തിരുവനന്തപുരം: സച്ചിൻ ദേവ് എംഎൽഎക്ക് എതിരെ സൈബർ സെല്ലിനും സ്‌പീക്കർക്കും പരാതി നൽകി കെ കെ രമ. സാമൂഹ്യ മാധ്യമങ്ങൾ വഴി തന്നെ അപമാനിക്കുന്നു എന്നാണ് രമയുടെ പരാതിയിൽ പറയുന്നത്. സച്ചിൻ ദേവ് എംഎൽഎ സാമൂഹ്യ മാധ്യമങ്ങളിൽ പങ്കുവച്ച പോസ്റ്റുകളുടെ സ്ക്രീൻ ഷോട്ടുകൾ അടക്കം ഉൾപ്പെടുത്തിയാണ് പരാതി നൽകിയത്.
ആദ്യമായാണ് ഒരു എംഎൽഎക്ക് എതിരെ മറ്റൊരു എംഎൽഎ സൈബർ സെല്ലിന് പരാതി നൽകുന്നത്. തന്നോട് പരിക്കിനെ പറ്റി ചോദിക്കുക പോലും ചെയ്യാതെ നിയമസഭാംഗം സാമൂഹ്യ മാധ്യമങ്ങള്‍ വഴി തനിക്ക് അപമാനം ഉണ്ടാക്കുന്ന പോസ്റ്റുകൾ പങ്കുവയ്‌ക്കുകയും വിവിധ സമയങ്ങളില്‍ ഉള്ള ഫോട്ടോകള്‍ എടുത്ത് കാണിച്ച് പ്രചരണം നടത്തുകയും ചെയ്യുന്നു. നിയമസഭയ്ക്ക് അകത്ത് നടന്ന സംഭവം തെറ്റായി പ്രചരിപ്പിക്കുകയും ഒരു സാമാജിക എന്ന നിലയിൽ തന്‍റെ വിശ്വാസ്യത ചോദ്യം ചെയ്യുന്ന തരത്തിൽ കള്ള പ്രചരണം നടത്തുന്നു എന്നുമാണ് കെ കെ രമ പരാതിയിൽ പറയുന്നത്.
കെ കെ രമയുടെ പരിക്ക് വ്യാജമാണെന്ന് സച്ചിന്‍ ദേവ്: കെ കെ രമയുടെ കൈയിലെ പരിക്ക് വ്യാജമാണെന്ന് പറഞ്ഞ് കൊണ്ടാണ് സച്ചിൻ ദേവ് എംഎല്‍എ ഇന്നലെ വൈകുന്നേരം നാലുമണിയോടെ സാമൂഹ്യ മാധ്യമങ്ങളിൽ രമക്കെതിരെ ഫേസ്ബുക്ക് പോസ്റ്റ് ഇട്ടത്. സംഘർഷത്തിന് പിന്നാലെ സാമൂഹ്യ മാധ്യമങ്ങൾ ഇടത് പ്രൊഫൈലുകളിൽ നിന്നും കെ കെ രമയ്‌ക്കെതിരെ സൈബർ ആക്രമണം നടന്നുകൊണ്ടിരിക്കുകയാണ്. കെ കെ രമയുടെ കൈയിലെ പരിക്ക് വ്യാജമാണെന്ന് പറയുന്നില്ല എന്നും മെഡിക്കൽ രേഖകൾ പരിശോധിക്കണമെന്നും ഇന്നലെ എച്ച് സലാമും സച്ചിൻ ദേവും വിളിച്ച വാര്‍ത്ത സമ്മേളനത്തിൽ പറഞ്ഞിരുന്നു.
നിയമസഭയിൽ പ്രതിപക്ഷ-ഭരണപക്ഷ സംഘർഷത്തിനിടെയാണ് കെ കെ രമയ്ക്ക് പരിക്കുപറ്റിയത്. പിന്നീട് തിരുവനന്തപുരം ജനറൽ ഹോസ്‌പിറ്റലിൽ വച്ച് ശുശ്രൂഷ നടത്തുകയും ചെയ്‌തു. എന്നാൽ ആശുപത്രി അധികൃതരോടു പോലും ചോദിക്കാതെ തനിക്കെതിരെ പങ്കുവച്ച ഫേസ്ബുക്ക് പോസ്റ്റ് പിൻവലിക്കണം എന്നാണ് രമയുടെ ആവശ്യം. പത്രങ്ങളിൽ തന്‍റെ എക്‌സ് റേ ഷീറ്റ് പുറത്തുവന്നു എന്നു പറയുന്നതും തന്‍റെ കൈയ്‌ക്ക് പറ്റിയ പരിക്ക് വ്യാജമാണെങ്കിൽ അത് സർക്കാർ ആശുപത്രിയോടുള്ള വിശ്വാസ്യതയെ ഇല്ലാതാക്കുമെന്നും കെ കെ രമ പറഞ്ഞു.
സച്ചിന്‍ ദേവിന്‍റെ ഫേസ്ബുക്ക് പോസ്റ്റ്: 'ഇൻ ഹരിഹർ നഗറിനും ടു ഹരിഹർ നഗറിനും ശേഷം ലാൽ സംവിധാനം ചെയ്‌ത മറ്റൊരു ചിത്രമായിരുന്നു ഇൻ ഗോസ്റ്റ് ഹൗസ് ഇൻ ...അതിൽ ഇടത് കൈയിൽ ഉണ്ടായിരുന്ന തിരുമുറിവ് വലതു കൈയിലേക്ക് മാറിപ്പോകുന്ന സീനുമായി ഇന്ന് സഭയിൽ നടന്ന സംഭവങ്ങൾക്ക് സാദൃശ്യം തോന്നിയിട്ടുണ്ടെങ്കിൽ ക്ഷമിക്കണം ...തോമസൂട്ടി വിട്ടോടാ...' എന്ന അടിക്കുറിപ്പോടെ കെ കെ രമയുടെ രണ്ട് ഫോട്ടോകൾ ചേർത്താണ് സച്ചിൻ ദേവ് ഫേസ്ബുക്ക് പോസ്റ്റ് പങ്കുവച്ചിരിക്കുന്നത്. കൊല്ലപ്പെട്ട ടി പി ചന്ദ്രശേഖരന്‍റെ ഭാര്യയും വടകര എംഎൽഎയും ആണ് കെ കെ രമ. ബാലുശ്ശേരി മണ്ഡലം എംഎൽഎയാണ് സച്ചിൻ ദേവ്.
