പത്തനംതിട്ട: ശബരിമലയിലെ വിഷു ഉത്സവം കണക്കിലെടുത്ത് നാളെ മുതല്‍ പമ്പ അണക്കെട്ടില്‍ നിന്ന് ജലം നിയന്ത്രിതമായി തുറന്നുവിടും. പമ്പ ത്രിവേണി സ്നാന സരസിലും അനുബന്ധ കടവുകളിലും ജല ലഭ്യത ഉറപ്പാക്കുന്നതിനായാണ് നടപടി. നാളെ മുതല്‍ ഈ മാസം 17 വരെ പ്രതിദിനം 25,000 ഘന മീറ്റര്‍ ജലമാണ് തുറന്നു വിടുക. ജില്ല കലക്ടറും ദുരന്തനിവാരണ അതോറിറ്റി ചെയര്‍മാനുമായ ഡോ. നരസിംഹുഗാരി തേജ് ലോഹിത് റെഡ്ഡിയാണ് കക്കാട് കെഎസ്ഇബി ഡാം സേഫ്റ്റി ഡിവിഷന്‍ എക്സിക്യുട്ടീവ് എഞ്ചിനീയര്‍ക്ക് ഇതിന് അനുമതി നല്‍കിയത്.
ആകെ 2,25,000 ഘന മീറ്റര്‍ ജലമാണ് ഇക്കാലയളവില്‍ അണക്കെട്ടില്‍ നിന്നും തുറന്നുവിടുക. പമ്പ നദിയുടെയും കക്കാട്ട് ആറിന്‍റെയും തീരത്ത് താമസിക്കുന്നവരും തീര്‍ഥാടകരും ജാഗ്രത പുലര്‍ത്തണമെന്ന് ജില്ല കലക്ടര്‍ അറിയിച്ചു.
