തിരുവനന്തപുരം: കെഎസ്ആർടിസിയിലെ ഡീസൽ ബസുകൾ എൽഎൻജിയിലേക്ക് (ലിക്യുഫൈഡ് നാച്വറൽ ഗ്യാസ്) മാറ്റും. ഗുജറാത്ത് ആർടിസിയുടെ മാതൃകയിലാണ് ബസുകൾ എൽഎൻജിയിലേക്ക് മാറ്റുന്നത്. വഡോദരയിലെ ജിഎസ്ആർടിസിയുടെ എല്‍എന്‍ജി ബസുകള്‍ ഗതാഗത മന്ത്രി ആന്‍റണി രാജുവും സംഘവും നേരില്‍ കണ്ട് വിലയിരുത്തിലിന്‍റെ പശ്ചാത്തലത്തിലാണ് തീരുമാനം.
എൽഎൻജി ബസുകള്‍ക്ക് ശരാശരി 5.3 കിലോമീറ്റർ മൈലേജ് ഉണ്ട്. അതേസമയം കെഎസ്ആര്‍ടിസിയിലെ ഡീസല്‍ ബസുകളുടെ മൈലേജ് പരമാവധി 5 കിലോമീറ്ററാണ്. ഗെയിലും സ്വകാര്യ കമ്പനിയായ ക്രയോഗ്യാസും ചേര്‍ന്നാണ് ഗുജറാത്ത് ആര്‍ടിസിക്കായി ബസുകൾ എല്‍എന്‍ജിയാക്കി മാറ്റിയത്.
പരിശീലനത്തിനായി ഡ്രൈവർമാർ ഗുജറാത്തിലേക്ക്: നിലവിൽ പരീക്ഷണാടിസ്ഥാനത്തിൽ കെഎസ്ആർടിസിയുടെ അഞ്ച് ബസുകൾ എൽഎൻജിയിലേക്ക് മാറ്റാനാണ് മാനേജ്മെന്‍റ് ആലോചിക്കുന്നത്. ഇത് ഗ്യാസ് അതോറിറ്റി ഓഫ് ഇന്ത്യ ലിമിറ്റഡിനോട് ആവശ്യപ്പെടും. കെഎസ്ആർടിസിയിലെ 10 ഡ്രൈവർമാരെ എൽഎൻജി ബസുകളിലെ പരിശീലനത്തിനായി ഗുജറാത്തിലേക്ക് അയക്കാനും തീരുമാനിച്ചു.
ഗെയില്‍ ഉദ്യോഗസ്ഥരുമായി ഗതാഗത വകുപ്പ് ഉടനെ ചർച്ച നടത്തും. എൽഎൻജിയുടെയും, സിഎൻജിയുടെയും വില കുറയുന്നതിന് അനുസരിച്ചാവും പരിവർത്തനം നടത്തുന്നത്. ഗുജറാത്തുമായുള്ള കരാർ അനുസരിച്ച് ബസിന്‍റെ പരിവര്‍ത്തനം, ഏറ്റെടുക്കുന്ന കമ്പനി തന്നെയാണ് നടത്തുന്നത്. അതിന് ആവശ്യമായ ചെലവ് ഗെയിലാണ് വഹിക്കുന്നത്. പകരം അഞ്ച് വര്‍ഷത്തേക്ക് ഇന്ധനം ഗെയിലില്‍ നിന്ന് വാങ്ങണം.
ബസുകൾ സിഎൻജിയിലേക്കും: സമ്മർദിത പ്രകൃതി വാതകത്തിന് വില കുറഞ്ഞ സാഹചര്യത്തിൽ ഡീസൽ ബസുകൾ സിഎൻജിയിലേക്ക് മാറ്റാനും ഒരുങ്ങുകയാണ് കെഎസ്ആർടിസി. ഇത്തരത്തിൽ ഒരു ബസ് സിഎൻജിയിലേക്ക് മാറ്റുന്നതിന് അഞ്ച് ലക്ഷം രൂപയോളമാണ് ചെലവ്. പരീക്ഷണാടിസ്ഥാനത്തിൽ അഞ്ച് ബസുകൾ സിഎൻജിയിലേക്ക് മാറ്റിയിരുന്നു. ഇവ വിജയമെന്ന് കണ്ടതോടെയാണ് കൂടുതൽ ബസുകൾ സിഎൻജിയിലേക്ക് മാറ്റാൻ മാനേജ്മെന്‍റ് ആലോചിക്കുന്നത്.
ക്രമേണ 1000 ബസുകൾ സിഎൻജിയിലേക്ക് മാറ്റും. പൊതുവിപണിയിൽ കിലോയ്ക്ക് 91 രൂപ വിലയുള്ള സിഎൻജി 70 രൂപയ്ക്ക് കെഎസ്ആർടിസിക്ക് നൽകാമെന്ന് വിതരണക്കാർ അറിയിച്ചിരുന്നു. നഗരങ്ങളിലെ സമതല പ്രദേശങ്ങളിൽ സിഎൻജി ബസുകൾ ഉപയോഗിക്കും. മലയോര പ്രദേശങ്ങളിൽ സിഎൻജി ബസുകൾ പ്രായോഗികമല്ല.
കിഫ്‌ബി വായ്‌പയിൽ 400 സിഎൻജി ബസുകൾ പുതുതായി വാങ്ങാൻ തീരുമാനിച്ചിരുന്നെങ്കിലും പിന്നീട് ഇത് ഉപേക്ഷിക്കുകയായിരുന്നു. പുതിയ ബസുകൾക്കുള്ള കൂടിയ മുതൽ മുടക്കും ഇന്ധനവിലക്കയറ്റവുമാണ് പദ്ധതിക്ക് തിരിച്ചടിയായത്. അതേസമയം തലസ്ഥാനത്ത് സിറ്റി സർക്കുലർ സർവീസുകൾക്കായി വാങ്ങിയ ഇലക്‌ട്രിക് ബസുകൾ വൻ വിജയമായ സാഹചര്യത്തിൽ കെഎസ്ആർടിസി സ്വിഫ്റ്റിനായി 263 ഇലക്‌ട്രിക് ബസുകള്‍ കൂടി വാങ്ങുന്നുണ്ട്.
സിറ്റി, ജില്ലാതല സര്‍വീസുകള്‍ക്ക് ഉപയോഗിക്കാന്‍ കഴിയുന്ന ബസുകളാണ് വാങ്ങുന്നത്. നിലവിൽ 40 ഇലക്‌ട്രിക്ക് ബസുകളാണ് നഗരത്തിൽ സർവീസ് നടത്തുന്നത്. ഇനിയും 10 ബസുകൾ കൂടി ഇറങ്ങാനുണ്ട്.
ഇപ്പോൾ സർവീസ് നടത്തുന്ന ഇലക്‌ട്രിക്ക് ബസുകളുടെ ക്ഷമത വിലയിരുത്തിയ ശേഷമാണ് പുതുതായി 263 ഇലക്‌ട്രിക്ക് ബസുകൾ കൂടി വാങ്ങാൻ മാനേജ്മെന്‍റ് തീരുമാനിച്ചത്. രണ്ടാം ബാച്ചിലെ 113 ബസുകള്‍ സിറ്റി ഉപയോഗത്തിന് പറ്റിയ (ഒമ്പതുമീറ്റര്‍) നീളം കുറഞ്ഞവയാണ്. തിരുവനന്തപുരം നഗരത്തിലാകും ഇവ വിന്യസിക്കുക.
എസി ഇല്ലാത്ത ബസുകളാണ് വാങ്ങുന്നത്. എസി ഒഴിവാക്കുന്നതിനാല്‍ കൂടുതല്‍ മൈലേജ് ലഭിക്കും. 12 മീറ്റര്‍ നീളമുള്ള 150 ബസുകള്‍ക്കും ഓര്‍ഡര്‍ നല്‍കിയിട്ടുണ്ട്. മേല്‍മൂടി നീക്കം ചെയ്യാന്‍ കഴിയുന്ന ഇ-ഡബിള്‍ ഡെക്കര്‍ ബസ് വാങ്ങാനുള്ള നടപടികളും പുരോഗമിക്കുകയാണ്. തിരുവനന്തപുരം നഗരത്തില്‍ വിനോദസഞ്ചാരത്തിന് ഉപയോഗിക്കുന്ന ഡബിള്‍ഡെക്കര്‍ ബസിന് പകരമാണ് പുതിയ സംവിധാനം.
