പത്തനംതിട്ട: ഭാര്യയെ തീകൊളുത്തി കൊലപ്പെടുത്തിയ ശേഷം ഭർത്താവ് ആത്മഹത്യ ചെയ്‌തു. അപകടത്തിൽ മകൾക്കും ഗുരുതരമായി പൊള്ളലേറ്റു. തിരുവല്ല നെടുമ്പ്രം നാലാം വാർഡിൽ മാത്തുക്കുട്ടി (65), ഭാര്യ സാറാമ്മ (59) എന്നിവരാണ് മരിച്ചത്. പൊള്ളലേറ്റ മകൾ ലിജി(35)യെ ഗുരുതര പരിക്കുകളോടെ ആലപ്പുഴ വണ്ടാനം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
ഞായറാഴ്‌ച രാത്രി പന്ത്രണ്ടരയോടെ ആയിരുന്നു സംഭവം. കുടുംബ വഴക്കിനെ തുടർന്നാണ് സംഭവമെന്നാണ് പ്രാഥമിക നിഗമനം. മാത്തുക്കുട്ടി കന്നാസിൽ കരുതിയിരുന്ന പെട്രോൾ ഭാര്യ സാറാമ്മയുടെ ദേഹത്തൊഴിച്ച് തീകൊളുത്തുകയായിരുന്നു. അമ്മയെ തീകൊളുത്തുന്നത് തടയാൻ ശ്രമിക്കുമ്പോഴാണ് മകൾ ലിജിക്ക് ഗുരുതരമായി പൊള്ളലേറ്റത്. പുളിക്കീഴ് പൊലീസ് സ്ഥലത്തെത്തി പരിശോധന നടത്തി. സംഭവത്തില്‍ അന്വേഷണം ആരംഭിച്ചു.
