തിരുവനന്തപുരം : Kochi to host 11th Kerala Travel Mart in March 24 - കേരള ട്രാവല്‍ മാര്‍ട്ടിന്‍റെ പതിനൊന്നാം എഡിഷന് മാർച്ച് 24 മുതല്‍ 27 വരെ നടക്കും. കൊച്ചി വെല്ലിംഗ്‌ടണ്‍ ഐലന്‍ഡിലെ സാഗര,സാമുദ്രിക കണ്‍വെന്‍ഷന്‍ സെന്‍ററാണ് പതിനൊന്നാം എഡിഷന് വേദിയാകുക. കേരളത്തിലേക്ക് കൂടുതല്‍ ടൂറിസം പദ്ധതികള്‍ ആകര്‍ഷിക്കാനാണ് കേരള ട്രാവല്‍ മാര്‍ട്ട് സൊസൈറ്റിയും സംസ്ഥാന വിനോദസഞ്ചാര വകുപ്പും കേരള ട്രാവല്‍ മാര്‍ട്ട് സംഘടിപ്പിക്കുന്നത്. ഇത്തവണ ആഭ്യന്തര നിക്ഷേപകര്‍ക്ക് കൂടുതല്‍ പ്രാധാന്യം നല്‍കിയാണ് പരിപാടി സംഘടിപ്പിക്കുകയെന്ന് ടൂറിസം മന്ത്രി മുഹമ്മദ് റിയാസ് പറഞ്ഞു.
കൊവിഡ് പശ്ചാത്തലത്തില്‍ വിദേശ സഞ്ചാരികള്‍ എത്തുന്നത് വൈകുമെന്ന വിലയിരുത്തലിലാണ് ആഭ്യന്തര നിക്ഷേപകര്‍ക്ക് മുന്‍തൂക്കം നല്‍കുന്നത്. വിനോദ സഞ്ചാര വകുപ്പ് പുതുതായി അവതരിപ്പിച്ച കാരവന്‍ ടൂറിസത്തിന് കൂടുതല്‍ പ്രധാന്യം നല്‍കും. ഒപ്പം അന്താരാഷ്ട്ര തലത്തില്‍ നിരവധി പുരസ്‌കാരങ്ങള്‍ നേടിയ ഉത്തരവാദിത്വ ടൂറിസത്തിനും പ്രാധാന്യം നല്‍കും. ഈ മേഖലയിലേക്ക് കൂടുതല്‍ നിക്ഷേപകരെ പ്രതീക്ഷിക്കുന്നതായും മന്ത്രി വ്യക്തമാക്കി.
