തിരുവനന്തപുരം : കാട്ടാക്കട ക്രിസ്ത്യന്‍ കോളജ് തെരഞ്ഞെടുപ്പിലെ ആള്‍മാറാട്ടത്തില്‍ കേരള സര്‍വകലാശാല ഇന്ന് പൊലീസില്‍ പരാതി നൽകും. കോളജ് പ്രിന്‍സിപ്പല്‍ ഷൈജുവിന് എതിരെയും എസ്എഫ്ഐ ഏരിയ സെക്രട്ടറി വിശാഖിനെതിരെയുമാകും കേസ് നൽകുക. കുറ്റാരോപിതനായ താത്കാലിക പ്രിന്‍സിപ്പല്‍ ഡോ ജി ജെ ഷൈജുവിനെ സ്ഥാനത്തുനിന്ന് മാറ്റാന്‍ സര്‍വകലാശാല കോളജിന് കഴിഞ്ഞ ദിവസം നിര്‍ദേശം നൽകിയിരുന്നു.
നിർദേശം ലഭിച്ചിട്ടും കോളജ് മാനേജ്മെന്റ് ഇതുവരെ നടപടികള്‍ ഒന്നും സ്വീകരിച്ചിട്ടില്ല. സര്‍വകലാശാലയ്ക്ക്‌ അവമതിപ്പ് ഉണ്ടാക്കിയ പ്രവര്‍ത്തിയാണ് സംഭവിച്ചതെന്നും വിശ്വാസ്യത തിരിച്ച് പിടിക്കുമെന്നും കേരള സര്‍വകലാശാല വൈസ് ചാന്‍സലര്‍ കഴിഞ്ഞ ദിവസം പറഞ്ഞിരുന്നു. കേരള സര്‍വകലാശാല വിദ്യാര്‍ഥി യൂണിയന്‍ തെരഞ്ഞെടുപ്പിന് മുന്നോടിയായി കാട്ടാക്കട ക്രിസ്ത്യന്‍ കോളജ് സര്‍വകലാശാലയ്ക്ക്‌ കൈമാറിയ യുയുസിമാരുടെ ലിസ്‌റ്റില്‍ തിരഞ്ഞെടുത്ത പ്രതിനിധിയായ വിദ്യാര്‍ഥി അനഘയുടെ പേരിന് പകരം എസ്എഫ്ഐ യുടെ ഏരിയ സെക്രട്ടറിയും കോളജിലെ ഒന്നാം വര്‍ഷ ഫിസിക്‌സ് വിദ്യാര്‍ഥിയുമായ വിശാഖിന്‍റെ പേരായിരുന്നു നൽകിയത്. സംഭവം വിവാദമായതോടെ കെഎസ്‌യു പൊലീസില്‍ പരാതി നൽകുകയായിരുന്നു.
എന്നാല്‍ ഈ പരാതിയിലും പൊലീസ് ഇതുവരെ കേസ് രജിസ്‌റ്റര്‍ ചെയ്‌തിട്ടില്ല. കഴിഞ്ഞ വെള്ളിയാഴ്‌ചയായിരുന്നു കേരള സര്‍വകലാശാല യൂണിയന്‍ തിരഞ്ഞെടുപ്പില്‍ നോമിനേഷന്‍ സമര്‍പ്പിക്കേണ്ടതിന്‍റെ അവസാന ദിവസം. നോമിനേഷന്‍ സമര്‍പ്പിക്കാനെത്തിയ കെഎസ്‌യു പ്രവര്‍ത്തകരും പൊലീസും തമ്മില്‍ സംഘര്‍ഷവും ഉടലെടുത്തിരുന്നു. നോമിനേഷന്‍ സ്‌ക്രൂട്ടണിയില്‍ പങ്കെടുക്കണമെന്ന് കെഎസ്‌യു പ്രവര്‍ത്തകര്‍ ആവശ്യമുന്നയിക്കുകയും രജിസ്ട്രാറുടെ മുറിയിലേക്ക് തള്ളി കയറാന്‍ ശ്രമിക്കുകയും ചെയ്‌തിരുന്നു. ഇതേ തുടർന്നാണ് സംഘര്‍ഷമുണ്ടായത്.
സംഘർഷത്തെ തുടര്‍ന്ന് പ്രവര്‍ത്തകരെ സ്ഥലത്തുനിന്ന് പൊലീസ് അറസ്‌റ്റ് ചെയ്‌ത് നീക്കുകയായിരുന്നു. സംഘര്‍ഷത്തിന് പിന്നാലെ യൂണിയന്‍ തിരഞ്ഞെടുപ്പ് സര്‍വകലാശാല മാറ്റി വയ്ക്കുകയും ചെയ്‌തു. തെരഞ്ഞെടുപ്പ് മാറ്റി വച്ചതിനെ തുടര്‍ന്ന് സര്‍വകലാശാലയ്ക്ക്‌ ഉണ്ടായ നഷ്‌ടം കാട്ടാക്കട ക്രിസ്ത്യന്‍ കോളജ് പ്രിന്‍സിപ്പല്‍ ഷൈജുവിന്‍റെ പക്കല്‍ നിന്ന് ഈടാക്കുമെന്ന് കഴിഞ്ഞ ദിവസം വൈസ് ചാന്‍സലര്‍ വ്യക്തമാക്കിയിരുന്നു. ഗുരുതരമായ ക്രമക്കേട് ചര്‍ച്ചാവിഷയമായതോടെ സംഭവത്തില്‍ ഉന്നത വിദ്യാഭ്യാസ വകുപ്പും നടപടി സ്വീകരിക്കുമെന്ന് മന്ത്രി ആര്‍ ബിന്ദുവും പ്രതികരിക്കുകയുണ്ടായി.
ഷൈജു നടത്തിയത് ലക്ഷങ്ങളുടെ അഴിമതിയെന്ന് ആരോപണം : കാട്ടാക്കട ക്രിസ്ത്യൻ കോളജിലെ തെരഞ്ഞെടുപ്പ് ആൾമാറാട്ടത്തിൽ ഗുരുതരമായ ആരോപണങ്ങൾ ഉയരവെ പ്രിൻസിപ്പൽ ഷൈജുവിനെതിരെ ആക്ഷേപങ്ങളുയര്‍ത്തി ബോട്ടണി വിഭാഗം അസിസ്‌റ്റന്‍റ് പ്രൊഫസർ ഫെലിക്‌സ് ആർ രംഗത്ത് വന്നത് കഴിഞ്ഞ ദിവസമാണ്. പിടിഎ ഫണ്ടിൽ നിന്ന് പ്രിൻസിപ്പൽ ഷൈജു 52 ലക്ഷം രൂപ കവർന്നതായാണ് സഹപ്രവർത്തകർ ആരോപിക്കുന്നത്. തുടർന്ന് ഫെലിക്‌സ് വിജിലൻസിന് പരാതി നൽകിയിരുന്നു.
പിടിഎ ഫണ്ട് അഴിമതി കേസ് ഒത്തുതീർപ്പാക്കാൻ സഹായിച്ചെന്നും അതിന്‍റെ പ്രത്യുപകാരമായാണ് എസ്‌എഫ്‌ഐയുടെ ആൾമാറാട്ടത്തിന് ഷൈജു കൂട്ട് നിന്നതെന്നുമാണ് സഹപ്രവർത്തകന്‍റെ ആരോപണം. അസിസ്‌റ്റന്‍റ് പ്രൊഫസർ ആയിരുന്ന ഷൈജുവിനെ സീനിയോറിറ്റി ലംഘിച്ചാണ് മാനേജ്മെന്റ് പ്രിൻസിപ്പൽ ഇൻ ചാർജ് ആക്കിയതെന്ന പരാതിയും ഇതിനോടകം ഉയർന്നിട്ടുണ്ട്.
