എ ഐ കാമറ വിവാദം; പ്രതിപക്ഷം പുകമറ സൃഷ്‌ടിക്കുന്നു, വസ്‌തുതാ വിരുദ്ധമായ പ്രചരണം നടക്കുന്നുവെന്ന് പി രാജീവ്

മുഖ്യമന്ത്രിയുടെ ബന്ധു പ്രകാശ് ബാബുവും പ്രസാഡിയോ കമ്പനിയും തമ്മിൽ ബന്ധമുണ്ടെങ്കിൽ പ്രതിപക്ഷം അതിന് കൃത്യമായ തെളിവ് കൊണ്ടുവരണമെന്നും പി രാജീവ്.

തിരുവനന്തപുരം: എ ഐ കാമറ പദ്ധതിയിൽ പ്രതിപക്ഷം ഉന്നയിക്കുന്നത് അടിസ്ഥാന രഹിതമായ അഴിമതി ആരോപണങ്ങളെന്ന് വ്യവസായ മന്ത്രി പി.രാജീവ്. ആരോപണങ്ങൾ ഉന്നയിക്കുന്നതല്ലാതെ അതിന് കൃത്യമായ രേഖകൾ പ്രതിപക്ഷം ഇതുവരെയും പുറത്ത് വിട്ടിട്ടില്ല. പ്രതിപക്ഷ നേതാവായ വിഡി സതീശനും മുൻ പ്രതിപക്ഷ നേതാവായ രമേശ് ചെന്നിത്തലയും പുറത്തുവിട്ട രേഖകളെല്ലാം കെൽട്രോണും പുറത്തുവിട്ടതാണെന്നും രാജീവ് പറഞ്ഞു.

പദ്ധതിയിൽ സർക്കാർ ഇതുവരെ ഒരു രൂപ പോലും ചെലവഴിച്ചിട്ടില്ല. എന്നാൽ മാധ്യമങ്ങൾ അടക്കം ഇക്കാര്യം പറയുന്നില്ല. വസ്‌തുതാ വിരുദ്ധമായ പ്രചരണമാണ് നടക്കുന്നത്. ആരോപണങ്ങൾ വന്നപ്പോൾ തന്നെ എല്ലാ വിഷയങ്ങളും പരിശോധിക്കാൻ സർക്കാർ നിർദേശം നൽകിയിട്ടുണ്ട്. ആ അന്വേഷണ റിപ്പോർട്ട് കിട്ടുന്ന മുറയ്ക്ക് കൂടുതൽ വിശദീകരിക്കുമെന്നും മന്ത്രി പറഞ്ഞു.

മുഖ്യമന്ത്രിയുടെ ബന്ധു പ്രകാശ് ബാബുവും പ്രസാഡിയോ കമ്പനിയും തമ്മിൽ ബന്ധമുണ്ടെങ്കിൽ അതിന് തെളിവ് പ്രതിപക്ഷം കൊണ്ടുവരണം. കരാർ സംബന്ധിച്ചുള്ള മീറ്റിങ്ങിൽ പ്രകാശ് ബാബു പങ്കെടുത്തിട്ടുണ്ടെങ്കിൽ തെളിവ് പുറത്തുവിടണം. നിലവിൽ കെൽട്രോണുമായി കരാർ ഒപ്പിട്ട കമ്പനി പ്രകാശ് ബാബുവിന്‍റെ ഗസ്റ്റ് ഹൗസ് ഉപയോഗിച്ചതിന് പണം നൽകാനുണ്ട് എന്നതാണ് ഇപ്പോൾ പുറത്തുവന്ന രേഖയിലെ ബന്ധം.

ഈ ബന്ധം വച്ച് സർക്കാരോ മുഖ്യമന്ത്രിയോ എന്താണ് പ്രതികരിക്കേണ്ടതെന്നും പി രാജീവ് ചോദിച്ചു. ഒരു ബന്ധവുമില്ല എന്ന് പറയുന്നില്ല. ബന്ധമുണ്ടെങ്കിൽ തെളിവടക്കം പുറത്തുകൊണ്ടുവരണം. ഇത് ചെയ്യാതെ പുകമറ സൃഷ്‌ടിക്കാനാണ് പ്രതിപക്ഷം ശ്രമിക്കുന്നത്. കാമറയുടെ വിലയിൽ അടക്കം പ്രതിപക്ഷം എന്ത് കണക്കുകൂട്ടൽ ആണ് നടത്തുന്നതെന്ന് മനസിലാകുന്നില്ല.

ചെലവായ തുകയും ക്യാമറയുടെ ജന്മവും മാത്രം പരിഗണിച്ചാണ് വില പറയുന്നത്. എന്നാൽ ഇതിന് അനുബന്ധമായി ഒരുക്കേണ്ട സാങ്കേതിക സൗകര്യങ്ങളെ കുറിച്ച് പ്രതിപക്ഷം മിണ്ടുന്നില്ല. ഡേറ്റ ഓപ്പറേറ്റർ, മറ്റു സാങ്കേതിക വിദഗ്‌ധർ തുടങ്ങിയ 146 ഓളം ജീവനക്കാരുടെ അഞ്ച് വർഷത്തെ ശമ്പളം, നിയമ ലംഘനം നടത്തുന്നവർക്ക് പോസ്റ്റ് വഴി നോട്ടിസ് അയക്കുന്നതിനുള്ള ചെലവ്, നികുതി, ഇന്‍റർനെറ്റ് കണക്‌ടിവിറ്റി, വൈദ്യുത ബിൽ, മറ്റു സാങ്കേതികവശങ്ങൾ എന്നിവയെല്ലാം ചേർത്താണ് 256 കോടി രൂപയുടെ കരാർ ഒപ്പിട്ടിരിക്കുന്നത്.

കോടതിക്കെതിരെ ഗുരുതര ആരോപണം: ഇത് പറയാതെയാണ് വലിയ അഴിമതി എന്ന് പ്രതിപക്ഷം പറയുന്നത്. ടെൻഡറിൽ എന്തെങ്കിലും അപാകതകൾ ഉണ്ടെങ്കിൽ പ്രതിപക്ഷത്തിന് കോടതിയെ സമീപിക്കാം. എന്നാൽ നീതിന്യായ വ്യവസ്ഥക്കെതിരെ ഗുരുതരമായ ആരോപണം ഉന്നയിക്കാനാണ് രമേശ് ചെന്നിത്തല ശ്രമിച്ചത്.

തന്‍റെ ഹർജികൾ പൂട്ടി താക്കോലിട്ട് ചീഫ് ജസ്റ്റിസ് അടയിരിക്കുന്നു എന്ന് പറഞ്ഞാൽ അത് നീതിന്യായ വ്യവസ്ഥയ്‌ക്കെതിരായ ഗുരുതരമായ ആരോപണമാണ്. നീതിന്യായ വ്യവസ്ഥയെ അധിക്ഷേപിക്കുന്നത് ഗൗരവകരമായ കുറ്റമാണ്. എന്നാൽ മാധ്യമങ്ങൾ ഇക്കാര്യം ചർച്ച ചെയ്യുന്നില്ല. ഇടതുപക്ഷത്തുള്ള ആരെങ്കിലുമാണ് ഇത്തരത്തിൽ പരാമർശം നടത്തിയിരുന്നെങ്കിൽ പ്രതികരണം എന്താകുമായിരുന്നുവെന്നും മന്ത്രി ചോദിച്ചു.