പത്തനംതിട്ട: കൊവിഡ് ആശങ്കയ്ക്കിടെ ശബരിമല ദര്‍ശനത്തിന്‍റെ മണ്ഡല-മകരവിളക്ക് കാലത്തിന് തുടക്കം. സമഭാവനയുടെ ശരണമന്ത്രങ്ങള്‍ മുഴക്കി വ്രതശുദ്ധിയോടെ ശബരീശ സന്നിധിയിലെത്തുന്ന ഓരോ തീര്‍ഥാടകനെയും കാത്തിരിക്കുന്നത് പതിവ് തെറ്റിയുള്ള അനുഭവങ്ങള്‍. സ്വന്തം ആരോഗ്യ സംരക്ഷണത്തിനൊപ്പം സഹതീര്‍ഥാടകരെയും പരിഗണിക്കേണ്ട വിധത്തില്‍ ഒട്ടേറെ കൊവിഡ് നിയന്ത്രണ-മാര്‍ഗ നിര്‍ദേശങ്ങളാണ് സര്‍ക്കാരും ദേവസ്വം ബോര്‍ഡും മുന്നോട്ട് വെച്ചിരിക്കുന്നത്.
മുന്‍കൂട്ടി വെര്‍ച്വല്‍ ക്യൂ വഴി ബുക്ക് ചെയ്തവര്‍ക്ക് മാത്രമാണ് ഇത്തവണ ദര്‍ശനാനുമതി. ബുക്ക് ചെയ്ത രേഖയുടെ പകര്‍പ്പിനൊപ്പം മലകയറാന്‍ പ്രാപ്തരാണെന്ന സര്‍ട്ടിഫിക്കറ്റും തിരിച്ചറിയല്‍ രേഖയും കൈയില്‍ കരുതണം. പ്രതിദിനം ആയിരം പേര്‍ക്ക് മാത്രമാണ് അനുവാദം. വാരാന്ത്യങ്ങളില്‍ 2000 പേര്‍ക്കും മണ്ഡലപൂജ-മകര വിളക്ക് ദിവസങ്ങളില്‍ 5000 തീര്‍ഥാടകര്‍ക്കും മലകയറാം. 10 വയസിന് താഴെയും 60 വയസിന് മുകളിലുള്ളവര്‍ക്കും ഇത്തവണ അനുമതിയില്ല. 24 മണിക്കൂറിനുള്ളില്‍ പരിശോധന നടത്തി കൊവിഡ് നെഗറ്റീവ് സര്‍ട്ടിഫിക്കറ്റ് ഹാജരാക്കണം.
ഇത്തവണ തീര്‍ഥാടകര്‍ക്ക് പമ്പ വഴി മാത്രമാണ് പ്രവേശനം. കാനനപാതകളിലൂടെ യാത്രക്ക് അനുമതിയില്ല. മല കയറുമ്പോള്‍ മാസ്ക് നിര്‍ബന്ധമല്ല. തീര്‍ഥാടകര്‍ക്ക് പമ്പ സ്നാനത്തിനും ഇത്തവണ വിലക്കുണ്ട്. മണപ്പുറത്ത് ഷവറുകള്‍ സ്ഥാപിച്ചിട്ടുണ്ട്. ദേവസ്വം ബോര്‍ഡിന്‍റെ ശുചിമുറികള്‍ പമ്പ, നിലക്കല്‍, സന്നിധാനം എന്നിവിടങ്ങളില്‍ സജ്ജമാണ്. നെയ്യഭിഷേകം നേരിട്ട് നടത്തുന്നതില്‍ വിലക്കുള്ളതിനാല്‍ നെയ്‌തേങ്ങ ദേവസ്വം ബോര്‍ഡ് കൗണ്ടറില്‍ നല്‍കാം. സന്നിധാനത്ത് വിരി വയ്ക്കാന്‍ സൗകര്യമില്ലാത്തതിനാല്‍ തീര്‍ഥാടകര്‍ ദര്‍ശനം കഴിഞ്ഞാലുടന്‍ മലയിറങ്ങണം. കൊവിഡ് ടെസ്റ്റിന് വിധേയരായ ചുമട്ടുകാരുടെ സൗകര്യം ലഭ്യമായതിനാല്‍ ഡോളി സര്‍വീസിന് മുടക്കില്ല.
ഹൈന്ദവര്‍ക്ക് ഏറ്റവും പ്രാധാന്യമേറിയതാണ് മണ്ഡലകാല വ്രതം. ശാസ്താപ്രീതിക്കായി വൃശ്ചികം ഒന്നു മുതല്‍ ധനു 11 വരെ 41 ദിവസമാണ് വ്രതമനുഷ്ഠിക്കുന്നത്. ഇക്കാലത്ത് മദ്യം, മാംസാഹാരം ഉള്‍പ്പെടെയുള്ളവ പൂര്‍ണമായി ഒഴിവാക്കണം. ആചാരപ്രകാരം ശബരിമല ദര്‍ശനം കഴിഞ്ഞ് ക്ഷേത്ര സന്നിധിയിലെത്തി മാല ഊരിയാണ് വ്രതം അവസാനിപ്പിക്കേണ്ടത്.
ഡിസംബര്‍ 26ന് മണ്ഡല പൂജക്ക് ശേഷം രാത്രി 10ന് നട അടക്കും. പിന്നീട് 30ന് മകരവിളക്ക് പൂജകള്‍ക്കായി നട തുറക്കും. ജനുവരി 14നാണ് മകരവിളക്ക്. 19ന് വൈകിട്ട് വരെ തീര്‍ഥാടകര്‍ക്ക് ദര്‍ശനത്തിന് അനുമതിയുണ്ട്. 20ന് നട അടക്കുന്നതോടെ മണ്ഡല മകരവിളക്ക് തീര്‍ഥാടനത്തിന് സമാപനമാകും.
യുവതീപ്രവേശം അനുവദിച്ച സുപ്രീംകോടതി വിധിക്ക് പിന്നാലെ ആക്ടിവിസ്റ്റുകളായ രഹ്ന ഫാത്തിമ, കനക ദുര്‍ഗ, ബിന്ദു അമ്മിണി, മനീതി സംഘം, തൃപ്തി ദേശായി അടക്കമുള്ളവര്‍ ദര്‍ശനത്തിനെത്തിയത് കഴിഞ്ഞ വര്‍ഷങ്ങളില്‍ ശബരിമലയെ സംഘര്‍ഷ ഭൂമിയാക്കിയിരുന്നു. സ്ത്രീ പ്രവേശനത്തിന് പിന്നാലെ സംസ്ഥാന സര്‍ക്കാരിനെതിരെ രാഷ്ട്രീയ പോര് രൂക്ഷമായതും പ്രതിഷേധം തെരുവിലേക്ക് നീണ്ടതും ശബരിമല തീര്‍ഥാടന ചരിത്രത്തിലെ പകരം വയ്ക്കാനാകാത്ത ഏടുകളായി. ഇത് കഴിഞ്ഞ മണ്ഡല-മകര വിളക്ക് കാലത്ത് തീര്‍ഥാടകരുടെ എണ്ണത്തേയും വരുമാനത്തേയും വലിയ രീതിയില്‍ ബാധിച്ചിരുന്നു. കഴിഞ്ഞ വര്‍ഷത്തെ ആകെ നടവരവില്‍ 100 കോടിയുടെ കുറവാണ് രേഖപ്പെടുത്തിയത്.
യുവതീ പ്രവേശന വിവാദങ്ങള്‍ കെട്ടൊടുങ്ങും മുമ്പേ കൊവിഡ് ഉയര്‍ത്തിയ വെല്ലുവിളിയേയും അതിജീവിച്ച് തീര്‍ഥാടനം പരാതികളില്ലാതെ പൂര്‍ത്തിയാക്കുകയെന്ന വലിയ ലക്ഷ്യമാണ് സര്‍ക്കാരിനും ദേവസ്വം ബോര്‍ഡിനുമുള്ളത്. ആരോഗ്യവകുപ്പ് നിര്‍ദേശങ്ങള്‍ പാലിച്ചാല്‍ ജനുവരി 20 വരെ നീളുന്ന തീര്‍ഥാടനം സുരക്ഷിതമാക്കാം.
