പത്തനംതിട്ട: തെരഞ്ഞെടുപ്പിന് ഒരാഴ്ച മാത്രം ബാക്കി നിൽക്കെ കോന്നിയിൽ പ്രചാരണത്തിന് ചൂടേറുന്നു. കോന്നി തങ്ങളുടെ കോട്ടയാക്കാൻ പതിനെട്ടടവും പയറ്റുകയാണ് മുന്നണികൾ. മൂന്ന് മുന്നണികളും ഒരു പോലെ വിജയം പ്രതീക്ഷിക്കുന്ന മണ്ഡലത്തിൽ സർക്കാരിന്റെ വികസന പ്രവർത്തനങ്ങൾ എടുത്ത് കാണിച്ചും ശബരിമല വിഷയത്തിലെ നിലപാട് പറഞ്ഞുമാണ് എൽ.ഡി.എഫ് വോട്ടു തേടുന്നത്. അടൂർ പ്രകാശ് മണ്ഡലത്തിൽ നടപ്പാക്കിയ വികസന പ്രവർത്തനങ്ങളും ശബരിമല വിഷയവുമാണ് യു.ഡി.എഫിന്‍റെ പ്രധാന പ്രാചരണ വിഷയങ്ങൾ. ശബരിമല വിഷയത്തിൽ രണ്ട് മുന്നണികളും ജനങ്ങളെ കബളിപ്പിച്ചുവെന്നും കോന്നിയിൽ വിജയിപ്പിച്ചാൽ കേന്ദ്ര സർക്കാരിന്റെ നേതൃത്വത്തിൽ പുതിയ വികസന പ്രവർത്തനങ്ങൾ കൊണ്ടുവരുമെന്നുമുള്ള പ്രചാരണമാണ് ബി.ജെ.പി നടത്തുന്നത്.
പൊടിപാറുന്ന പ്രചാരണമാണ് മണ്ഡലത്തിലുടനീളം നടക്കുന്നത്. ഗവി, ആങ്ങമൂഴി, മൂഴിയാർ, കക്കി, കൊച്ചു പമ്പ, ആനത്തോട്, അരുവാപ്പുലം എന്നിവിടങ്ങളില്‍ മൂന്നു മുന്നണികളും പ്രചാരണം ഏറെക്കുറെ പൂർത്തിയാക്കി. മുഖ്യമന്ത്രി പിണറായി വിജയൻ, സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ, സിപിഐ സംസ്ഥാന സെക്രട്ടറി കാനം രാജേന്ദ്രൻ, മന്ത്രിമാരായ എം.എം.മണി, കെ.കെ ശൈലജ, മേഴ്സിക്കുട്ടിയമ്മ, കെ.രാജു തുടങ്ങിയവർ എൽ.ഡി.എഫ് സ്ഥാനാർഥി കെ.യു.ജനീഷ് കുമാറിന്റെ പ്രചാരണാർഥം മണ്ഡലത്തിലെ വിവിധ ഭാഗങ്ങളിൽ പ്രചാരണം നടത്തി.
മുൻ മുഖ്യമന്ത്രി ഉമ്മൻചാണ്ടി കലഞ്ഞൂർ, പ്രമാടം, വള്ളിക്കോട് പഞ്ചായത്തുകളിലെ കുടുംബയോഗങ്ങളിൽ പങ്കെടുത്തു. പ്രതിപക്ഷ നേതാവ് രമേശ് ചെന്നിത്തല, കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍, രമ്യ ഹരിദാസ് എം.പി, വിടി ബൽറാം എം.എൽ.എ, തിരുവഞ്ചൂർ രാധാകൃഷ്‌ണൻ തുടങ്ങിയവർ യുഡിഎഫ് സ്ഥാനാര്‍ഥി പി. മോഹന്‍രാജിന് വോട്ടഭ്യര്‍ഥിച്ച് കോന്നിയിൽ എത്തിയിരുന്നു. ഇടഞ്ഞു നിന്ന അടൂർ പ്രകാശ് തെരഞ്ഞെടുപ്പിന്റെ ചുക്കാൻ ഏറ്റെടുത്തതോടെ യു.ഡി.എഫ് പ്രവർത്തകർ കൂടുതൽ ആവേശത്തിലാണിപ്പോള്‍.
കെ.സുരേന്ദ്രന്റെ പ്രചാരണാർഥം എൻ.ഡി.എ. നേതാക്കളായ കുമ്മനം രാജശേഖരൻ, എ.പി. അബ്ദുള്ളകുട്ടി, ബി.ഡി.ജെ.എസ്. അധ്യക്ഷൻ തുഷാർ വെള്ളാപ്പള്ളി, ബി.ഡി.ജെ.എസ് ഉപാധ്യക്ഷൻ കെ.പദ്മകുമാർ, ബി.ജെ.പി സംസ്ഥാന ഉപാധ്യക്ഷൻ ജി.രാമൻ നായർ എന്നിവര്‍ കോന്നിയില്‍ എത്തി. സുരേഷ് ഗോപി എം.പി, ശോഭാ സുരേന്ദ്രൻ, സംവിധായകൻ രാജസേനൻ, തഴവ സഹദേവൻ, പ്രമീളാദേവി, ആനന്ദ് രാജൻ തുടങ്ങിയവർ വിവിധ സ്ഥലങ്ങളിൽ വോട്ടർമാരെ നേരിൽകണ്ട് വോട്ടഭ്യർഥിച്ചു.
