മലപ്പുറം: കുറ്റിപ്പുറത്ത് മധ്യവയസ്‌കൻ തെരുവുനായ്ക്കളുടെ ആക്രമണത്തിൽ മരിച്ചു. കുറ്റിപ്പുറം പഞ്ചായത്തിലെ എടചെലം പ്രദേശത്തെ വടക്കേകളത്തിൽ ശങ്കരനാണ് മരിച്ചത്. കഴിഞ്ഞ ദിവസം വൈകിട്ട് നാലു മണിയോടെ ഭാരതപുഴയിലേക്ക് നടക്കാനിറങ്ങിയ ശങ്കരനെ തെരുവു നായ്ക്കൂട്ടം വളഞ്ഞിട്ട് ആക്രമിക്കുകയായിരുന്നു. തുടർന്ന് സമീപത്തുണ്ടായിരുന്നവർ ശങ്കരന്‍റെ കരച്ചിൽ കേട്ട് ഓടിയെത്തിയാണ് രക്ഷപ്പെടുത്തിയത്.
ഗുരുരമായി പരിക്കേറ്റ ശങ്കരനെ ആദ്യം കുറ്റിപ്പുറം താലൂക്ക് ആശുപത്രിയിൽ കൊണ്ടുപോയെങ്കിലും തൃശൂർ മെഡിക്കൽ കോളജിലേക്ക് കൊണ്ടുപോകുവാൻ നിർദേശിക്കുകയും എന്നാൽ യാത്രാമധ്യേ മരണപെടുകയായിരുന്നു. നാടൻ പണികൾ ചെയ്യുന്ന ശങ്കരൻ കുറച്ചു നാളുകളായി വീട്ടിൽ തന്നെയായിരുന്നു. പ്രദേശത്ത് മുൻപും ഇത്തരത്തിൽ തെരുവു നായ്ക്കളുടെ ആക്രമണം ഉണ്ടെന്നും ഇത് മൂലം വിദ്യാർഥികളും പ്രായമായവരും വളരെ ബുദ്ധിമുട്ടുന്നുണ്ടെന്നും പരാതി ഉയർന്നിരുന്നു. ഇതിന് വേണ്ട നടപടികൾ അധികൃതരുടെ ഭാഗത്തുനിന്നും ഉണ്ടായില്ലെന്നും പ്രദേശവാസികൾ ആരോപിച്ചു.
