പ്രധാനമന്ത്രി ഇന്ന് കേരളത്തിൽ

തെരഞ്ഞെടുപ്പ് പ്രചാരണത്തിനായി ഇത് രണ്ടാം തവണയാണ് പ്രധാനമന്ത്രി നരേന്ദ്ര മോദി കേരളത്തിൽ എത്തുന്നത്

തിരുവനന്തപുരം: തെരഞ്ഞെടുപ്പ് പ്രചാരണത്തിനായി പ്രധാനമന്ത്രി നരേന്ദ്രമോദി ഇന്ന് തലസ്ഥാനത്തെത്തും. വൈകിട്ട് തിരുവനന്തപുരത്ത് നടക്കുന്ന റാലിയിൽ പ്രധാനമന്ത്രി പ്രസംഗിക്കും. തെക്കൻ ജില്ലകളിൽനിന്നുള്ള സ്ഥാനാർഥികളും പ്രവർത്തകരും യോഗത്തിൽ പങ്കെടുക്കും. സെൻട്രൽ സ്റ്റേഡിയത്തിലാണ് പരിപാടി.

തെരഞ്ഞെടുപ്പ് പ്രചാരണത്തിനായി ഇത് രണ്ടാം തവണയാണ് പ്രധാനമന്ത്രി കേരളത്തിൽ എത്തുന്നത്. ബിജെപി വിജയപ്രതീക്ഷ വച്ചുപുലർത്തുന്ന തിരുവനന്തപുരം മണ്ഡലത്തിൽ പ്രചാരണത്തിനായി പ്രധാനമന്ത്രി നരേന്ദ്രമോദി തന്നെ എത്തുന്നത് വലിയ രീതിയിൽ ഗുണംചെയ്യുമെന്ന പ്രതീക്ഷയിലാണ് നേതൃത്വം. കൂടുതൽ പ്രവർത്തകരെ പങ്കെടുപ്പിച്ചുറാലി വൻ വിജയമാക്കാനും ബിജെപി ലക്ഷ്യമിടുന്നുണ്ട്.

അതേസമയം രാഹുൽഗാന്ധിക്ക് പിന്നാലെ കൂടുതൽ ദേശീയ നേതാക്കളെ ഇറക്കി സംസ്ഥാനത്ത് പ്രചാരണം കൊഴിപ്പിക്കുകയാണ് യുഡിഎഫും. രാജ്യസഭാ പ്രതിപക്ഷ നേതാവ് ഗുലാം നബി ആസാദും മുൻ ഇന്ത്യൻ ക്രിക്കറ്റ് താരവും പഞ്ചാബ് മന്ത്രിസഭാ അംഗവുമായ നവജ്യോത് സിങ് സിദ്ദുവും ഇന്ന് വിവിധ മണ്ഡലങ്ങളിൽ പ്രചാരണത്തിന് ഇറങ്ങും. എറണാകുളം തൃശ്ശൂർ മലപ്പുറം പാലക്കാട് കോഴിക്കോട് കണ്ണൂർ വയനാട് മണ്ഡലങ്ങളിലെ വിവിധ തെരഞ്ഞെടുപ്പ് യോഗങ്ങളിൽ ഗുലാം നബി ആസാദ് പങ്കെടുക്കും. കോഴിക്കോട് വടകര വയനാട് മണ്ഡലങ്ങളിലാണ് നവജ്യോത് സിങ് സിദ്ദുവിന്റെ പര്യടനം.