തിരുവനന്തപുരം: എകെജി സെന്‍ററിന് നേരെ നടന്നത് ആസൂത്രിതമായ ആക്രമണമെന്ന് മുഖ്യമന്ത്രി പിണറായി വിജയൻ. പൊലീസുള്ള സ്ഥലം കൃത്യമായി മനസിലാക്കിയ ശേഷമാണ് ആക്രമണം നടത്തിയത്. ആദ്യം സ്ഥലത്ത് എത്തിയ അക്രമി സ്ഥിതിഗതികള്‍ നിരീക്ഷിച്ചു, രണ്ടാമത് എത്തിയ ആളാണ് സ്‌ഫോടക വസ്‌തു എറിഞ്ഞത്.
ഇക്കാര്യത്തിൽ പൊലീസ് വിശദമായ അന്വേഷണം നടത്തുന്നുണ്ടെന്നും മുഖ്യമന്ത്രി നിയമസഭയിൽ പറഞ്ഞു. ഏതെങ്കിലും ഒരാളെ പിടികൂടുകയല്ല പൊലീസ് ഉദ്ദേശിക്കുന്നത്. കുറ്റം ചെയ്‌തയാളെ തന്നെ കണ്ടെത്താനാണ്.
ആക്രമണം ആസൂത്രണം ചെയ്‌തവർ തന്നെ പ്രതിയെ ഒളിപ്പിക്കുകയാണ്. പ്രതിയെ പിടികൂടുമെന്ന കാര്യത്തിൽ ഒരു സംശയവും വേണ്ട. സി സി ടി വി പരിശോധനയിൽ ഒരു മെല്ലെപോക്കുമില്ല. എകെജി സെൻ്റർ തകർക്കുമെന്ന് പോസ്റ്റിട്ടയാളെ ചോദ്യം ചെയ്യുന്നത് സ്വാഭാവിക നടപടിയാണെന്നും മുഖ്യമന്ത്രി അടിയന്തര പ്രമേയ ചർച്ചയുടെ മറുപടിയായി പറഞ്ഞു.
