തിരുവനന്തപുരം: ഡ്രൈവർമാരെ കത്തികാണിച്ച് ഭീഷണിപ്പെടുത്തിയ കേസിലെ പ്രതികള്‍ കീഴടങ്ങി. പുത്തൻപാലം രാജേഷും കൂട്ടാളി സാബുവും മെഡിക്കൽ കോളജ് പൊലീസ് സ്റ്റേഷനിലെത്തിയാണ് കീഴടങ്ങിയത്. മെഡിക്കൽ കോളജ് പരിസരത്ത് ആംബുലൻസ് ഡ്രൈവർമാരെ കത്തിക്കാട്ടി ഭീഷണിപ്പെടുത്തിയ കേസിൽ ഒരു മാസമായി ഇവരെ പൊലീസ് അന്വേഷിക്കുകയായിരുന്നു.
ഇന്ന് രാവിലെ 10 മണിയോടെയാണ് പ്രതികള്‍ മെഡിക്കൽ കോളജ് പൊലീസ് സ്റ്റേഷനിലെത്തിയത്. കേസിൽ പുത്തൻപാലം രാജേഷ് ഹൈക്കോടതിയിൽ മുൻകൂർ ജാമ്യാപേക്ഷ സമർപ്പിച്ചിരുന്നു. എന്നാൽ, ജാമ്യപേക്ഷ തള്ളിയ കോടതി, പൊലീസിന് മുന്നിൽ ഹാജരാകാൻ നിർദേശിച്ചു. ഇതേതുടർന്നാണ് രാജേഷ് സ്റ്റേഷനിൽ ഹാജരായത്. അറസ്റ്റ് രേഖപ്പെടുത്തിയ പൊലീസ് രാജേഷിനെ ചോദ്യം ചെയ്‌തുവരികയാണ്.
