കോഴിക്കോട്: കോഴിക്കോട് ഒരാള്‍ക്ക് കൂടി നിപ വൈറസ് (Nipah Virus) സ്ഥിരീകരിച്ചു. ആശുപത്രിയില്‍ നിരീക്ഷണത്തിലുണ്ടായിരുന്ന ചെറുവണ്ണൂര്‍ സ്വദേശിയായ 39 വയസുകാരനാണ് നിപ സ്ഥിരീകരിച്ചത് (New Nipah Case). നേരത്തെ നിപ ബാധിച്ച് മരിച്ചയാളുടെ സമ്പര്‍ക്ക പട്ടികയില്‍ ഉള്ള ആളാണ് ഇദ്ദേഹം. ഇതോടെ ജില്ലയില്‍ നിപ വൈറസ് ബാധ സ്ഥിരീകരിച്ച് ചികിത്സയില്‍ കഴിയുന്നവരുടെ എണ്ണം നാലായി (Nipah Active cases Kozhikode).
നേരത്തെ നിപ വൈറസ് ബാധ സ്ഥിരീകരിച്ച വ്യക്തികള്‍ മറ്റ് ചികിത്സകള്‍ക്കായെത്തിയ സ്വകാര്യ ആശുപത്രിയില്‍ 39 കാരനും ചികിത്സ തേടിയിരുന്നു. പിന്നാലെ രോഗലക്ഷണങ്ങള്‍ കണ്ടെത്തിയതിനെ തുടര്‍ന്ന് ഇയാള്‍ ഐസോലേഷനില്‍ കഴിയുകയായിരുന്നു. നിലവില്‍ മെഡിക്കല്‍ കോളജില്‍ ചികിത്സയില്‍ കഴിയുന്ന ഇയാള്‍ക്ക് ഗുരുതരമായ ആരോഗ്യ പ്രശ്‌നങ്ങള്‍ ഇല്ലെന്നാണ് പുറത്തുവരുന്ന വിവരം.
നിലവില്‍ സമ്പര്‍ക്ക പട്ടികയില്‍ ഉള്ളവരുടെ എണ്ണം 950 കടന്നിട്ടുണ്ട്. കഴിഞ്ഞ ദിവസം രോഗം സ്ഥിരീകരിച്ച ആരോഗ്യ പ്രവര്‍ത്തകന്‍റെ സമ്പര്‍ക്ക പട്ടികയില്‍ ഉള്ളവരുടെ പേരുകള്‍ മാത്രമാണ് അവസാനമായി പട്ടികയിലേക്ക് ചേര്‍ത്തത്. 213 പേരാണ് ഹൈ റിസ്‌ക് പട്ടികയിലുള്ളത്. കൂടാതെ 287 ആരോഗ്യ പ്രവര്‍ത്തകരുടെ പേരും സമ്പര്‍ക്ക പട്ടികയിലുണ്ട്. ഇവര്‍ 21 ദിവസം ഐസൊലേഷനില്‍ കഴിയണമെന്നാണ് നിര്‍ദേശം.
ഇക്കഴിഞ്ഞ ബുധനാഴ്‌ച (സെപ്‌റ്റംബര്‍ 13) പരിശോധന നടത്തി ഇന്നലെ പുറത്തുവന്ന 11 സാമ്പിളുകളുടെ ഫലം നെഗറ്റീവ് ആയിരുന്നു. 30 സാമ്പിളുകളുടെ ഫലമാണ് ഇനി ലഭിക്കാനുള്ളത്. നിലവില്‍ മെഡിക്കല്‍ കോളജിലെ ഐസൊലേഷന്‍ വാര്‍ഡില്‍ 34 പേരാണ് നിരീക്ഷണത്തിലുള്ളത്.
ഇതില്‍ കണ്ടെയിന്‍മെന്‍റ് സോണില്‍ നിന്നെത്തിയ അഞ്ച് പേര്‍ തീവ്രപരിചരണ വിഭാഗത്തിലാണ്. കൂടാതെ ജില്ലയിലെ രണ്ട് സ്വകാര്യ ആശുപത്രിയിലായി 8 പേരും ചികിത്സയിലുണ്ട്. ഇതില്‍ കണ്ടെയിന്‍മെന്‍റ് സോണില്‍ നിന്നെത്തിയ അഞ്ച് പേര്‍ തീവ്രപരിചരണ വിഭാഗത്തിലാണ്. നേരത്തെ രോഗം സ്ഥിരീകരിച്ച് വെന്‍റിലേറ്ററില്‍ കഴിയുന്ന ഒന്‍പതുവയസുകാരന്‍റെ ആരോഗ്യനിലയില്‍ ഇപ്പോഴും കാര്യമായ പുരോഗതിയില്ലെന്നാണ് വിവരം.
അതേസമയം, നിപ ബാധിത പ്രദേശങ്ങളില്‍ കേന്ദ്ര സംഘം ഇന്ന് സന്ദര്‍ശനം നടത്തുന്നുണ്ട്. വവ്വാലുകളുടെ സാമ്പിളും സംഘം ഇന്ന് മുതല്‍ ശേഖരിച്ച് തുടങ്ങും. കൂടാതെ രാജീവ് ഗാന്ധി സെന്‍റര്‍ ഫോര്‍ ബയോടെക്‌നോളജിയിലെ (RGCB) മൊബൈല്‍ സംഘവും ഇന്നാണ് ജില്ലയിലേക്ക് എത്തുന്നത്. നിലവിലെ സാഹചര്യങ്ങള്‍ വിലയിരുത്തുന്നതിന് മന്ത്രിമാരുടെ നേതൃത്വത്തില്‍ ഇന്ന് ഉന്നതതലയോഗവും ചേരുന്നുണ്ട്.
Also Read : Nipah School Holiday നിപ; കോഴിക്കോട് ശനിയാഴ്‌ചയും സ്‌കൂളുകള്‍ക്ക് അവധി
