അതിശക്തമായ മഴ, പ്രളയഭീതിയിൽ കേരളം

ശക്തമായ കാറ്റിലും മഴയിലും സംസ്ഥാനത്തുടനീളം ഗതാഗതവും വൈദ്യുതിയും തടസപ്പെട്ടിരിക്കുകയാണ്. ഇത് കൊവിഡ് പ്രതിരോധ പ്രവർത്തനങ്ങളെ ബാധിക്കാൻ ഇടയുണ്ട്. കൊവിഡ് വ്യാപന പശ്ചാത്തലത്തിൽ മഴക്കാല രോഗങ്ങൾ പടർന്നാൽ അതും സംസ്ഥാനത്തിന് വെല്ലുവിളിയാവും. കേരളത്തെ കൂടാകെ ലക്ഷദ്വീപ് മഹാരാഷ്ട്ര, ഗോവ,ഗുജറാത്ത് എന്നിവിടങ്ങളിലും ജാഗ്രതാ നിർദ്ദേശം ഉണ്ട്. ചുഴലിക്കാറ്റ് ഇന്ന് രാത്രിയോടെ ഗുജറാത്ത് തീരം തൊടും എന്നാണ് പ്രവചനം.

തെക്കു-കിഴക്കൻ അറബിക്കടലിൽ രൂപംകൊണ്ട ന്യൂനമർദം ടൗട്ട ചുഴലിക്കാറ്റായി മാറിയ പശ്ചാത്തലത്തിൽ കേരളത്തിൽ അതിശക്തമായ കാറ്റും മഴയും ആണ് അനുഭവപ്പെടുന്നത്. സംസ്ഥാനത്തെ ഒമ്പത് ജില്ലകളിലാണ് ഇന്ന് റെഡ് അലർട്ട് പ്രഖ്യാപിച്ചത്. ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് റെഡ് അലർട്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിൽ ഓറഞ്ച് അലർട്ടും പ്രഖ്യാപിച്ചിട്ടുണ്ട്.

മഴയിലും കാറ്റിലും വ്യാപക നാശനഷ്‌ടമാണ് കേരളത്തിലുടനീളം റിപ്പോർട്ട് ചെയ്യുന്നത്. ചെല്ലാനത്ത് ഇന്നലെ മുതൽ കടലാക്രമണം രൂക്ഷമാണ്. ഇന്ന് കൂടുതൽ ആളുകളെ ദുരിതാശ്വാസ ക്യാമ്പുകളിലേക്ക് മാറ്റിയിട്ടുണ്ട്. കൊവിഡ് രൂക്ഷമായ മേഖലയിൽ ആന്‍റിജൻ പരിശോധന നടത്തിയാണ് ആളുകളെ ക്യാമ്പുകളിലേക്ക് മാറ്റുന്നത്.എറണാകുളം ജില്ലയിൽ പതിനഞ്ച് ദുരിതാശ്വാസ ക്യാമ്പുകളാണ് ഇതുവരെ തുറന്നത്.

ഇടുക്കിയിൽ കനത്ത മഴയാണ് തുടരുന്നത്. വട്ടവടയിൽ രണ്ട് വീടുകൾ പൂർണമായും 20 വീടുകൾ ഭാഗികമായും തകർന്നു. രാമക്കൽമേട്, കുത്തുങ്കൽ, കാൽവരി മൗണ്ട് തുടങ്ങിയ പ്രദേശങ്ങളിലും വീടുകൾ തകർന്നു. മൂന്നാറിൽ തോട്ടം മേഖലയിലും കനത്ത മഴയാണ്. വിവിധ ഇടങ്ങളിൽ ഗതാഗതവും വൈദ്യുതിയും തടസപ്പെട്ടിരിക്കുകയാണ്. മലങ്കര,കല്ലാർകുട്ടി അണക്കെട്ടുകളുടെ ഷട്ടർ ഉയർത്തി. പലയിടങ്ങളും മണ്ണിടിച്ചില്‍, ഉരുള്‍പൊട്ടല്‍ ഭീതിയിലാണ്. ജില്ലയിൽ ഇന്ന് വൈകിട്ട് 7 മണിമുതൽ നാളെ രാവിലെ 7 മണിവരെ കലക്ടർ യാത്രാ നിരോധനം ഏർപ്പെടുത്തിയിട്ടുണ്ട്.

തിരുവനന്തപുരം പൊഴിയൂരിൽ കടൽക്ഷോഭത്തിൽ 23 വീടുകൾ തകർന്നു. കേരളത്തെ തമിഴ്‌നാടുമായി ബന്ധിപ്പിക്കുന്ന തീരദേശ റോഡും കടലാക്രമണത്തിൽ തകർന്നു. മേഖലിയിൽ നിന്ന് ജനങ്ങളെ ദുരിതാശ്വാസ ക്യാമ്പിലേക്ക് മാറ്റി. ശക്തമായ മഴയിലും വേലിയേറ്റത്തിലും കൊല്ലം മൺറോത്തുരുത്തിലെ 100ൽ അധികം വീടുകളിൽ വെള്ളം കയറി.

അച്ചൻ കോവിൽ, മണിമലയാറുകളിൽ ജലനിരപ്പ് ഉയരുന്ന പശ്ചാത്തലത്തിൽ പ്രളയ സാധ്യതാ മുന്നറിയിപ്പ് നൽകിയിട്ടുണ്ട്. പത്തനംതിട്ട ജില്ലയിൽ ഈ മാസം കനത്ത മഴയിലും കാറ്റിലും ഇതുവരെ 23 വീടുകള്‍ പൂര്‍ണമായും121 വീടുകള്‍ ഭാഗികമായും തകര്‍ന്നു. അഞ്ചുകോടിയിലധികം രൂപയുടെ കൃഷിനാശമാണ് . ജില്ലയിൽ ഉണ്ടായത്.