തിരുവനന്തപുരം : നവകേരള സദസില്‍ മികച്ച സേവനം നല്‍കിയ പൊലീസ് ഉദ്യോഗസ്ഥര്‍ക്ക് ഗുഡ് സര്‍വീസ് എന്‍ട്രി നല്‍കും (Good Service Entry For Police Officers). ക്രമസമാധാന ചുമതലയുള്ള എ ഡി ജി പി എം ആര്‍ അജിത് കുമാറാണ് മികച്ച സേവനം കാഴ്‌ചവച്ച പൊലീസ് ഉദ്യോഗസ്ഥര്‍ക്ക് ഗുഡ് സര്‍വീസ് എന്‍ട്രി നല്‍കുന്നതിനുള്ള സര്‍ക്കുലര്‍ പുറത്തിറക്കിയത്. ക്രമസമാധാനം ഉറപ്പുവരുത്താന്‍ സ്‌തുത്യര്‍ഹമായ സേവനം നടത്തിയവര്‍ക്ക് ഗുഡ് സര്‍വീസ് എന്‍ട്രി നല്‍കുമെന്നാണ് സര്‍ക്കുലറില്‍ പറയുന്നത്.
എസ്‌പിമാര്‍ക്കും ഡി ഐ ജി മാര്‍ക്കുമാണ് ഇത് സംബന്ധിച്ച് നിര്‍ദേശം നല്‍കിയിട്ടുള്ളത്. സിവില്‍ പൊലീസ് ഓഫീസര്‍ മുതല്‍ ഐജി റാങ്ക് വരെയുള്ള പൊലീസ് ഉദ്യോഗസ്ഥര്‍ക്ക് ഗുഡ് സര്‍വീസ് എന്‍ട്രി നല്‍കാനാണ് നിര്‍ദേശം നല്‍കിയിരിക്കുന്നത്. കാസര്‍കോട് മഞ്ചേശ്വരം മണ്ഡലത്തില്‍ നിന്നും നവംബര്‍ 18ന് ആരംഭിച്ച മുഖ്യമന്ത്രിയുടെയും മന്ത്രിമാരുടെയും നവകേരള സദസ് പര്യടനം 36-ാം ദിവസം തിരുവനന്തപുരത്തെ വട്ടിയൂര്‍ക്കാവ് മണ്ഡലത്തിലെ പരിപാടിയോടെയാണ് സമാപിച്ചത്.
ഒരു മാസത്തിലധികം നീണ്ടുനിന്ന നവകേരള സദസ് യാത്രയില്‍ നിരവധിയിടങ്ങളില്‍ സംഘര്‍ഷങ്ങള്‍ അരങ്ങേറിയിരുന്നു. മുഖ്യമന്ത്രിയും മന്ത്രിമാരും സഞ്ചരിച്ചിരുന്ന ബസിന് നേരെ കോണ്‍ഗ്രസ്, യൂത്ത് കോണ്‍ഗ്രസ്, കെഎസ്‌യു പ്രവര്‍ത്തകര്‍ കരിങ്കൊടി പ്രതിഷേധം ഉള്‍പ്പടെ നടത്തി. ഇവരെ ഡിവൈഎഫ്‌ഐ പ്രവര്‍ത്തകര്‍ മര്‍ദിക്കുന്നത് വലിയ ചര്‍ച്ചയായിരുന്നു.
പ്രവര്‍ത്തകരെ പൊലീസ് പിന്തുണയോടെയാണ് ഡിവൈഎഫ്‌ഐ പ്രവര്‍ത്തകര്‍ മര്‍ദിച്ചതെന്ന് യൂത്ത് കോണ്‍ഗ്രസും കെഎസ്‌യുവും ആരോപിച്ചിരുന്നു. ഇതിനെതിരെ പ്രവര്‍ത്തകര്‍ ഡിജിപി ഓഫീസിലേക്ക് ഉള്‍പ്പടെ മാര്‍ച്ച് നടത്തി. ഈ മാര്‍ച്ചുകള്‍ പല പ്രാവശ്യം സംഘര്‍ഷത്തില്‍ കലാശിച്ചു.
നവകേരള സദസിന്‍റെ സമാപന ദിനത്തിലും കോണ്‍ഗ്രസ് പ്രതിഷേധം അക്രമാസക്തമായിരുന്നു. ഡിജിപി ഓഫീസിലേക്കാണ് അന്നും കോണ്‍ഗ്രസ് മാര്‍ച്ച് നടന്നത്. പ്രതിപക്ഷ നേതാവ് വിഡി സതീശന്‍, കെപിസിസി അധ്യക്ഷന്‍ കെ സുധാകരന്‍, എംഎല്‍എമാരായ രമേശ് ചെന്നിത്തല, മാത്യു കുഴല്‍നാടന്‍ ഉള്‍പ്പടെയുള്ള മുന്‍നിര നേതാക്കള്‍ പങ്കെടുത്ത പ്രതിഷേധമാണ് സംഘര്‍ഷത്തില്‍ കലാശിച്ചത്.
Also Read : കേരള പൊലീസിനെതിരെ അവകാശ ലംഘന നടപടിക്ക് കെ സുധാകരന്‍; ലോക്‌സഭ സ്‌പീക്കര്‍ക്ക് കത്തയച്ചു
കോണ്‍ഗ്രസ് പ്രവര്‍ത്തകര്‍ക്കെതിരെ പൊലീസ് കണ്ണീര്‍വാതകം, ജലപീരങ്കി എന്നിവ പ്രയോഗിക്കുകയും ചെയ്തിരുന്നു. പ്രതിഷേധക്കാര്‍ മനപ്പൂര്‍വ്വം പ്രകോപനം സൃഷ്ടിച്ചുവെന്നാണ് സംഘര്‍ഷത്തെ കുറിച്ച് പൊലീസ് പറഞ്ഞത്. ഡിജിപി ഓഫീസിലേക്കുള്ള കോണ്‍ഗ്രസിന്‍റെ പ്രതിഷേധ മാര്‍ച്ച് അക്രമാസക്തമായതിന് പിന്നാലെ കെ സുധാകരന്‍, വിഡി സതീശന്‍, ശശി തരൂര്‍ എന്നിവര്‍ക്കെതിരെ പൊലീസ് കേസ് രജിസ്റ്റര്‍ ചെയ്തിരുന്നു.
