തിരുവനന്തപുരം : കേരള പൊലീസിനുള്ള ഹെലികോപ്‌റ്റര്‍ വാടക കരാര്‍ അടുത്ത മൂന്ന് വര്‍ഷത്തേക്ക് ഡല്‍ഹി ആസ്ഥാനമായ ചിപ്‌സണ്‍ ഏവിയേഷന് എന്ന സ്വകാര്യ കമ്പനിക്ക്. പ്രതിമാസം 80 ലക്ഷം രൂപയ്‌ക്ക് 20 മണിക്കൂര്‍ പറക്കാനാണ് കരാര്‍. അധികമായി പറക്കുന്ന ഓരോ മണിക്കൂറിനും 90,000 രൂപ അധികമായി നല്‍കണം. മൂന്ന് കമ്പനികളാണ് ടെണ്ടറില്‍ പങ്കെടുത്തത്.
കഴിഞ്ഞ വര്‍ഷം ടെണ്ടര്‍ നടത്താതെയാണ് പൊതുമേഖല കമ്പനിയായ പവന്‍ ഹാന്‍സുമായി കരാര്‍ നല്‍കിയത്. പത്ത് സീറ്റുകളുള്ള ഇരട്ട എന്‍ജിന്‍ ഹെലികോപ്‌റ്ററിന് പ്രതിമാസം 1.44 കോടി രൂപയ്‌ക്കായിരുന്നു കരാര്‍. ഇത്തവണ സീറ്റുകളുടെ എണ്ണം കുറഞ്ഞ് ഏഴ്‌ ആയതിനെ തുടര്‍ന്നാണ് കരാര്‍ തുക പകുതിയായത്.
