തിരുവനന്തപുരം: സംസ്ഥാനത്തെ മെഡിക്കല്‍ വിദ്യാഭ്യാസ വകുപ്പിന് കീഴിലുള്ള സര്‍ക്കാര്‍ മെഡിക്കല്‍ കോളജുകളിലേയും ഡെന്‍റൽ കോളജുകളിലേയും ഹൗസ് സർജൻമാരുടെയും പി.ജി വിദ്യാർഥികളുടെയും സ്റ്റൈപന്റ് വർധിപ്പിച്ചു.
മെഡിക്കൽ, ദന്തരോഗ വിഭാഗം ഹൗസ് സർജൻമാർക്ക് 5000 രൂപയും പി.ജി ജൂനിയർ റസിഡന്‍റുമാർക്ക് 10000 രൂപയുമാണ് വർധിപ്പിച്ചത്. മെഡിക്കല്‍, ദന്തരോഗ വിഭാഗം ഹൗസ് സര്‍ജന്‍മാര്‍ക്ക് 5,000 രൂപ വര്‍ധിപ്പിച്ച് 25,000 രൂപയാക്കി. മെഡിക്കല്‍, ദന്തരോഗ വിഭാഗം പി.ജി. ജൂനിയര്‍ റസിഡന്റുമാര്ക്ക് 10,000 രൂപയാണ് വര്‍ധിപ്പിച്ചത്. ഇതോടെ ഒന്നാം വര്‍ഷ ജൂനിയര്‍ റസിഡന്റുമാര്ക്ക് 53,000 രൂപയും രണ്ടാം വര്‍ഷ ജൂനിയര്‍ റസിഡന്റുമാര്ക്ക് 54,000 രൂപയും മൂന്നാം വര്‍ഷ ജൂനിയര്‍ റസിഡന്റുമാര്ക്ക് 55,000 രൂപയും സ്റ്റൈപന്റായി ലഭിക്കും. മെഡിക്കല്‍ പി.ജി. ഡിപ്ലോമ ജൂനിയര്‍ റസിഡന്റുമാര്ക്കും 10,000 രൂപ വര്‍ധിപ്പിച്ചപ്പോൾ ഒന്നാം വര്‍ഷ പി.ജി. ഡിപ്ലോമ ജൂനിയര്‍ റസിഡന്റുമാര്ക്ക് 53,000 രൂപയും രണ്ടാം വര്‍ഷ പി.ജി. ഡിപ്ലോമ ജൂനിയര്‍ റസിഡന്റുമാര്ക്ക് 54,000 രൂപയും ലഭ്യമാകും.
മെഡിക്കല്‍ സൂപ്പര്‍ സ്‌പെഷ്യാലിറ്റി പി.ജി. ഒന്നാം വര്‍ഷ സീനിയര്‍ റസിഡന്റുമാര്ക്ക് 16,000 രൂപ വര്‍ധിപ്പിച്ച് 63,000 രൂപയാക്കി. രണ്ടാം വര്‍ഷ സീനിയര്‍ റസിഡന്റുമാര്ക്ക് 17,000 രൂപ വര്‍ധിപ്പിച്ച് 65,000 രൂപയും മൂന്നാം വര്‍ഷ സീനിയര്‍ റസിഡന്റുമാര്ക്ക് 18,000 രൂപ വര്‍ധിപ്പിച്ച് 67,000 രൂപയുമാക്കിയിട്ടുണ്ട്.
മെഡിക്കല്‍, ദന്തരോഗ വിഭാഗങ്ങളിലെ നോണ്‍ അക്കാദമിക് വിഭാഗത്തില്‍ ബോണ്ട് വ്യവസ്ഥയിലുള്ള സീനിയര്‍ റസിഡന്റുമാരുടെ സ്റ്റൈപന്റ് 20,000 രൂപയാണ് വര്‍ധിപ്പിച്ചത്. ഇതോടെ ഇവർക്ക് 70,000 രൂപ സ്റ്റെപന്റായി ലഭ്യമാകും. 2015 നു ശേഷം ഇതാദ്യമായാണ് ആരോഗ്യ വകുപ്പ് സ്റ്റെപന്‍റ് വർധിപ്പിക്കുന്നത്.
