പാലക്കാട്: രാജ്യത്ത് ഉന്നത അധികാരങ്ങളിലിരിക്കുന്നവർ ശാസ്ത്രത്തിന്റെ വളർച്ചയ്ക്ക് തടസം നിൽക്കാൻ ശ്രമിക്കുന്നുവെന്ന് മുഖ്യമന്ത്രി പിണറായി വിജയൻ. ശാസ്ത്ര കോൺഗ്രസുകൾ അടക്കം അന്ധവിശ്വാസം പ്രചരിപ്പിക്കാൻ ഉപയോഗിക്കുകയാണ്. നവോഥാന കാലഘട്ടം മുതലേ ശാസ്ത്രാഭിമുഖ്യം ശക്തിപ്പെടുത്താൻ ശ്രമങ്ങൾ ഉണ്ടായിട്ടുണ്ടെന്നും കേരളത്തിന്‍റെ ചരിത്രം പരിശോധിച്ചാല്‍ ഇത് കാണാൻ സാധിക്കുമെന്നും അദ്ദേഹം പറഞ്ഞു.32ാം കേരള ശാസ്ത്ര കോൺഗ്രസ് പാലക്കാട് ഉദ്ഘാടനം ചെയ്യുകയായിരുന്നു അദ്ദേഹം. പാലക്കാട് മുണ്ടൂർ യുവക്ഷേത്ര കോളജിലാണ് ശാസ്ത്ര കോൺഗ്രസ് നടക്കുന്നത്. പരിപാടിയുടെ ഭാഗമായി സംസ്ഥാന ശാസ്ത്ര സാങ്കേതിക കൗൺസിലിന്‍റെ യുവശാസ്ത്ര അവാർഡുകൾ, ഡോ എസ് വാസുദേവ് അവാർഡ് എന്നിവ മുഖ്യമന്ത്രി വിതരണം ചെയ്തു.
മെറ്റീരിയൽ സയൻസിൽ വിക്രം സാരാഭായ് സ്പേസ് സെന്‍ററിലെ ശാസ്ത്രജ്ഞനായ ഡോ സതീഷ് അവാർഡിന് അർഹനായി. ഫിസിക്കൽ സയൻസിൽ കോഴിക്കോട് എൻ.ഐ.ടി ഫിസിക്സ് വിഭാഗം അസിസ്റ്റൻറ് പ്രൊഫസർ ഡോ സുബ്രഹ്മണ്യൻ നമ്പൂതിരി, സെൽ ആൻഡ് ബൈ മോളികുലാർ സയൻസിൽ തിരുവനന്തപുരം രാജീവ് ഗാന്ധി സെൻറർ ഫോർ ബയോടെക്നോളജി വിഭാഗം അധ്യാപകന്‍ ഡോ ഷിജുലാൽ നെൽസൺ സതി, കേരള ശാസ്ത്ര സാങ്കേതിക പരിസ്ഥിതി കൗൺസിൽ ധനസഹായം നൽകുന്ന മികച്ച ശാസ്ത്ര പ്രൊജക്‌ടിനുള്ള ഡോ എസ് വാസുദേവ് അവാർഡ് കോഴിക്കോട് നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ പ്രൊഫസർ എൻ സന്ധ്യ എന്നിവര്‍ക്ക് മുഖ്യമന്ത്രി അവാർഡുകൾ സമ്മാനിച്ചു. ജനുവരി 27 ന് ശാസ്ത്രകോൺഗ്രസ് സമാപിക്കും.
