തിരുവനന്തപുരം: മലബാർ എക്സ്‌പ്രസിൽ തീപിടിത്തം. ട്രെയിനിലെ ലഗേജ് വാനിലാണ് തീ പടര്‍ന്ന് പിടിച്ചത്. തീയും പുകയും ശ്രദ്ധയില്‍പ്പെട്ട യാത്രക്കാര്‍ വർക്കല ഇടവ സ്റ്റേഷന് സമീപം ചങ്ങല വലിച്ച് ട്രെയിന്‍ നിര്‍ത്തി. ആളപായമില്ല.
ലഗേജ് വാനിനുള്ളിലുണ്ടായിരുന്ന രണ്ടു ബൈക്കുകൾ പൂർണമായും കത്തിനശിച്ചു. തീപിടിത്തം ഉണ്ടായ ബോഗി വേർപെടുത്തിയ ശേഷം 9.45 ഓടെ ട്രെയിൻ യാത്ര തിരിച്ചു. ഇടവ റെയിൽവേ സ്റ്റേഷന് സമീപം രാവിലെ 7.45 ഓടെയായിരുന്നു സംഭവം. മംഗലാപുരത്ത് നിന്ന് തിരുവനന്തപുരത്തേക്ക് പോവുകയായിരുന്ന ട്രെയിനിൽ നിന്ന് തീയും പുകയും ഉയരുന്നത് കണ്ട് യാത്രക്കാർ ചെയിൻ വലിച്ച് ട്രെയിൻ നിർത്തുകയായിരുന്നു. തുടർന്ന് അഗ്നിശമന സേന എത്തി തീ അണച്ചു.
ഉടൻ തീയണയ്ക്കാൻ കഴിഞ്ഞതിനാലാണ് വൻ ദുരന്തമൊഴിവായത്. സംഭവത്തെക്കുറിച്ച് അന്വേഷിക്കുമെന്ന് റെയിൽവേ അറിയിച്ചു. ഡിവിഷണൽ എഞ്ചിനീയർ വർക്കലയിൽ എത്തി തീ പിടിച്ച ബോഗി പരിശോധിക്കും.
