Mirror Writing Record: പഠനം ഒന്നാം ക്ലാസില്‍, എഴുത്ത് തലതിരിച്ച്; നഹ്‌ല ഫാത്തിമ ആളൊരു മിടുമിടുക്കി

Mirror Writing Record: Nahla Fathima Malappuram: എന്ത് എഴുതാൻ കൊടുത്താലും അത്‌ നേരെ തല തിരിച്ച് എഴുതും നഹ്‌ല ഫാത്തിമ.

മലപ്പുറം: നഹ്‌ല ഫാത്തിമ ഇങ്ങനെയാണ്. എന്ത് എഴുതാൻ കൊടുത്താലും അത് നേരെ തല തിരിച്ച് എഴുതും. ആദ്യമൊക്കെ രക്ഷിതാക്കൾക്ക്‌ വിഷമം തോന്നിയിരുന്നു.

എന്നാൽ മകൾ എഴുതുന്നത് കണ്ണാടിയിൽ കാണിച്ചപ്പോഴാണ് ഈ കൊച്ചു മിടുക്കിയുടെ കഴിവ് മനസിലായത്. ഇംഗ്ലീഷ്, മലയാളം, അറബി എന്നീ മൂന്നു ഭാഷകളിലും മിറർ റൈറ്റിങ് അനായാസമായി ഈ കൊച്ചു മിടുക്കി കൈകാര്യം ചെയ്യും. ആരുടേയും സഹായം കൂടാതെയാണ് നഹ്‌ല ഫാത്തിമ മിറർ റൈറ്റിങ് പഠിച്ചെടുത്തത്.

സംഗതി ഹിറ്റായതോടെ ഇന്ത്യ ബുക്ക്‌സ്‌ ഓഫ് റെക്കോർഡിലേക്കും അയച്ചുകൊടുത്തു. ഒടുവിൽ ഇന്ത്യ ബുക്ക് ഓഫ് റെക്കോർഡ്‌സും അംഗീകരിച്ചു ഈ മിടുക്കിയെ. പെരിന്തൽമണ്ണ ജിഎംഎല്‍പി സെൻട്രൽ സ്‌കൂളിലെ ഒന്നാം തരം വിദ്യാർഥിനിയാണ് നഹ്‌ല ഫാത്തിമ.

പെരിന്തൽമണ്ണ സ്വദേശികളായ ഷിയാസ്, അലിയ മുംതാസ്‌ ദമ്പതികളുടെ മകളാണ്‌ നഹ്‌ല ഫാത്തിമ. മുഹമ്മദ് നിഹാൽ ഏകസഹോദരനാണ്.