തിരുവനന്തപുരം : എയ്‌ഡഡ് സ്‌കൂള്‍ നിയമനങ്ങൾ പി.എസ്.സിക്ക് വിടണമെന്ന സിപിഎം കേന്ദ്ര കമ്മിറ്റി അംഗം എ.കെ ബാലന്‍റെ നിലപാട് തള്ളി വിദ്യാഭ്യാസമന്ത്രി വി.ശിവൻകുട്ടി. എയ്‌ഡഡ് സ്‌കൂള്‍ നിയമനം പി എസ് സി ക്ക് വിടുന്ന കാര്യം സര്‍ക്കാര്‍ ആലോചിച്ചിട്ടില്ലെന്നും എല്ലാ വിദ്യാഭ്യാസ സ്ഥാപനങ്ങളിലും സാമൂഹ്യനീതി ഉറപ്പ് വരുത്തുന്നതിനുള്ള നടപടികളുമായി സര്‍ക്കാര്‍ മുന്നോട്ട് പോകുമെന്നും മന്ത്രി പറഞ്ഞു. മണക്കാട് ടിടിഐ യില്‍ പഠന വണ്ടിയും പ്രവേശനോത്സവവും ഉദ്ഘാടനം ചെയ്‌ത ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
സ്‌കൂളുകളിലെ താത്‌കാലിക അധ്യാപക നിയമനം എംപ്ലോയ്‌മെന്‍റ് എക്‌സ്ചേഞ്ച് വഴിയായിരിക്കുമെന്നും ഇത്തരത്തില്‍ നിയമനം നടത്തുന്നത് വരെ സ്‌കൂളുകള്‍ക്ക് സ്വന്തം നിലയില്‍ അധ്യാപകരെ നിയമിക്കാമെന്നും മന്ത്രി കൂട്ടിച്ചേര്‍ത്തു. പ്ലസ് വണ്‍ പരീക്ഷ തിയ്യതി മുമ്പ് നിശ്‌ചയിച്ചതാണ്.
പരീക്ഷ മാറ്റിവയ്ക്ക‌ണമെന്നാവശ്യപ്പെട്ട് വിദ്യാര്‍ഥികള്‍ നടത്തുന്ന സമരം അംഗീകരിക്കാനാകില്ല. സമരം മറ്റ് വിദ്യാര്‍ഥികളെ കൂടി ആശങ്കയിലാക്കുന്നുണ്ട്. നേരത്തെ തീരുമാനിച്ചത് പോലെ തന്നെ പരീക്ഷ നടക്കുമെന്നും അദ്ദേഹം വ്യക്തമാക്കി.
also read: എയ്‌ഡഡ് സ്‌കൂള്‍ നിയമനം പിഎസ്‌സിക്ക് വിടില്ല; ബാലനെ തള്ളി കോടിയേരി
പ്ലസ് വണ്‍ ക്ലാസുകളിലെ മിക്ക വിഷയങ്ങളിലും പകുതി പോലും പാഠഭാഗങ്ങള്‍ തീര്‍ന്നിട്ടില്ലാത്ത സാഹചര്യത്തിലാണ് പഠിക്കാന്‍ കൂടുതല്‍ സമയം വേണമെന്നതിനാല്‍ പരീക്ഷ മാറ്റിവയ്ക്ക‌ണമെന്നാവശ്യപ്പെട്ട് വിദ്യാര്‍ഥികള്‍ സെക്രട്ടേറിയേറ്റിന് മുന്നില്‍ സമരം ചെയ്യുന്നത്. ജൂണ്‍ 13 മുതല്‍ 30 വരെയാണ് പ്ലസ് വണ്‍ പരീക്ഷ.
