ്രതിനിധികളും ട്രേഡ് യൂണിയൻ നേതാക്കളുമായി നടത്തിയ ചർച്ചയിൽ മുതലപ്പൊഴി അടയ്‌ക്കണം എന്നാണ് സർക്കാർ ആവശ്യപ്പെട്ടത്.
എന്നാൽ അടയ്‌ക്കണ്ട എന്ന നിലപാടാണ് ചർച്ചയിൽ ഉയർന്നത്. ഈ പശ്ചാത്തലത്തിൽ അടിയന്തര സ്വഭാവത്തിൽ സാൻഡ് ബൈപാസിങ് മുതലപ്പൊഴിയിൽ നടത്തും. വാഹനത്തിൽ അവിടെ നിന്നും മണ്ണ് മാറ്റുന്ന സാൻഡ് ബൈപാസിനായി 1 കോടി രൂപ അനുവദിച്ചു.
സി.ഡബ്ല്യൂ.പി.ആർ.എസിന്‍റെ മുതലപ്പൊഴിയെ കുറിച്ചുള്ള പഠന റിപ്പോർട്ട് ഡിസംബറിൽ ലഭിക്കും. റിപ്പോർട്ടിന്‍റെ അടിസ്ഥാനത്തിൽ നിർമാണത്തിലെ അപാകതമാണ് അപകടങ്ങൾക്ക് കാരണമെങ്കിൽ അടിയന്തര നടപടികൾ സ്വീകരിക്കും. മുതലപ്പൊഴിയിൽ അപകടത്തിൽ ജീവഹാനി സംഭവിച്ചവരുടെ കുടുംബങ്ങൾക്ക് സഹായം നൽകാനും മത്സ്യത്തൊഴിലാളികൾ മുന്നോട്ടുവെച്ച വിവിധ നിർദേശങ്ങൾ പരിഗണിക്കുമെന്നും മന്ത്രി അറിയിച്ചു.
അപകടരഹിതമായ ഹാർബറാക്കി മുതലപ്പൊഴിയെ മാറ്റാനുള്ള നടപടികൾ സ്വീകരിക്കുമെന്നും മന്ത്രി അറിയിച്ചു. ഇതിന്‍റെ ഭാഗമായി അദാനി ഗ്രൂപ്പിന് സർക്കാർ കർശന നിർദേശം നൽകിയിട്ടുണ്ടെന്നും നിർദേശങ്ങൾ നടപ്പാക്കാത്ത പക്ഷം സർക്കാർ ശക്തമായ നിലപാട് സ്വീകരിക്കുമെന്ന് അദാനി ഗ്രൂപ്പിനെ അറിയിച്ചിട്ടുണ്ടെന്നും മന്ത്രി വ്യക്തമാക്കി.
മുതലപ്പൊഴിയിൽ ഇന്നും ഇന്നലെയും ആയി വള്ളം മറിഞ്ഞ് അപകടം നടന്നിരുന്നു. ഇന്നലെ നടന്ന അപകടത്തിൽ പരിക്കേറ്റ രണ്ട് പേരുടെ നില ഗുരുതരമായി തുടരുകയാണ്. മുതലപ്പൊഴിയിൽ കാലങ്ങളായി നടന്നു വരുന്ന അപകടം ഹാർബറിന്‍റെ അശാസ്ത്രീയ നിർമാണം മൂലമാണെന്ന ആക്ഷേപം ഉയരാൻ തുടങ്ങിയിട്ട് ഏറെ നാളുകളായി. സ്ഥലത്ത് പല ഏജൻസികളും കാലങ്ങളായി നടത്തിയ പഠനങ്ങളിലും ഹാർബറിന്‍റെ അശാസ്ത്രീയ നിർമാണത്തെ കുറിച്ച് പരാമർശങ്ങളുണ്ട്.
