ശബരിമല: മുന്കരുതലിന്റെ ഭാഗമായി ശബരിമല സന്നിധാനത്ത് വെള്ളിയാഴ്ച രാത്രി നടയടക്കും വരെ സുരക്ഷ ശക്തമാക്കി. സന്നിധാനം പൊലീസ് സ്പെഷല്‍ ഓഫീസര്‍ ഡോ. എ. ശ്രീനിവാസ് വാര്‍ത്താ സമ്മേളനത്തിലാണ് ഇക്കാര്യം അറിയിച്ചത്.ദേവസ്വം ആചാരങ്ങളെ ബാധിക്കാത്ത വിധമാണ് നിയന്ത്രണം. ആചാരങ്ങള്‍ക്കും സുരക്ഷയ്ക്കും ഭംഗമില്ലാത്ത രീതിയില്‍ തീര്‍ഥാടകര്‍ക്ക് ദര്‍ശനത്തിന് സൗകര്യം ഒരുക്കുമെന്നും അദ്ദേഹം പറഞ്ഞു.
വെള്ളിയാഴ്ച മുതല്‍ സന്നിധാനത്ത് ഹൈപോയിന്റ് ബൈനോക്കുലര്‍ മോണിറ്ററിംഗ് ഉണ്ടാവും. വ്യാഴാഴ്ച രാത്രി നട അടച്ച ശേഷം സോപാനത്ത് ബോംബ് സ്‌ക്വാഡ് പരിശോധന നടത്തുമെന്നും അദ്ദേഹം പറഞ്ഞു. സന്നിധാനത്ത് വെള്ളം സംഭരിച്ചിരിക്കുന്ന എല്ലാ സ്ഥലങ്ങളിലും പൊലീസിനെ വിന്യസിക്കും. എല്ലായിടത്തും ഫയര്ഫോഴ്സിന്റെയും ബോംബ് സ്‌ക്വാഡിന്‍റേയും പ്രത്യേക പരിശോധന ഉണ്ടായിരിക്കുമെന്നും അദ്ദേഹം അറിയിച്ചു. സന്നിധാനത്ത് എല്ലാ വകുപ്പുകളുടെയും സേവനത്തിന് മതിയായ ജീവനക്കാര്‍ ഉണ്ടെന്ന് ഉറപ്പാക്കും. പമ്പയില്‍ ട്രാക്ടറുകള്‍ പരിശോധിക്കുന്നത് തുടരുമെന്നും സന്നിധാനം പൊലീസ് സ്പെഷല്‍ ഓഫീസര്‍ ഡോ. എ. ശ്രീനിവാസ് പറഞ്ഞു.
ഭക്തര്‍ക്കും ജീവനക്കാര്‍ക്കുമുള്ള നിര്‍ദേശങ്ങള്‍
- നടപ്പന്തല്‍ അവസാനം മുതല്‍ മാളികപ്പുറത്ത് നിന്ന് ഇറങ്ങും വരെ മൊബൈല്‍ ഫോണ്‍ സ്വിച്ച് ഓഫ് ചെയ്യണം.
- വെള്ളിയാഴ്ച പതിനെട്ടാംപടി കയറുന്നവരെ സോപാനത്തിന്‍റെ ഇടതുവശത്ത് നെയ്ത്തേങ്ങ ഉടക്കാന്‍ അനുവദിക്കില്ല.
- ഭക്തര്‍ മാളികപ്പുറത്തേക്ക് പോകുന്ന വഴിയിലുള്ള നെയ്‌തോണിയില്‍ വേണം നെയ്‌തേങ്ങ ഉടക്കാന്‍
- എല്ലാ ജീവനക്കാരും തിരിച്ചറിയല്‍ കാര്‍ഡ് ധരിക്കണം.
