മലപ്പുറം: ജില്ലയിലെ പ്രധാന ജല ടൂറിസം കേന്ദ്രങ്ങളായ ആഡ്യൻപാറയിലും കോഴിപ്പാറയിലും ജലനിരപ്പ് കുറയുന്നതില് വനംവകുപ്പ് ആശങ്കയില്. ആയിരങ്ങളാണ് ഇവിടം സന്ദര്ശിക്കുന്നതിനായി എത്തുന്നത്. എന്നാൽ മുൻവർഷങ്ങളെ അപേക്ഷിച്ച് ജലനിരപ്പ് ഗണ്യമായി താഴുന്നതിനാല് വിനോദ സഞ്ചാരികളുടെ വരവിൽ ഗണ്യമായ കുറവ് ഉണ്ടാകാനാണ് സാധ്യതയെന്ന് ഉദ്യോഗസ്ഥര് പറയുന്നു.
കുറുവൻ പുഴയുടെ വാളാംതോട്ടിലെ കടവിലാണ് കോഴിപ്പാറ വെള്ളച്ചാട്ടം സ്ഥിതി ചെയ്യുന്നത്. തോട്ടപ്പള്ളി മുതൽ വാളംതോട് വരെയുള്ള മൂന്ന് കിലോമീറ്റർ ദൂരത്തിൽ പത്തോളം ചെറിയ കടവുകളുമുണ്ട്. മുതിർന്നവർക്ക് 40 രൂപയും കുട്ടികൾക്ക് 20 രൂപയുമാണ് പാസ് ഇനത്തിൽ വനം വകുപ്പ് ഈടാക്കുന്നത്. നിലവിൽ നിലമ്പൂരിൽ നിന്നും അകമ്പാടം വഴി കക്കാടം പൊയിലിലേക്കുള്ള റോഡും കുമ്പാറയിൽ നിന്നും കക്കാടം പൊയിലിലേക്കുള്ള റോഡും തകർന്ന് കിടക്കുന്നതിനാല് കോഴിപ്പാറ ടൂറിസം കേന്ദ്രത്തിലേക്കുള്ള വിനോദ സഞ്ചാരികളുടെ വരവ് കുറഞ്ഞിട്ടുണ്ട്.