തിരുവനന്തപുരം: യുഡിഎഫ് കൺവീനറായി എംഎം ഹസനെ നിയോഗിച്ചതായി പ്രതിപക്ഷ നേതാവ് രമേശ് ചെന്നിത്തല അറിയിച്ചു. രണ്ടുവർഷം യുഡിഎഫ് കൺവീനറായിരുന്ന ബെന്നി ബഹനാൻ രാജിവെച്ച ഒഴിവിലേക്കാണ് എംഎം ഹസനെ നിയോഗിച്ചത്. ഘടകകക്ഷികളുമായി ആലോചിച്ചാണ് തീരുമാനമെന്ന് ചെന്നിത്തല പറഞ്ഞു.
കെപിസിസി പ്രസിഡന്‍റും പ്രവാസികാര്യമന്ത്രിയുമായി സേവനമനുഷ്ഠിച്ചിട്ടുള്ള എംഎം ഹസൻ മൂന്നുപതിറ്റാണ്ടായി യുഡിഎഫ് ഉന്നതാധികാര സമിതി അംഗമാണ്. വലിയ ഉത്തരവാദിത്തമാണ് ഏറ്റെടുക്കുന്നതെന്ന് എംഎം ഹസൻ പറഞ്ഞു. തെരഞ്ഞെടുപ്പിന്‍റെ പശ്ചാത്തലത്തിൽ നിർണായകഘട്ടത്തിൽ കൺവീനർ സ്ഥാനം ഭാരിച്ച ഉത്തരവാദിത്തമാണെന്നും എംഎം ഹസൻ പറഞ്ഞു.
