തിരുവനന്തപുരം: സിപിഎം കേന്ദ്ര നേതൃയോഗം സമാപിച്ചു. ബിജെപി സർക്കാരിനെതിരെ യോജിക്കുന്നവർ സഹകരിച്ച് ശക്തമായ സമരം എന്ന തീരുമാനത്തോടെയാണ് കേന്ദ്ര കമ്മിറ്റി യോഗം സമാപിച്ചത്. പൗരത്വ ഭേദഗതി നിയമത്തിന്റെ പേരിൽ മാത്രമല്ല നരേന്ദ്ര മോദി സർക്കാരിന്‍റെ തെറ്റായ സാമ്പത്തിക നയം, തീവ്ര വർഗീയ പ്രവർത്തനം തുടങ്ങിയ വിഷയങ്ങൾ മുൻ നിർത്തി ശക്തമായ സമരം എന്നതാണ് മൂന്ന് ദിവസത്തെ സിപിഎം കേന്ദ്ര കമ്മറ്റി യോഗത്തിന്റെ പ്രധാന തീരുമാനം.
ഇതിനായി ആശയപരമായി യോജിക്കാവുന്ന എല്ലാവരുമായും ചേർന്ന് സംയുക്തമായി സമരം നടത്തും. കോൺഗ്രസുമായുള്ള നീക്ക് പോക്കുകളുടെ പേരിൽ എന്നും വിമർശനം ഉന്നയിക്കാറുള്ള കേരള ഘടകവും ഇത്തവണ സംയുക്ത സമരത്തെ അനുകൂലിച്ചു. ഡൽഹിയിലെ ജാമിയ മിലിയ, ജെ.എൻ.യു തുടങ്ങിയ സർവകലാശാലകളിലെ വിദ്യാർഥികൾ പൗരത്വ നിയമ ഭേദഗതിക്കെതിരെ നടത്തുന്ന സമരം ഏറ്റെടുക്കേണ്ടതില്ലെന്ന് ധാരണയായി. നിലവിൽ തുടരുന്ന സ്ഥിതി തന്നെ തുടർന്നാൽ മതിയെന്നാണ് നിർദേശം. വിദ്യാർഥികൾക്ക് നേരെ അക്രമം ഉണ്ടായാൽ സഹായം നൽകും.
വിദ്യാർഥി സമരത്തിന് നേരെ പൊലീസ് അതിക്രമമുണ്ടായപ്പോൾ സീതാറാം യെച്ചൂരിയടക്കമുള്ള നേതാക്കൾ അവിടെയെത്തി പ്രതിഷേധിച്ചിരുന്നു. പാർട്ടി ശക്തമായ കേരളം, ത്രിപുര, ബംഗാൾ എന്നീ മൂന്ന് സംസ്ഥാനങ്ങളിൽ വലിയ രീതിയിലുള്ള സമരം നടത്താനായതായി കേന്ദ്ര കമ്മിറ്റി വിലയിരുത്തി. തുടർന്നും ഇതേ രീതിയിൽ പ്രതിഷേധം നടത്തും. മറ്റ് സംസ്ഥാനങ്ങളിൽ നടക്കുന്ന സമരത്തിന് പിന്തുണയും നൽകും. 23 മുതൽ 30 വരെ നടക്കുന്ന 20 പാർട്ടികളുടെ യോജിച്ച സമരത്തിൽ ശക്തമായ പങ്കാളിത്തം ഉറപ്പ്‌ വരുത്തും. മറ്റ് സംഘടനാ വിഷയങ്ങൾ യോഗത്തിൽ കാര്യമായി ചർച്ചയായില്ല.
കേന്ദ്ര കമ്മിറ്റിയിലെ ചർച്ചകൾക്ക് പിബി യോഗം ചേർന്ന് മറുപടി തയാറാക്കി. ജനറൽ സെക്രട്ടറി സീതാറാം യെച്ചൂരി കേന്ദ്ര കമ്മറ്റിയിൽ മറുപടി പറഞ്ഞതോടെ മൂന്ന് ദിവസത്തെ യോഗ നടപടികൾക്ക് സമാപനമായി. പൗരത്വ ഭേദഗതി നിയമം റദ്ദാക്കണമെന്നാവശ്യപ്പെട്ട് സിപിഎം ഇന്ന് രാഷ്‌ടീയ വിശദീകരണ യോഗവും സംഘടിപ്പിച്ചിട്ടുണ്ട്. പുത്തരിക്കണ്ടം മൈതാനിയിൽ വെച്ച് സീതാറാം യെച്ചൂരി ഉദ്‌ഘാടനം ചെയ്യുന്ന പൊതുയോഗത്തിൽ മുഖ്യമന്ത്രി സംസാരിക്കും.
