തിരുവനന്തപുരം : നടിയെ ആക്രമിച്ച കേസിൽ പ്രതിഭാഗം അഭിഭാഷകർക്കെതിരെ ഗുരുതര ആരോപണവുമായി അതിജീവിത. ദിലീപിന്‍റെ അഭിഭാഷകർ പ്രതികളുമായി ചേർന്ന് കേസ് അട്ടിമറിക്കാൻ ശ്രമിക്കുന്നുവെന്ന്‌ ആരോപിച്ച് നടി ബാർ കൗൺസിൽ സെക്രട്ടറിക്ക് പരാതി നല്‍കി.
ദിലീപിന്‍റെ അഭിഭാഷകൻ ബി.രാമൻ പിളള സാക്ഷികളെ നേരിട്ടുവിളിച്ച് സ്വാധീനിക്കാൻ ശ്രമിച്ചെന്ന് പരാതിയില്‍ പറയുന്നു. അദ്ദേഹത്തിന്‍റെ ഓഫിസിൽ വച്ച് പ്രതിയുടെ മൊബൈൽ ഫോണിലെ തെളിവുകൾ നശിപ്പിച്ചു. കേസിലെ 20 സാക്ഷികൾ കൂറുമാറിയതിന് പിന്നില്‍ അഭിഭാഷകരുടെ നിയമപരമല്ലാത്ത ഇടപെടലുണ്ടായെന്നും നടി ആരോപിച്ചു. അഭിഭാഷകവൃത്തിക്ക് ചേരാത്തതും നിയമപരമല്ലാത്തതുമായ ഇടപെടൽ നടത്തിയ ബി.രാമൻ പിള്ള ഉൾപ്പടെയുള്ളവർക്കെതിരെ നടപടി സ്വീകരിക്കണമെന്നാണ് ആവശ്യം.
കേസ് അട്ടിമറിക്കുകയാണെന്ന് ആരോപിച്ച് നേരത്തെ സുപ്രീം കോടതി ചീഫ് ജസ്റ്റിസിനടക്കം നടി പരാതി നൽകിയിരുന്നു. കേസ് അന്വേഷണത്തിന്‍റെ അന്തിമ റിപ്പോർട്ട് അടുത്ത മാസം 18നകം വിചാരണ കോടതിയിൽ സമർപ്പിക്കാനിരിക്കെയാണ് അഭിഭാഷകർക്കെതിരെ ഗുരുതര ആരോപണവുമായി നടി രംഗത്തെത്തിയത്.
