പത്തനംതിട്ട: ശബരിമലയില്‍ മകര വിളക്ക് ദര്‍ശനത്തിനു ഇനി മണിക്കൂറുകൾ മാത്രം. ഇന്നാണ് മകരവിളക്ക്. മകര വിളക്ക് ദര്‍ശനം കാത്ത് ഭക്തസാഗരം സന്നിധാനത്തും പരിസരങ്ങളിലും കാത്ത് നിൽക്കുകയാണ്. ഇന്ന് ഉച്ചയ്ക്ക് ഒരു മണിക്ക് അടയ്ക്കുന്ന നട വൈകിട്ട് അഞ്ചിന് തുറക്കും.
തിരുവാഭരണ ഘോഷയാത്ര ആറ് മണിയോടെ സന്നിധാനത്തെത്തും. 5.15 ന് തിരുവാഭരണ ഘോഷയാത്രയെ സ്വീകരിക്കുവാനായി ദേവസ്വം ബോ൪ഡ് പ്രതിനിധികൾ ശരംകുത്തിയിലേക്ക് പോകും. തുട൪ന്ന് കൊടിമരച്ചുവട്ടിൽ തിരുവാഭരണ ഘോഷയാത്രയെ സ്വീകരിക്കും.
പതിനെട്ടാം പടി കയറി സോപാനത്തു എത്തുന്ന തിരുവാഭരങ്ങൾ തന്ത്രി കണ്ഠര് മഹേഷ്‌ മോഹനര്, മേൽ ശാന്തി പി എൻ മഹേഷ്‌ എന്നിവർ ചേർന്ന് ഏറ്റുവാങ്ങും. പിന്നീട് തിരുവാഭരണങ്ങള്‍ ദീപാരാധനയ്ക്കായി ശ്രീകോവിലിലേക്ക് കൊണ്ടുപോകും. ആറരയോടെ തിരുവാഭരണം ചാർത്തി മഹാദീപാരാധന നടക്കും. ഈ സമയത്തു ആകാശത്തു മകരജ്യോതി ദൃശ്യമാകും. സന്നിധാനം ശരണ മന്ത്രങ്ങളാൽ നിറഞ്ഞ് നിൽക്കുമ്പോൾ പൊന്നമ്പലമേട്ടിൽ മകര വിളക്കും തെളിയും.
മകര ജ്യോതി ദര്‍ശിക്കാൻ പ്രധാനമായും 10 വ്യൂ പോയിന്‍റുകള്‍ ഉണ്ട്. കനത്ത സുരക്ഷ ക്രമീകരണങ്ങളാണ് ഒരുക്കിയിട്ടുള്ളത്. ഡ്രോണ്‍ നിരീക്ഷണമുൾപ്പെടെ ഏര്‍പ്പെടുത്തിയിട്ടുണ്ട്. എട്ട് ഡിവൈഎസ്‌പിമാരുടെ നേതൃത്വത്തിലാണ് സുരക്ഷ ക്രമീകണങ്ങൾ. മൂന്നര ലക്ഷത്തോളം ഭക്തർ ശബരിമലയിലും പരിസരത്തുമായി മകരജ്യോതിയും,മകര വിളക്കും ദർശിക്കുമെന്നാണ് കണക്ക് കൂട്ടുന്നത്.
അതേസമയം ഈ വ൪ഷത്തെ മകരവിളക്ക് ഉത്സവത്തിന് കനത്ത സുരക്ഷയാണ് ഒരുക്കിയിട്ടുള്ളത്. ഇതിനായി ആയിരം പൊലീസ് ഉദ്യോഗസ്ഥരെ കൂടി അധികം നിയോഗിച്ചിട്ടുണ്ട്. നാല് എസ്.പി.മാ൪, 19 ഡിവൈ.എസ്.പിമാ൪, 15 ഇ൯സ്പെക്‌ട൪മാ൪ അടക്കമാണ് ആയിരം പേരെ അധികമായി നിയോഗിച്ചിരിക്കുന്നത്. സന്നിധാനം, പമ്പ, നിലയ്ക്കൽ, പാണ്ടിത്താവളം തുടങ്ങിയ ഇടങ്ങളിലാണ് അധിക വിന്യാസം.
മകരവിളക്ക് ഉത്സവം സുഗമമായി നടത്തുന്നതിന് വേണ്ട ക്രമീകരണങ്ങൾ എല്ലാം പൊലീസ് ഒരുക്കിയിട്ടുണ്ട്. മകരവിളക്ക് കഴിഞ്ഞ് മലയിറങ്ങുന്ന ഭക്ത൪ക്കായി കൃത്യമായ എക്‌സിറ്റ് പ്ലാനാണ് ഒരുക്കിയിരിക്കുന്നത്. മകരവിളക്ക് ദ൪ശനത്തിനായി ഭക്ത൪ ഒത്തുകൂടുന്ന ഇടങ്ങളിൽ എല്ലാം വെളിച്ചം ഉൾപ്പെടെയുള്ള ക്രമീകരണങ്ങൾ സജ്ജീകരിച്ചിട്ടുണ്ട്.
മാത്രമല്ല മകരവിളക്ക് മഹോത്സവത്തിന് സന്നിധാനത്തും മറ്റ് അനുബന്ധ പ്രദേശങ്ങളിലുമായി ഫയർഫോഴ്‌സിന്‍റെ 35 സ്ട്രക്‌ചര്‍ ടീമും രംഗത്തുണ്ട്. കുഴഞ്ഞു വീഴുന്നവരെയും മറ്റ് ആരോഗ്യ പ്രശ്‌നങ്ങൾ നേരിടുന്നവരെയും അടിയന്തരമായി ആരോഗ്യ കേന്ദ്രത്തിൽ എത്തിക്കുകയാണ് സ്ട്രക്‌ചര്‍ ടീമിന്‍റെ ദൗത്യം. വിവിധ പോയിന്‍റുകളിൽ 24 മണിക്കൂറും ഇവർ സജ്ജരായിരിക്കും. സിവിൽ ഡിഫൻസ് വളണ്ടിയർമാരെയും ആപ്‌ത മിത്ര വളണ്ടിയർമാരെയും ഉൾപ്പെടുത്തിയാണ് സ്ട്രക്‌ചര്‍ ടീമിന്‍റെ പ്രവർത്തനം.
മരക്കൂട്ടം മുതൽ പാണ്ടിത്താവളം വരെ 12 പോയിന്‍റുകളാണ് ഫയർഫോഴ്‌സിന് ഉള്ളത്. കൂടുതൽ മുൻകരുതലിന്‍റെ ഭാഗമായി പാചകവാതകം ഉപയോഗിക്കുന്ന സന്നിധാനത്തെയും പരിസരത്തെയും ഹോട്ടലുകളിലും ദേവസ്വം അനുബന്ധ സ്ഥാപനങ്ങളിലും ഇതിനോടകം പരിശോധന പൂർത്തിയാക്കി വേണ്ട നിർദേശങ്ങൾ നൽകിയിട്ടുണ്ട്. ഏതെങ്കിലും വിധത്തിൽ തീപിടിത്തം ഉണ്ടായാൽ നേരിടുന്നതിനായി എല്ലാ പോയിന്‍റുകളിലെയും ഫയർ ഹൈഡ്രന്‍റുകളുടെ പ്രവർത്തന ക്ഷമത ഉറപ്പാക്കിയിട്ടുണ്ട്. ഫയർ എക്സ്റ്റിങ്ങ്യൂഷറുകളും സജ്ജമാണ്. മകരവിളക്ക് വ്യൂ പോയിന്‍റുകളിലും ഫയർഫോഴ്‌സിന്‍റെ സേവനമുണ്ടായിരിക്കും.
Also Read:ശബരിമല മകരവിളക്ക്: സന്നിധാനത്ത് സുരക്ഷ ഉറപ്പാക്കാൻ 1000 പൊലീസുകാരെകൂടി നിയോഗിക്കും
