കോഴിക്കോട്: 61-ാമത് കേരള സ്‌കൂൾ കലോത്സവത്തിന് തിരി തെളിഞ്ഞതോടെ വേദികളിലേക്ക് ഒഴുകിയെത്തിയത് ജനസാഗരം. കൊവിഡ് സൃഷ്‌ടിച്ച രണ്ട് വർഷത്തെ ഇടവേളയ്ക്ക് ശേഷം കലാ മാമാങ്കത്തിന് തിരിതെളിഞ്ഞതോടെ ഉത്സവപ്രതീതിയിലാണ് കോഴിക്കോട്. മത്സരങ്ങൾ നടക്കുന്ന 24 വേദികളിലേക്കും രാവിലെ മുതൽ കലാസ്വാദകരുടെ ഒഴുക്കാണ്.
വേദിക്കും പുറത്തും ജനം തടിച്ചുകൂടിയ സ്ഥിതിയാണ് കാണാൻ സാധിച്ചത്. അതിഥി സൽക്കാരമൊരുക്കി കച്ചവടക്കാരും അണിനിരന്നതോടെ കാര്യങ്ങള്‍ പൊടിപൂരം. മത്സരാർഥികൾ, രക്ഷിതാക്കൾ, അധ്യാപകർ എന്നിവർക്ക് പുറമേ കോഴിക്കോടിന്‍റെ വിവിധ ഭാഗങ്ങളിൽ നിന്നുള്ളവരും മറ്റു ജില്ലകളിലുള്ളവരും എത്തിയതോടെ കലോത്സവം കൊട്ടിക്കേറുകയാണ്. രാവിലെ മുതൽ വേദികൾ ജനനിബിഡമായിരുന്നു.
പ്രവൃത്തി ദിവസമായിട്ടും ചെറിയ കുട്ടികളടക്കം നിരവധി പേരാണ് കലോത്സവ നഗരിയിലെത്തിയത്. ഹയർസെക്കൻഡറി വിഭാഗം നാടോടി നൃത്തത്തോടെയാണ് പ്രധാന വേദിയായ വിക്രം മൈതാനിയിൽ മത്സരങ്ങൾ ആരംഭിച്ചത്. ശേഷം മലബാറിന്‍റെ മാപ്പിള കലാരൂപമായ ഒപ്പനയും വേദിയിൽ അരങ്ങേറി.
ഹൈസ്‌കൂൾ വിഭാഗം ഒപ്പന മത്സരം ആരംഭിച്ചതോടെ വിക്രം മൈതാനിയിലേക്ക് ജനസാഗരമായിരുന്നു. സീറ്റുകൾ നിറഞ്ഞതോടെ വേദിയുടെ വശങ്ങളിൽ കലാസ്വാദകർ സ്ഥാനം പിടിച്ചു. ദഫ് മുട്ട്, കോൽക്കളി ഉൾപ്പെടെയുള്ളവ നടന്ന വേദികളിലും സ്ഥിതി സമാനമായിരുന്നു. വേദി രണ്ടിൽ നടന്ന ഹയർസെക്കൻഡറി വിഭാഗം നാടക മത്സരം കാണാനും നിരവധി പേർ എത്തി.
കലോത്സവ വേദികളിൽ സുരക്ഷയൊരുക്കാൻ പൊലീസും ഇന്ത്യൻ റിസർവ് ബറ്റാലിയനും രംഗത്തുണ്ട്. ഇനി വരുന്ന മൂന്ന് നാളുകള്‍ കൂടി കോഴിക്കോട്ടെ കലോത്സവ നഗരിയിലേക്ക് ജനം ഒഴുകിയെത്തും.
Also read: ആവേശം നിറച്ച് കലാമാമാങ്കം; 458 പോയിന്‍റുമായി കണ്ണൂര്‍ മുന്നില്‍, കോഴിക്കോടിന് 453 പോയിന്‍റ്
