തിരുവനന്തപുരം: സ്വപ്‌ന സുരേഷിന്‍റെ ആരോപണങ്ങളില്‍ മുഖ്യമന്ത്രി പിണറായി വിജയന് പിന്തുണയുമായി കെ.ടി ജലീല്‍ വീണ്ടും രംഗത്ത്. സംസ്ഥാനത്തിൻ്റെ യശസ് ഇടിച്ചു താഴ്ത്താനേ ദുരാരോപണങ്ങൾ സഹായിക്കു. മുഖ്യമന്ത്രി കള്ളക്കടത്തിനു സഹായിച്ചു എന്നു പറഞ്ഞാൽ ആരും വിശ്വസിക്കില്ലെന്ന് പറഞ്ഞ ജലീല്‍ സ്വപ്‌നയുടെ ആരോപണങ്ങള്‍ യുഡിഎഫും ബി ജെ പിയും ചേർന്നു നടത്തുന്ന ഗൂഢാലോചനയുടെ ഭാഗമാണെന്നും ആരോപിച്ചു.
പൊതുപ്രവര്‍ത്തകരെ സംശയത്തിന്‍റെ നിഴലില്‍ നിര്‍ത്താതെ അന്വേഷണ ഏജന്‍സികള്‍ അന്വേഷണ റിപ്പോര്‍ട്ട് പുറത്ത് വിടണം. സ്വര്‍ണക്കടത്തുമായ അന്വേഷണം കേന്ദ്ര ഏജന്‍സികള്‍ പൂര്‍ത്തീകരിക്കാതെ പ്രശ്‌നം പരിഹരിക്കപ്പെടില്ല. സോളാർ കേസിനും അത് ബാധകമാണെന്ന് ചോദ്യത്തിനു മറുപടിയായി ജലീൽ പറഞ്ഞു.
തനിക്കെതിരെ നടന്ന അന്വേഷണങ്ങളെക്കുറിച്ചും ജലീല്‍ പറഞ്ഞു. കൂടുതല്‍ അന്വേഷണത്തിന് ഇഡിയെ സ്വാഗതം ചെയ്യുന്നു. തൻ്റെ സമ്പത്തും ധനവിനിയോഗവും ആർക്കും പരിശോധിക്കാമെന്നും അദ്ദേഹം കൂട്ടിച്ചേര്‍ത്തു.
തനിക്കെതിരെ ഒന്നും കണ്ടെത്താൻ കഴിയാത്തത് അത്ര സൂക്ഷ്മതയും സംശുദ്ധിയും ഉള്ളതുകൊണ്ടാണ്. എൻ്റെ ശമ്പളമല്ലാതെ ഒന്നും അക്കൗണ്ടിൽ ഉണ്ടായിരുന്നില്ല. മലപ്പുറത്തു നിന്നുള്ള കാക്ക ആയത് കൊണ്ട് എന്തെങ്കിലും കിട്ടും എന്നു കരുതിയാണ് പരിശോധിച്ചതെന്നും ജലീല്‍ ആരോപിച്ചു.
