കോഴിക്കോട്: പ്രതീക്ഷിച്ചതിൽ നിന്ന് വലിയ മാറ്റമൊന്നും സംഭവിച്ചില്ല, ഏകീകൃത സിവിൽ കോഡ് പ്രതിഷേധ സെമിനാറിൽ സിപിഎമ്മിന് ഒപ്പമിരിക്കാൻ മുസ്‌ലിം ലീഗ് ഇല്ല. സിപിഎം ഒരുക്കുന്നത് ഒരു കെണിയാണെന്ന തീരുമാനത്തിൽ ലീഗ് എത്തിച്ചേർന്നു. അല്ലെങ്കിൽ, അങ്ങനെ പറഞ്ഞെങ്കിലും ആ ക്ഷണത്തെ നിരസിക്കാന്‍ നേതൃത്വം അവസാനം തയ്യാറായെന്നാണ് വിവരം. എന്നാല്‍, യുഡിഎഫിലെ മറ്റ് ഘടക കക്ഷികളെ ക്ഷണിക്കാത്ത സെമിനാറില്‍ പങ്കെടുക്കേണ്ടെന്ന തീരുമാനത്തിലാണ് എത്തിച്ചേര്‍ന്നതെന്നാണ് ലീഗ് നേതൃത്വത്തിന്‍റെ വിശദീകരണം.
വലിയ വിഭാഗം നേതാക്കളുടെ അതൃപ്‌തി കണക്കിലെടുത്ത് 'കോണി' തത്‌കാലം മാറ്റി ചാരുന്നില്ല. ഡൽഹിയിൽ എത്തിയാൽ പ്രതിഷേധത്തിന് ശക്തി കിട്ടുക കോൺഗ്രസിൻ്റെ തണലിലായിരിക്കും എന്ന കണ്ടെത്തലാണ് ഇതിൽ മുഖ്യം. ഏക സിവിൽ കോഡിലൂടെ സിപിഎം ലക്ഷ്യമിടുന്നത് ന്യൂനപക്ഷ വോട്ടിൻ്റെ അരക്കിട്ടുറപ്പിക്കലാണെന്ന് ലീഗിന് നേരത്തെ തന്നെ അറിയാം. എന്നാൽ, തങ്ങളുടെ പിന്നാലെ ഗോവിന്ദനും സംഘവും ഏതറ്റംവരെ വരുമെന്ന് നോക്കി നിൽക്കുകയായിരുന്നു ലീഗ് നേതൃത്വം.
'അറക്കൽ ബീവി'യെ സംബന്ധം ആലോചിച്ച സമയത്തുതന്നെ വേണ്ടായെന്ന് തീരുമാനമെടുക്കാൻ ലീഗിലെ ചില 'സഹോദരങ്ങൾക്ക്' മടിയായിരുന്നു. കെട്ടിയാൽ ഗുണം ഒരുപാടുണ്ടെന്ന് സിപിഎം നേരത്തെ മനസിലാക്കിയപ്പോൾ ഇത് ഒത്തുപോകില്ല എന്ന് മനസിലാക്കാൻ ലീഗിന് സമയം എടുക്കേണ്ടി വന്നു. എന്നാൽ, ഇരു കുടുംബങ്ങളിലേയും ചിലർക്കെങ്കിലും അങ്ങോട്ടുമിങ്ങോട്ടും മുഹബത്ത് ഉണ്ടായതാണ് കാര്യങ്ങൾ ഇവിടെ വരെ നീട്ടിവലിച്ചത്.
സമസ്‌തയിലെ സിപിഎം വിരുദ്ധരെ ഒപ്പം കൂട്ടാന്‍ ലീഗ്: കോഴിക്കോട് നടക്കുന്ന സിപിഎം സെമിനാറിൽ സമസ്‌ത പങ്കെടുക്കാമെന്ന് തീരുമാനിച്ചതും ലീഗിനെ മാറ്റി ചിന്തിക്കാൻ കൂടുതൽ പ്രേരിപ്പിച്ചിട്ടുണ്ട്. പൗരത്വ ഭേദഗതി വിഷയത്തിൽ ലീഗിനെ കുറച്ചൊന്നുമല്ല സമസ്‌ത വട്ടം കറക്കിയത്. അന്ന് എല്ലാ മതസംഘടനകളും നേരിട്ട് അവിടെയെത്തിയപ്പോള്‍ ലീഗിനേറ്റ ക്ഷതം ചെറുതൊന്നുമായിരുന്നില്ല. അതിനുള്ള ഒരു മധുര പ്രതികാരം കൂടിയാണ് ലീഗിൻ്റെ ഈ തീരുമാനം. ഒരു രാഷ്ട്രീയ പാർട്ടി എന്ന നിലയിൽ തങ്ങൾക്കും ചില തീരുമാനങ്ങൾ കൈക്കൊള്ളാൻ കഴിയും എന്ന മറുപടി കൂടിയാണത്. സിപിഎം വിരുദ്ധരായ സമസ്‌ത അണികളെ തങ്ങളിലേക്ക് കൂടുതൽ അടുപ്പിക്കാനും ഈ തീരുമാനത്തിലൂടെ കഴിഞ്ഞുവെന്ന് ലീഗ് നേതൃത്വം വിശ്വസിക്കുന്നു.
ഭരണവിരുദ്ധ വികാരം അലയടിക്കുന്ന കേരളത്തിൽ ലീഗ് തീരുമാനം കോൺഗ്രസിന് നൽകുന്നത് ചെറിയ ആശ്വാസമൊന്നുമല്ല. പിണറായിക്കെതിരെ കോൺഗ്രസ് പട നയിക്കുമ്പോൾ പാളയത്തിൽ പട ഇല്ലെന്ന് ബോധ്യപ്പെടുത്താനെങ്കിലും ഈ തീരുമാനം ഉപകരിക്കും. ലീഗുമായുള്ള ബന്ധം അഭേദ്യമാണെന്നുള്ള പ്രോത്സാഹനവും വന്നേക്കാം. എന്നാൽ, യുഡിഎഫിലെ രണ്ടാമത്തെ പ്രബല കക്ഷി എന്ന നിലയിൽ ലീഗ് ഇനി മുന്നണിയിൽ സമർദ തന്ത്രങ്ങൾക്ക് കരുത്തുകൂട്ടും. അത് തെരഞ്ഞെടുപ്പ് അടുക്കുമ്പോൾ സീറ്റ് വിഭജന ചർച്ചയിലൂടെ മറനീക്കി പുറത്തുവരികയും ചെയ്യും.
ലോക്‌സഭയിലേക്ക് മൂന്നാം സീറ്റ് എന്ന അവകാശവാദത്തിന് ലീഗ് സ്വരം കടുപ്പിക്കും. ഒപ്പം ഇടതുസർക്കാര്‍ കാണിക്കുന്ന മുസ്‌ലിം ന്യൂനപക്ഷ പ്രീണനത്തിൻ്റെ അളവുകോൽ ഉയർത്തിയും കോൺഗ്രസിനെ ലീഗ് വരച്ചവരയിൽ കൊണ്ടുവരും. അവിടെ, സിപിഎം കുഴിച്ച കുഴിയുടെ അരികിൽ വരെ എന്തിന് പോയി നോക്കി ലീഗേ എന്ന വിമർശനത്തിലായിരിക്കും കോൺഗ്രസ് ചെറിയൊരു ആശ്വാസം കണ്ടെത്തുക.
'പുകയുമോ' സിപിഐയുടെ അതൃപ്‌തി ?: ലീഗിന് പിന്നാലെ സംബന്ധം ആലോചിച്ച് ചീറ്റിപ്പോയ സിപിഎമ്മിനെതിരെ സിപിഐ എങ്ങനെ പ്രതികരിക്കും എന്നതും ശ്രദ്ധേയമാണ്. മുന്നണിയിൽപ്പോലും ആലോചിക്കാതെ സിപിഎം കൈക്കൊള്ളുന്ന തീരുമാനങ്ങളിൽ സിപിഐക്ക് വലിയ അതൃപ്‌തിയുണ്ട്. എന്നാൽ ഇതിനോടൊക്കെ പ്രതികരണമുണ്ടോ എന്ന് ചോദിക്കുമ്പോൾ, കേന്ദ്ര നേതൃത്വത്തോട് ആലോചിക്കട്ടെ എന്ന മറുപടിയാണ് സിപിഐ നൽകാറുള്ളത്. ലീഗ് എങ്ങാനും എൽഡിഎഫിലേക്ക് വന്നാൽ പണിപാളുമെന്ന് സിപിഐക്ക് നന്നായി അറിയാം.
ലീഗ് യുഡിഎഫിൽ നടത്തുന്ന സമ്മർദം സിപിഐക്ക് എൽഡിഎഫിൽ നടക്കാത്തതുകൊണ്ട് അങ്ങനെ തട്ടിയും മുട്ടിയും മുന്നോട്ട് പോകുന്നുവെന്ന് മാത്രം. എന്നാൽ, ഈ വിഷയത്തിൽ സിപിഐ സ്വരം കടുപ്പിച്ചാൽ, മതേതര നിലപാടുള്ള ആരുമായും യോജിക്കാം എന്ന തീരുമാനത്തിൽ നിന്നുള്ള ലീഗിൻ്റ ചാഞ്ചാട്ടത്തെ സിപിഎം തള്ളി പറയുമോ ?. ഒപ്പം ലീഗുമായി കൂട്ടുകൂടാൻ പൂതി കൊണ്ട കാന്തപുരത്തിന് മനംമാറ്റം ഉണ്ടാകുമോയെന്നും കണ്ടറിയണം.
