പാലക്കാട് : പുലിക്കുഞ്ഞിനെ സുരക്ഷിതകേന്ദ്രത്തിലേക്ക് മാറ്റിയെങ്കിലും പുലി വീണ്ടുമെത്തിയേക്കുമോ എന്ന ഭയത്തിൽ ഉറക്കം നഷ്‌ടപ്പെട്ടിരിക്കുകയാണ് പപ്പാടിക്കാർക്ക്. ആളൊഴിഞ്ഞ വീട്ടിൽ നിന്ന് പുലിക്കുട്ടികളെ കിട്ടിയതിൽ പിന്നെ ശ്വാസമടക്കിപിടിച്ചാണ് പ്രദേശവാസികൾ നേരം വെളുപ്പിക്കുന്നത്. വനാതിർത്തിയോടുചേർന്ന ജനവാസ മേഖലകളിൽ നായ്ക്കളുടെ തലയോട്ടികൾ കൂടി കാണപ്പെട്ടതോടെ പുലി സ്ഥിരമായെത്തുന്നുണ്ടെന്ന് ജനങ്ങൾ പറയുന്നു.
പ്രദേശത്ത് നിന്നും ഇതുവരെ വളർത്തുനായ്‌ക്കളെ നഷ്‌ടപ്പെട്ടിട്ടില്ലാത്തതിനാൽ തെരുവുനായ്‌ക്കളുടെ തലയോട്ടികളായിരിക്കുമെന്നാണ് കരുതുന്നത്. രാത്രികളിൽ വനംവകുപ്പിന്‍റെ ദ്രുത പ്രതികരണ സേന വനയോരപ്രദേശങ്ങളിൽ പട്രോളിങ് നടത്തുണ്ടെങ്കിലും നാട്ടുകാരിലെ ഭയം വിട്ടൊഴിഞ്ഞിട്ടില്ല.
കഴിഞ്ഞദിവസം പുലിപ്പേടി മാറ്റാൻ അത് പ്രസവിച്ച വീടും പരിസരവും വനം വകുപ്പിന്‍റെ നേതൃത്വത്തിൽ വൃത്തിയാക്കിയിരുന്നു. വേനലടുത്തതോടെ കൂടുതൽ വന്യമൃഗങ്ങൾ കാടിറങ്ങുമെന്ന ഭയത്തിലാണ് മലയോരവാസികൾ. ജില്ലയിൽ മലമ്പുഴ, അകത്തേത്തറ, മണ്ണാർക്കാട്, നെല്ലിയാമ്പതി, കൊല്ലങ്കോട്, മുണ്ടൂർ എന്നിവിടങ്ങളിലാണ് പുലിഭീതിയുള്ളത്. ആനയും പന്നിയും സ്ഥിരമായി ജില്ലയിലെ വിവിധ പ്രദേശങ്ങളിൽ കാടിറങ്ങിയെത്തുന്നുണ്ട്.
കഴിഞ്ഞ ഞായറാഴ്‌ചയാണ്‌ ഉമ്മിനി പപ്പാടിയിലെ പൊളിഞ്ഞ വീടിനുള്ളിൽനിന്ന്‌ അമ്മപ്പുലിയേയും രണ്ട്‌ കുഞ്ഞുങ്ങളെയും കണ്ടത്‌. കുഞ്ഞുങ്ങളെ കൂട്ടില്‍വച്ച് പുലിയെ പിടിക്കാന്‍ ശ്രമിച്ചെങ്കിലും കൂട്ടില്‍ കയറാതെ ഒരു കുഞ്ഞുമായി പുലി പോകുകയായിരുന്നു. അടുത്ത ദിവസം അടുത്ത കുഞ്ഞിനെ വച്ചുനോക്കിയെങ്കിലും പുലി കുഞ്ഞിനെ എടുത്തില്ല. വ്യാഴാഴ്‌ച പുലിക്കുഞ്ഞിനെ തൃശൂർ അകമല ഫോറസ്‌റ്റ്‌ സ്‌റ്റേഷനിലേക്ക്‌ മാറ്റി. പുലിക്കുഞ്ഞിനെ ഇനി ഇവിടെ സംരക്ഷിക്കാനാണ് വനം വകുപ്പിന്‍റെ തീരുമാനം.
പുലിസാന്നിധ്യം പൂർണമായി ഒഴിവായെന്ന് ഉറപ്പാക്കാനുള്ള നടപടി അടിയന്തരമായി കൈക്കൊള്ളുമെന്ന് സ്ഥലം സന്ദർശിച്ച എ.പ്രഭാകരൻ എംഎൽഎ പറഞ്ഞു.
