കോഴിക്കോട്: കോഴിക്കോട് നഗരത്തിലെ മുതലക്കുളം മൈതാനം നിറയെ അയകൾ കെട്ടിയിരിക്കുന്നു. പഴയതുപോലെ എല്ലാ അയയിലും തുണികൾ വിരിച്ചിട്ടില്ല. കൊവിഡ് കാലം എല്ലാ മേഖലയിലും പ്രതിസന്ധി സൃഷ്ടിച്ചപ്പോൾ മുതലക്കുളത്തെ അലക്കുതൊഴിലാളികളുടെ ജീവിതവും വഴി മുട്ടി. കൊവിഡിന്‍റെ പശ്ചാത്തലത്തിൽ ലോഡ്‌ജുകൾ അടക്കമുള്ളവ പൂട്ടിയതോടെ അലക്കാനുള്ള തുണികൾ കുറഞ്ഞു.
നൂറോളം തൊഴിലാളികൾ ഉണ്ടായിരുന്നിടത്ത് ഇപ്പോൾ പകുതി തൊഴിലാളികൾ മാത്രമായി. സ്ഥിരമായി തുണികൾ അലക്കാൻ നൽകിയിരുന്ന ഹോട്ടലുകളിലും വീടുകളിലും നിന്നുള്ള തുണികൾ ലഭിക്കാതെയായി. കൊവിഡിന് മുമ്പ് 5,000-6,000 രൂപ മാസ വരുമാനം ഉണ്ടായിരുന്നു. ഇപ്പോൾ ഒന്നുമില്ലാത്ത അവസ്ഥയാണെന്ന് തൊഴിലാളികൾ പറയുന്നു. നാൽപ്പതും അമ്പതും വർഷമായി ഈ തൊഴിലെടുക്കുന്നവരാണ് അധികവും. പക്ഷേ കൊവിഡിനെ അതിജീവിച്ചവർക്ക് മേല്‍ കോർപ്പറേഷന്‍റെ പുതിയ പദ്ധതി പ്രതിസന്ധി സൃഷ്ടിക്കുകയാണ്.
തുണികൾ ഉണക്കിയിരുന്ന മുതലക്കുളം മൈതാനം പാർക്കിങ് പ്ലാസയാക്കി മാറ്റുകയാണ്. 95 സെന്‍റ് സ്ഥലത്ത് 18.5 കോടി രൂപ ചെലവില്‍ അത്യാധുനിക പാർക്കിങ് പ്ലാസ. റോബോട്ടിക് സംവിധാനം ഉപയോഗിച്ചുള്ള പാർക്കിങിൽ ഭൂമിക്കടിയിലും സൗകര്യം ഏർപ്പെടുത്തും. ഇതിനോടൊപ്പം വിശ്രമമുറി, ടോയ്‌ലറ്റ് എന്നിവയുമൊരുക്കും. അലക്കു തൊഴിലാളികൾക്കുള്ള പുനരധിവാസം, പൊതുപരിപാടികൾക്ക് കൂടുതൽ സൗകര്യം എന്നിവയാണ് ഈ പദ്ധതിയിലൂടെ കോർപറേഷൻ വിഭാവനം ചെയ്യുന്നത്. എന്നാല്‍ കോർപറേഷന്‍റെ ഏത് പദ്ധതി വന്നാലും മുതലക്കുളം ഉപേക്ഷിച്ച് പോകില്ലെന്നാണ് അലക്കുതൊഴിലാളികൾ പറയുന്നത്.
