തിരുവനന്തപുരം: പൊതുമേഖലാ സ്ഥാപനമായ ട്രാവന്‍കൂര്‍ ടൈറ്റാനിയത്തില്‍ മലിനീകരണ നിയന്ത്രണ പ്ലാന്റ് ഇറക്കുമതി ചെയ്‌തത് ബ്രിട്ടണില്‍ നിന്നായതിനാല്‍ കേന്ദ്ര ഏജന്‍സിയുടെ അന്വേഷണം വേണമെന്ന വിജിലന്‍സ് ശുപാര്‍ശയിലാണ് സര്‍ക്കാര്‍ തീരുമാനം. 2006ലെ നിയമസഭാ തെരഞ്ഞെടുപ്പിന് തൊട്ടുമുമ്പാണ് ടൈറ്റാനിയത്തിലെ മലിനീകരണ നിയന്ത്രണ പ്ലാന്റ് സ്ഥാപിക്കുന്നതുമായി ബന്ധപ്പെട്ട അഴിമതി ആരോപണം ഉയരുന്നത്.
കോണ്‍ഗ്രസ് നേതാവായിരുന്ന കെ.കെ രാമചന്ദ്രന്‍ മാസ്റ്ററാണ് ടൈറ്റാനിയം അഴിമതി ആരോപണവുമായി രംഗത്ത് വന്നത്. 256 കോടി രൂപയുടെ പ്ലാന്റ് സ്ഥാപിക്കുന്നതിന് റാഞ്ചി ആസ്ഥാനമായ മെക്കോണ്‍ എന്ന പൊതുമേഖലാ സ്ഥാപനത്തിന് ടൈറ്റാനിയം കരാര്‍ നല്‍കുകയായിരുന്നു. ബ്രിട്ടണ്‍ ആസ്ഥാനമായ വി.എന്‍ ടെക്ക് ബാങ്ക് എന്ന സ്ഥാപനത്തില്‍ നിന്ന് 86 കോടി രൂപയുടെ ഉപകരണങ്ങള്‍ ഇറക്കുമതി ചെയ്‌തെങ്കിലും ഒറ്റ ഉപകരണം പോലും സ്ഥാപിച്ചില്ല.
ഉപകരണങ്ങള്‍ ഇറക്കുമതി ചെയ്തതില് വന്‍ അഴിമതി നടന്നെന്നും അന്നത്തെ മുഖ്യമന്ത്രി ഉമ്മന്‍ചാണ്ടി, കെപിസിസി പ്രസിഡന്റ് രമേശ് ചെന്നിത്തല, വ്യവസായ മന്ത്രി ഇബ്രാഹിംകുഞ്ഞ് എന്നിവര്‍ ഗൂഢാലോചന നടത്തി ആഗോള ടെന്‍ണ്ടര്‍ ഒഴിവാക്കി മെക്കോണിന് കരാര്‍ നല്‍കിയെന്നായിരുന്നു ആരോപണം. പിന്നീട് അധികാരത്തില്‍ വന്ന വി.എസ് അച്യുതാന്ദന്‍ സര്‍ക്കാര്‍ വിജിലന്‍സ് അന്വേഷണത്തിന് ഉത്തരവിട്ടു. ഉമ്മന്‍ചാണ്ടി, രമേശ് ചെന്നിത്തല, ഇബ്രാഹിംകുഞ്ഞ്, ടൈറ്റാനിയം എംഡി എന്നിവരുള്‍പ്പെടെ ആറ് പേര്‍ക്ക് അഴിമതിയില്‍ പങ്കുണ്ടെന്ന് വിജിലന്‍സ് പ്രാഥമികാന്വേഷണത്തില്‍ കണ്ടെത്തി. അഴിമതിയുടെ വ്യാപ്തി കണ്ടെത്താന്‍ ഇന്റര്പോളിന്റെ സഹായം തേടാനും വിജിലന്‍സ് തീരുമാനിച്ചിരുന്നു. അഴിമതിയുടെ വ്യാപ്തി കണ്ടെത്തിയാല്‍ മാത്രമേ രാഷ്ട്രീയക്കാരുടെ പങ്ക് കണ്ടെത്താനാകൂവെന്ന് തിരുവനന്തപുരം വിജിലന്‍സ് കോടതിയില്‍ സമര്‍പ്പിച്ച എഫ്.ഐ.ആറില്‍ വിജിലന്‍സ് ചൂണ്ടിക്കാട്ടിയിരുന്നു.
