തിരുവനന്തപുരം : കേരള സർവകലാശാല അസിസ്റ്റന്‍റ് നിയമന പരീക്ഷയുടെ ഉത്തരക്കടലാസുകൾ കാണാതായ കേസിൽ സംസ്ഥാന ക്രൈംബ്രാഞ്ച് തിരുവനന്തപുരം വിജിലൻസ് കോടതിയിൽ സമർപ്പിച്ച റിപ്പോർട്ട് തള്ളി. ഉത്തരക്കടലാസ് നഷ്‌ടപ്പെട്ടതിന് ഉത്തരവാദികളെ കണ്ടെത്തുന്നതിന് പുനരന്വേഷണം നടത്തി കുറ്റപത്രം സമർപ്പിക്കാൻ വിജിലൻസ് കോടതി ജഡ്‌ജി ജി. ഗോപകുമാർ നിർദേശിച്ചു. മൂന്ന് മാസത്തിനുള്ളിൽ ഹൈക്കോടതി നിർദേശിച്ചത് പ്രകാരമുള്ള റിപ്പോർട്ട് വിജിലൻസ് കോടതിക്ക് സമർപ്പിക്കണമെന്നും കോടതി ഉത്തരവിട്ടു.
പുനരന്വേഷണത്തിന് ഉത്തരവ് : ക്രൈംബ്രാഞ്ച് നടത്തിയ അന്വേഷണം ഹൈക്കോടതിയുടെ ഉത്തരവിന് വിരുദ്ധമാണെന്ന് ചൂണ്ടിക്കാട്ടിയ ജഡ്‌ജി, കോടതി നിർദേശിച്ച ആദ്യ റിപ്പോർട്ടിലെ ന്യൂനതകൾ പരിഹരിക്കുന്നതിന് പകരം വളരെ ഉദാസീനമായാണ് ക്രൈംബ്രാഞ്ച് പുതിയ റിപ്പോർട്ട് സമർപ്പിച്ചിരിക്കുന്നതെന്ന് വിമര്‍ശിച്ചു. റിപ്പോർട്ട് അപൂർണമായതിനാൽ തിരികെ ഏൽപ്പിച്ച് മൂന്ന് മാസത്തിനുള്ളിൽ ഹൈക്കോടതി നിർദേശിച്ചത് പ്രകാരമുള്ള റിപ്പോർട്ട് വിജിലൻസ് കോടതിക്ക് സമർപ്പിക്കണമെന്ന് ഉത്തരവിൽ പറയുന്നു.
തീരുമാനം നിയമോപദേശത്തോടെ : 40000 ഒ.എം.ആർ ഉത്തരക്കടലാസുകൾ നശിപ്പിച്ചെന്നാണ് കേസ്. 2008ൽ കേരള സർവകലാശാലയിൽ 200ഓളം അസിസ്റ്റന്‍റുമാരെയാണ് നിയമിച്ചത്. സംഭവത്തിൽ ഉത്തരവാദികളായവരെ കണ്ടെത്താനാവില്ലെന്നും ഉത്തരക്കടലാസുകൾ കാണാതായതിന് തെളിവുകൾ ലഭ്യമല്ലാത്തതുകൊണ്ട് കേസ് എഴുതി തള്ളണമെന്നുമാണ് ക്രൈംബ്രാഞ്ച് കോടതിയിൽ ആവശ്യപ്പെട്ടത്.
കേരള സർവകലാശാല വി.സിയായിരുന്ന ഡോ. എം.കെ രാമചന്ദ്രൻ നായർ, പ്രോ-വൈസ് ചാൻസലർ ഡോ. വി. ജയപ്രകാശ്, രജിസ്ട്രാർ കെ.എ ഹാഷിം, സിൻഡിക്കേറ്റ് അംഗങ്ങളായിരുന്ന അഡ്വ. എ.എ റഷീദ്, ബി.എസ് രാജീവ്, കെ.എ ആൻഡ്രൂ, എം.പി റസ്സൽ എന്നിവരെ പ്രോസിക്യൂട്ട് ചെയ്യണമെന്ന് ആവശ്യപ്പെട്ടുകൊണ്ടാണ് ക്രൈംബ്രാഞ്ച് നേരത്തെ വിജിലൻസ് കോടതിയിൽ കുറ്റപത്രം സമർപ്പിച്ചിരുന്നത്. എന്നാൽ പ്രതികൾ ഹൈക്കോടതിയെ സമീപിച്ച് കുറ്റപത്രം റദ്ദാക്കിച്ചു.
നിയമനം ലഭിച്ചവരെക്കൂടി എതിർ കക്ഷികളാക്കി പുനരന്വേഷണ റിപ്പോർട്ട് വിജിലൻസ് കോടതിയിൽ പുതുതായി ഫയൽ ചെയ്യാൻ നേരത്തെ ഹൈക്കോടതി ജസ്റ്റിസ് കെമാൽ പാഷ ഉത്തരവിട്ടിരുന്നു. പുനരന്വേഷണം നടത്തണമെന്ന ഹൈക്കോടതി ഉത്തരവിനെതിരെയുള്ള അപ്പീൽ നിലനിൽക്കില്ലെന്ന നിയമോപദേശം ലഭിച്ചതുകൊണ്ട് പുനരന്വേഷണം നടത്തി കുറ്റപത്രം നൽകുന്നതിന് പകരം കേസ് എഴുതിത്തള്ളാൻ ക്രൈംബ്രാഞ്ച് തീരുമാനിക്കുകയായിരുന്നു.
നടപടി പരാതിക്കാരനറിയാതെ : അന്വേഷണ ചുമതലയുണ്ടായിരുന്ന ഡി.വൈ.എസ്.പി സർവീസിൽ നിന്നും പിരിയുന്നതിന് തലേദിവസം കേസ് എഴുതി തള്ളിക്കൊണ്ടുള്ള റിപ്പോർട്ട് സമർപ്പിക്കുകയായിരുന്നു. പരാതിക്കാരനായ മുൻ സെനറ്റ് അംഗം സുജിത് എസ്. കുറുപ്പിന്‍റെ മൊഴിപോലും രേഖപ്പെടുത്താതെ അതീവ രഹസ്യമായിട്ടാണ് റിപ്പോർട്ട് കോടതിയിൽ സമർപ്പിച്ചത്. പൊലീസ് വകുപ്പിൽ നിന്ന് തന്നെ വിവരം അറിഞ്ഞ ഉടൻ സുജിത് എസ്. കുറുപ്പ് അഡ്വ. മൃദുൽ ജോൺ മാത്യു മുഖേന തടസഹർജി ഫയൽ ചെയ്തു.
കേസ് പുനരന്വേഷണം നടത്തിയാലും ഉത്തരക്കടലാസ് കണ്ടെത്താനോ അവ നശിപ്പിച്ചതിന് ഉത്തരവാദികളെ കണ്ടെത്താനോ സാധിക്കില്ലെന്നായിരുന്നു സർക്കാർ അഭിഭാഷകന്‍റെ നിലപാട്. ഉപലോകായുക്ത ജസ്റ്റിസ് എൻ. കൃഷ്‌ണൻ നായർ, ജസ്റ്റിസ് ശശിധരൻ, ഹൈക്കോടതി നിയോഗിച്ച ജഡ്‌ജി സുകുമാരൻ കമ്മിഷൻ എന്നിവർ ഉത്തരക്കടലാസ് നശിപ്പിച്ചതിന് ഉത്തരവാദികൾക്കെതിരെ ശിക്ഷാനടപടി സ്വീകരിക്കണമെന്ന് ആവശ്യപ്പെട്ടിരുന്നു.
കണ്ടെത്തിയത് വൻ ക്രമക്കേട് : 2008ലാണ് കേസിന് ആസ്‌പദമായ നിയമനങ്ങൾ നടന്നത്. പരീക്ഷ എഴുതാത്തവർ പോലും റാങ്ക് പട്ടികയിൽ ഇടംപിടിച്ചതായും, ഉത്തരക്കടലാസുകൾ നശിപ്പിച്ചശേഷം ഉയർന്ന റാങ്കുകൾ നൽകിയതായും മാർക്ക്‌ സൂക്ഷിച്ചിരുന്ന വി.സിയുടെ ലാപ്‌ടോപ് മോഷണം പോയതായും ഉപലോകായുക്തയുടെ അന്വേഷണത്തിൽ കണ്ടെത്തിയിരുന്നു.
40000 പേർ എഴുതിയ ഒ.എം.ആർ പരീക്ഷയിൽ 2401 പേരുടെ ഹ്രസ്വപട്ടിക തയാറാക്കി ഇന്‍റർവ്യൂ നടത്തി 1401 പേരുടെ റാങ്ക് പട്ടിക പ്രസിദ്ധീകരിച്ചു. 181 പേർക്ക് നിയമനവും നൽകി. തുടർന്ന് ലോകായുക്ത ഈ നിയമനങ്ങൾ സ്റ്റേ ചെയ്യുകയായിരുന്നു.
പ്രസ്‌തുത കേസാണ് എഴുതിത്തള്ളാൻ ക്രൈംബ്രാഞ്ച് ഇപ്പോൾ റിപ്പോർട്ട് നൽകിയത്. കേസുമായി ബന്ധപ്പെട്ട അസിസ്റ്റന്‍റുമാരുടെ നിയമനങ്ങൾ ഹൈക്കോടതിയുടെ സിംഗിൾ ബഞ്ച് ശരിവച്ച കാര്യവും എഴുതി തള്ളുന്നതിന് കാരണമായി റിപ്പോർട്ടിൽ പറയുന്നു.
അതേസമയം, സിപിഎം സഹയാത്രികരുടെ ബന്ധുജനങ്ങൾക്ക് നിയമനം നൽകുന്നതിന് ഉത്തരക്കടലാസുകൾ നശിപ്പിക്കുകയായിരുന്നുവെന്നും ഉത്തരവാദികളെ ക്രൈംബ്രാഞ്ചിന് കണ്ടെത്താനാകാത്ത സാഹചര്യത്തിൽ കേസ് സിബിഐയ്ക്ക് കൈമാറാൻ സർക്കാരിന് നിർദേശം നൽകണമെന്നും ആവശ്യപ്പെട്ട് സേവ് യൂണിവേഴ്‌സിറ്റി ക്യാംപെയിൻ കമ്മിറ്റി ഗവർണർക്ക് നിവേദനം നൽകി.
അസിസ്റ്റന്‍റ് നിയമനം ശരിവച്ച സിംഗിൾ ബഞ്ച് വിധിക്കെതിരായ അപ്പീൽ ഹൈക്കോടതിയുടെ ഡിവിഷൻ ബഞ്ചിന്‍റെ പരിഗണനയിലാണ്.
