തിരുവനന്തപുരം: 28 വർഷം നീണ്ട നിയമ പോരാട്ടത്തിനൊടുവിൽ സിസ്റ്റർ അഭയ കേസില്‍ വിധി പറഞ്ഞ ചൊവ്വാഴ്ച കോടതി വളപ്പില്‍ നടന്നത് നാടകീയ രംഗങ്ങള്‍. കൊലക്കേസിലെ പ്രതികളായ സിസ്റ്റർ സെഫിയും ഫാ. തോമസ് കോട്ടൂരും ബന്ധുക്കള്‍ക്കും അഭിഭാഷകർക്കുമൊപ്പം 10.20 ന് കോടതി വളപ്പിലെത്തി. കൊവിഡ് പശ്‌ചാത്തലത്തിൽ ശാരീരിക അകലം പാലിച്ചാണ് കോടതി മുറി ഒരുക്കിയിരുന്നത്.
10.42 ന് സിബിഐ പ്രോസിക്യൂട്ടർ കോടതിയിൽ പ്രവേശിച്ചതിനു തൊട്ടുപിന്നാലെ പ്രതിഭാഗം അഭിഭാഷകരുമെത്തി. 10.50 ഓടെ തോമസ് കോട്ടൂരും സെഫിയും കോടതിക്കു പുറത്തെ വരാന്തയിൽ ഇരുന്നു. കോടതി നടപടികൾ ആരംഭിക്കുന്നതിനു മുൻപ് ആദ്യം തോമസ് കോട്ടൂർ കോടതി മുറിയിലേക്കു കയറി, തൊട്ടു പിന്നാലെ സെഫിയും. പതിവു പോലെ 11 മണിക്ക് കോടതി വളപ്പിലെ മണി മുഴങ്ങി ഇതോടെ ജഡ്ജി സനൽകുമാർ കോടതിയിലെത്തി നടപടികൾ ആരംഭിച്ചു.
രണ്ടു കേസുകൾ പരിഗണിച്ച ശേഷം 11.03ന് അഭയ കേസ് നമ്പർ ബെഞ്ച് ക്ലാർക്ക് വിളിച്ചു. ഇതേ തുടർന്ന് പ്രതികളായ തോമസ് കോട്ടൂരും സെഫിയും പ്രതികൂട്ടിലേക്കു കയറി. പ്രതികള്‍ കുറ്റം ചെയ്തതായി തെളിഞ്ഞെന്ന് സിബിഐ ജഡ്ജി പറഞ്ഞതോടെ രണ്ടു പ്രതികളും മുഖാമുഖം നോക്കി അസ്വസ്ഥരായി. ഒന്നാം പ്രതി തോമസ് കോട്ടൂരിനെതിരെ കൊലക്കുറ്റം തെളിവു നശിപ്പിക്കൽ, അതിക്രമിച്ചു കയറൽ എന്നീ ഇന്ത്യൻ ശിക്ഷ നിയമത്തിലെ 302, 201, 449 വകുപ്പുകൾ നിലനിൽക്കുമെന്ന് കോടതി പറഞ്ഞു.
മൂന്നാം പ്രതി സെഫിക്കെതിരെ കൊലക്കുറ്റവും, തെളിവു നശിപ്പിക്കലുമാണ് കണ്ടെത്തിയത്. അഞ്ചു മിനിറ്റിനുള്ളിൽ നടപടികൾ പൂർത്തിയാക്കി വിധി പറയാൻ മാറ്റിയതോടെ സെഫി പൊട്ടിക്കരഞ്ഞു. എന്നാല്‍ തോമസ് കോട്ടൂറിന് ഭാവവ്യത്യാസമൊന്നും ഇല്ലായിരുന്നു.
