പാലക്കാട്:കൊവിഡ് പ്രതിസന്ധിയിലകപ്പെട്ട പ്രവാസികൾക്കായി തൃത്താല ജനമൈത്രി പൊലീസ് നിർമിച്ച സംഗീത ആൽബം ശ്രദ്ധേയമാകുന്നു. കരുതലായ് കാവലായ് എന്ന പേരിലാണ് സംഗീത ആൽബം പുറത്തിറക്കിയിരിക്കുന്നത്. പ്രവാസികളുടെ സംരക്ഷണം നമ്മുടെ ഓരോരുത്തരുടെയും ഉത്തരവാദിത്വമാണെന്നും, പ്രവാസികൾക്കൊപ്പം ഞങ്ങളുണ്ടെന്നും പ്രഖ്യാപിച്ചു കൊണ്ട് തൃത്താല ജനമൈത്രി പൊലീസ് നിർമിക്കുന്ന ഡോക്യുമെന്‍ററിയുടെ ഭാഗമായിട്ടാണ് സംഗീത ആൽബം പുറത്തിറക്കിയത്. സംഗീത ആൽബം വി.ടി.ബൽറാം എം.എൽ.എ. പ്രകാശനം ചെയ്തു.
പ്രശസ്‌ത കവിയും സിനിമ ഗാനരചയിതാവുമായ റഫീഖ് അഹമ്മദ് രചിച്ച ഗാനത്തിന് നാസർ മാലിക്കാണ് സംഗീതം നൽകിയത്. നിഖിൽ പ്രഭയും, ഉണ്ണിമായ ദാസും ചേർന്നാണ് പാടിയത്.മനീഷ് എഡിറ്റിംഗ് നിർവഹിച്ച ഗാനത്തിന് ദൃശ്യാവിഷ്‌കരണം ഒരുക്കിയത് ശരത് രംഗസൂര്യ ആണ്. കൊവിഡ് 19 എന്ന മഹാമാരി പ്രവാസികളെ പിടിമുറുക്കിയപ്പോൾ അവരുടെ സന്താപങ്ങളും, നെടുവീർപ്പുകൾക്കുമൊപ്പം, പ്രവാസികൾക്ക് കരുതലും, സംരക്ഷണവും നൽകാൻ പൊലീസ് സേന കൂടെയുണ്ടെന്ന സന്ദേശമാണ് പാട്ടിൽപങ്കുവെച്ചിട്ടുള്ളത്.
